Б.Баяндэлгэрийн талаарх сайхан сэдээг 24tsag.mn дуулгаж байна. 24tsag.mn рүү сүүлийн хоёр өдөр зуу зуун хүн утасдаж, цахим захидал илгээж, зарим нь биеэр хүрэлцэн ирж Б.Баяндэлгэрт яаж туслах талаар саналаа илэрхийлж байна. Визийн зөрчлийн улмаас Балбад 3 сар гаруй саатуулагдан
хоригдож байгаа Б.Баяндэлгэрт хандивын данс нээж мөнгө цуглуулан түүнийг эх орондоо, гэртээ шинэлүүлэх санаачилга өрнөж, өнөөдрөөс энэ ажлаа эхлүүлэхээр 24tsag.mn сайтын бие биенээ танихгүй жирийн уншигч залуучууд зохион байгуулалтад орж эхлээд байв. Сайн санаат хүмүүс манай сайтын зохиогчдын нэг М.Буянбадрахын сурвалжлагаас түүний өрөвдөм түүхийг уншаад туслахаар шийджээ.“Цагаан сараар цагаан үйлс бүтээе” гэсэн манай уриалгыг дэмжсэн тэр олон хүний сайхан санаа, сэтгэл зовнил “Хүний мөс чанар муудсан” хэмээх өнөө цагийн тодорхойлолтыг өөрийн эрхгүй няцааж байлаа. Гадаа -40 хэм хүртэл хүйтэрч байгаа ч нэгнээ гэсэн монгол хүний халуун сэтгэл зуны нар шиг халуунаараа байна. Сэтгэлд нь гал бадарч яваа монголчуудын нэг нь “Дорнод нутаг” клубын тэргүүн С.Отгонбаатар. Дорнод нутгийн болон Монгол улсынхаа хөгжилд хувь нэмрээ оруулах, нутгийнхаа оюутан залуусыг дэмжих зорилготой энэ клубын залуус нутгийнхаа хүүг харийн шоронгоос авчрахаар боллоо.
- Хүний нутагт мөнгөгүйн эрхээр хоригдож байгаа Дорнодынхоо залуугийн тухай сэтгэл шимшрэн уншлаа. Бид ярилцаад эргэлзэх юмгүй түүнийг яаж суллуулах талаар 24tsag.mn сайт болон ГХЯ-ны нөхөдтэй зөвлөлдөж эхэлсэн. ГХЯ-ны Консулын газар бас их тусалж байгаа. Эхний ээлжинд түүний визийн зөрчлийн торгууль, тийзний мөнгийг шийдвэрлэж байна. Монголчууд нэгнийгээ гээж мартаж болохгүй ээ. Б.Баяндэлгэрийгээ бид Дорноддоо шинэлүүлнэ гэж С.Отгонбаатар өгүүлж байна.
Үйл явдлын өрнөлтөөс харвал монгол залуугийн суллагдах өдөр холгүй бололтой. Балбын цагаачлалын албанаас ирэх хариуг одоо бүгд чих тавин хүлээж байна. “Дорнод нутаг” клуб, түүний тэргүүн С.Отгонбаатар нарын нутгийнхаа залууг нутагтаа шинэлүүлэх зорилго хэрхэн биелэхийг 24tsag.mn дэлгэрэнгүй сурвалжлах болно.
Баянхонгороос утасдаж, Бага тойргоос ирж уулзаж, Америкаас мэйл бичиж яаж туслахаа ярилцаж байсан бүх хүмүүст хүн ёсны ганцхан сайхан үгийг Б.Баяндэлгэрийн өмнөөс 24tsag.mn хэлж байна. Энэ үг бол БАЯРЛАЛАА юм.
PS: "Монгол шилтгээн", "Хаанброй" ХХК-ийн ерөнхий захирал, "Монгол 999 Үндэсний Нэгдэл" ХК-ий ТУЗ-ийн гишүүн, “Дорнод нутаг” клубын тэргүүн С.Отгонбаатартай нэрт сэтгүүлч Б.Ганчимэгийн хийсэн ярилцлагыг энд дарж уншина уу.
