Таван сарын хугацаатай МАН-ын “түр дамжаа” эхэллээ. Сонгуулийн бэлтгэл болгож МАН дараагийн парламентат сойх хүмүүсээ дэд сайдын бэлтгэл дамжаанд явуулж эхэллээ. АН-ын дэдүүдийн оронд заавал шинэ хүн нөхөн томилох шаардлагагүй гэж олон хүн үзэж байсан ч ерөнхий сайдын эрх мэдлийн асуудал тул наймаа, тохиролцоотой хүмүүсийн нэрийг гэнэт гаргаж ирээд гэнэт сайдын зөөлөн суудалд томилчихлоо. Сайд нар явж л байдаг, ирж л байдаг. Гэхдээ энэ удаагийнх шиг улаан цайм бэлтгэх дамжаа шиг шалгууртай байсан нь үгүй. Тухайн ажлыг хариуцах чадвартай, ажлын туршлагтай хүмүүсийг сонголоо гэж МАН-ын зүгээс мэдэгдэж байгаа ч бизнес сэтгэлгээгээр хандсан нь илт харагдаж байна. Бусдыгаа бодвол салбараа мэддэг, туршлагатай гэсэн нь МАН-ын томчуудын гарын хүмүүс болж таараад байдаг. Гадаад харилцааны дэд Г.Тэнгэр нь Ё.Отгонбаяр сайдын туслах байхад Зам тээвэр, барилга, хот байгуулалтын дэд сайд Б.Цэнгэл нь МАН-ын ерөнхий нарийн бичиг Ү.Хүрэлсүхийн хүн гэх. Нам доторхи наймаа, эрх мэдлийн хуваарилалтын асуудал ч  сайд, дэд сайд нь хонь хурга нийлсэн мэт болж үлдсэн хэдэн сард ёстой л “хонины найр” болох гээд байна.  
   Өмнө нь МАН-ын удирдах зөвлөлийн хурлаар хурган баячууд, өв залгамжилсан баячуудын хүүхдийг дэд сайдын албанд томилохгүй гэсэн чихэнд чимэгтэй үг дуулдаж байсан. Гэвч нэрийг нь сонсоод л бизнес, мөнгөний үнэр үнэртэх хүмүүс дэд сайд болчихлоо. “Бишрэлт”, “Мак” гэх зэрэг нэрнийхээ урд гоё тодотголтой ноёд хадагтай нарын энэ өөдөө мацаж ирсэн шалгуур нь юу вэ? Намд өгсөн хандив уу, ирэх сонгуулийн хаялага уу?
  АН-ын хуучин сайд нар шинэ томилогдсон сайд нарын хажууд  шижгэр залуус байж дээ гэж харамсангуй хэлж байсан шиг МАН-ын шинэ сайд нар ч дэд сайд нарынхаа хажууд “эгэлгүй” хүмүүс юм гэсэн бодол ч төрж байх шиг. МАН-ын шинэ сайд нарыг УИХ-ын чуулганаар шүүж, олны өмнө амыг нь асуусан бол дэд сайд нар хаалттай хаалганы цаана “өдлөв”. Дараагийн парламентат энэ дэдүүд шат ахиад сайд болсон байхад гайхах зүйлгүй. Харин бизнесийн салбарынхан төрд түрж орж ирэх нь хар төрүүлж, санаа зовоогоод байна.