Цагдаагийн экс дарга нарт холбогдох шүүх хурлыг энэ сарын 14-ныг хүртэл хойшлуулсан. Учир нь цагдаагийн газрын дарга асан, хурандаа О.Зоригтын өмгөөлөгч эмнэлэгт хэвтэж, хагалгаа хийлгэх шаардлагатай болсон. Мөн өмгөөлөгчдийн зүгээс шүүгчид хүсэлт гаргасан юм. Энэ талаар ЦЕГ-ын даргын үүрэг гүйцэтгэгч асан, хошууч генерал Ч.Амарболдын өмгөөлөгч  О.Алтангэрэлтэй ярилцлаа.
    Цагдаагийн экс дарга нарт холбогдох шүүх хурлыг энэ сарын 14-ныг хүртэл хойшлуулсан. Учир нь цагдаагийн газрын дарга асан, хурандаа О.Зоригтын өмгөөлөгч эмнэлэгт хэвтэж, хагалгаа хийлгэх шаардлагатай болсон. Мөн өмгөөлөгчдийн зүгээс шүүгчид хүсэлт гаргасан юм. Энэ талаар ЦЕГ-ын даргын үүрэг гүйцэтгэгч асан, хошууч генерал Ч.Амарболдын өмгөөлөгч  О.Алтангэрэлтэй ярилцлаа.

-Шүүх бүрэлдэхүүнд хүсэлт тавьсан гэсэн. Энэ талаар жаахан тодруулахгүй юу?

-Шүүх хурал хойшилсны дараагаар шүүх бүрэлдэхүүнд хэд хэдэн хүсэлт гаргасан байгаа. Учир нь цагдаагийн экс дарга нарт холбогдох хэргийг Эрүүгийн хуулийн 274 дүгээр зүйлийн 274.2 буюу “Монгол Улсын иргэн зэвсэгт хүчин, бусад цэрэгт, цэргийн үүрэгтэн дайчилгаа, сургууль, цугларалтын үед цэргийн алба хаах талаар хуулиар тогтоосон журмыг зөрчиж энэ бүлэгт заасан гэмт хэргийг үйлдсэн” гэсэн үндэслэлээр ял төлөвлөснийг үндэслэлгүй хэмээн мэдэгдсэн. Мөн тухайн үед Ерөнхийлөгч байсан Н.Энхбаяр, Ерөнхий сайд асан С.Баяр, Үндэсний аюулгүй байдлын зөвлөлийн гишүүн асан, Д.Лүндээжанцан, Хууль зүй, дотоод хэргийн сайд асан Ц.Мөнх-Оргил нарыг шүүх хуралд  оролцуулах хүсэлт гаргасан. Шүүх хурлын  үеэр энэ хүмүүсээс  гэрчийн хувиар асуулт тавихыг хүсч байгаа юм. Түүнчлэн ирэх гуравдугаар сарын 14-ний өдөр болох шүүх хурлыг нээлттэй явуулж өгөхийг хүссэн.

-Хурлын үеэр хавтаст хэргийг нэг бүрчлэн ярих байх. Тэгэхээр хурлыг нээлттэй явуулах боломжгүй юм биш үү?

-Шүүх бүрэлдэхүүн хэргийг “Төрийн нууцтай хамааралтай” гээд хаалттай хэлэлцэх гээд байгаа. Өнгөрсөн даваа гаригт товлогдсон хурлыг мөн нээлттэй явуулахыг хүссэн ч хүлээж аваагүй. Мөн энэ сарын 14-нд болох шүүх хурлыг ч хаалттай явуулна гэж Сүхбаатар дүүргийн шүүхээс мэдэгдсэн байгаа. Намайг хавтаст хэрэгтэй танилцахад нууж, хаагаад байх зүйл байгаагүй.

-Тэгвэл яагаад заавал хаалттай явуулах гээд байгаа юм бол?

-“Улсын нууцад хамаарах зүйлийн талаар ярьж магадгүй” гэдэг нь шүүх хурлыг хаалттай явуулах үндэслэл биш. Хурлыг нээлттэй явуулах бүрэн боломж байгаа. Хэргийн үнэн мөнийг хэвлэлийнхэн ард түмэнд мэдүүлэх хэрэгтэй. Хэрэгт хэн хэрхэн, яаж хандаж байгааг, хэрхэн шийдэгдэх эсэхийг ил тод харуулах ёстой.

-Дараагийн хуралд тухайн үед Ерөнхийлөгч байсан Н.Энхбаяр, Ерөнхий сайд асан С.Баяр, Үндэсний аюулгүй байдлын зөвлөлийн гишүүн асан, Д.Лүндээжанцан, Хууль зүй, дотоод хэргийн сайд асан Ц.Мөнх-Оргил нарыг шүүх хуралд  оролцуулах хүсэлт гаргасан гээд байгаа. Гэвч тэд хуралд ирэх болов уу. Төрийн гурван өндөрлөгт байсан хүмүүс нь шүүхэд дуудагдаж байгаа анхны тохиолдол байх?
 
-Хуулиндаа заагаад өгчихсөн байгаа. Тэгээд ч тэднийг гэрчээр дуудаж байгаа. Тиймээс иргэний үүргээ биелүүлэхээр ирэх л ёстой. Зугтаагаад байх шаардлага, шалтгаан байхгүй байх.

-Хамгийн гол нь цагдаагийн экс дарга нарыг цэргийн албаны эсрэг гэмт хэрэг үйлдсэн хэмээн ял төлөвлөсөн. Хэрвээ энэ зүйл ангиар яллавал хэлмэгдүүлэлт болно гэх хүн олон байгаа? 

-Энэ асуудлаар шүүх бүрэлдэхүүнд хүсэлт гаргасан байгаа. Энэ сарын 14-нд болох шүүх хуралд энэ зүйл ангийг хэрэглэх эсэхийг шийднэ. Учир нь энэ зүйл ангиар яллавал жинхэнэ хэлмэгдүүлэлт болно. ХЗДХЯ-ны сайд Ц.Нямдорж холбогдох албан тушаалтнуудад “Хэрвээ энэ зүйл ангиар хурандаа нарыг яллавал жинхэнэ хэлмэгдүүлэлт болно” гэдгийг сануулсан. Мөн хууль зүй ухааны доктор, Монгол Улсын цагдаагийн байгууллагыг олон жил удирдсан, Н.Багабанди Ерөнхийлөгчийн үед зөвлөхөөр нь ажиллаж байсан, цагдаагийн хошууч генерал Б.Пүрэв гуай, цэргийн гэмт хэргийг дагнан судалдаг Бат-Ерөөлт, Шүүхийн шийдвэр гүйцэтгэх ерөнхий газрын дарга асан, хошууч генерал Л.Гарамжил нар хүртэл “Цэргийн гэмт хэрэг гэсэн ангилалд хамааруулж болохгүй” гээд байгаа.

-Л.Гарамжил генерал цагдаагийн экс дарга нарт холбогдох хэргийг шүүхэд шилжүүлсэн нь хуулийн практикт байхгүй сонин асуудал. “Өршөөл үзүүлэх тухай” хуулиар хэрэгсэхгүй болгосон хэргийг сэргээн шалгадаг хуулийн ямар нэгэн үндэслэл байхгүй гэж хэлж байсан?

-Тийм. 2008 оны есдүгээр сард Эрүүгийн хуульд нэмэлт өөрчлөлт оруулсан. Энэ нэмэлт өөрчлөлтөд орсон хуулиар тэдэнд холбогдох хэргийг хэрэгсэхгүй болгосон байдаг. Гэвч хэргийг сэргээн шалгасан нь цагдаагийн экс дарга нарыг үндэслэлгүйгээр эрүүгийн хариуцлагад татсан гэж ойлгож болно.

-Тэгэхээр хэргийг сэргээн шалгасан нь хууль бус үйлдэл гэх гээд байна уу?

-Тийм. Өршөөлийн хуулийн гол онцлог нь түүний дагуу шийдвэрлэгдсэн асуудлыг дахин сэргээх боломжгүй байдаг. Монгол Улсад өршөөл үзүүлж ирсэн практикийг судлахад өршөөл үзүүлсэн шийдвэрээ цуцлан, хүчингүй болгосон, эргээд ял оногдуулсан жишиг, тохиолдол байдаггүй. Тэгэхээр долдугаар сарын 1-ний хэргийг сэргээн шалгасан нь Монгол Улсад гарч буй анхны тохиолдол болж байна.

-Сэргээн шалгасан нь энэ хэргийг улс төржүүлж байна гэж ойлгож болох уу?

-Мэдэхгүй юм. Өнгөрсөн жилүүдэд хэрэгт хяналт тавьсан байгууллагуудаас удаа дараа миний үйлчлүүлэгчдийг гэм буруутай мэт ярьж байсан. Гэм буруутай эсэх нь тогтоогдоогүй байхад шүү дээ. Энэ бүхнийг хараад хууль бус үйл ажиллагааных нь нэг хэсэг гэж бодож байна.