Манай улсын иргэн Ш.Алтантуяа Малайз улсад хэрцгийгээр амиа алдсанаас хойш хэдийнээ зургаан жил өнгөрчээ. Энэ хооронд Монголын төр түүнийг мартав бололтой. Учир нь Ш.Алтантуяагийн аав С.Шаарийбуу саяхан “Хүнээ хүний дайтай авч яваач ээ, төр засаг минь. Удахгүй Малайзын сонгууль болно. Би Малайзын сөрөг хүчинд зүтгэдэг хүнийг өмгөөлөгчөөр авчихсан байгаа. Сөрөг хүчин гарчихвал миний охиныг хэрэг шийдэгдэх байх” хэмээн мэдэгдлээ. Тэрээр охиныхоо хэргийг шийдүүлэхээр зургаан жил хөөцөлдсөн ч төр засаг анхааралдаа аваагүйд гомдон, ийм шийдэлд хүрчээ.
  Мөн хэрэг гарсны дараахан “Манай төр засаг, Засгийн газар, УИХ хүнийхээ төлөө нэг ч зүйл хийдэггүй. Хүнээ малаасаа дор авч үздэг ийм төртэй байгаад гутарч байна” гэж мэдэгдэж байсан. Хэргийг сануулбал, 2006 оны арваннэгдүгээр сарын 9-ний пүрэв гаригт Монгол Улсын иргэн 28 настай Ш.Алтантуяаг Малайзын Силангор мужийн Субан Дам хэмээх ойд толгой руу нь буудаж хороогоод, цогцсонд нь тэсрэх бодис хоёр ширхэгийг бэхэлж дэлбэлсэн хэрэг гарч байсан юм. Хэргийн газар талийгаачийн ясны хэдэн хэлтэрхий үлдсэнээр цагдаа нар хэргийг ирүүлсэн байдаг.
    Энэ аймшигт хэргийг Малайзын нэртэй улс төр судлаач, 40 настай Абдул Разак Багинда захиалгаар үйлдсэн нь тогтоогдсон. Гэвч түүний шүүх хуралд Малайз улсын шүүгч “Бид чинь шашинтай улс шүү дээ. Би Аллах тэнгэрээсээ нэг юм асууя” хэмээн арван минут болсны эцэст “Багинда энэ хэрэгт холбоотой нь нотлогдохгүй байна. Аллах тэнгэр ингэж хэллээ” хэмээн цагаатгах тогтоолыг уншиж танилцуулсан байдаг. Гэтэл уг шүүх хуралд Монгол Улсын Засгийн газрыг төлөөлж нэг ч эрхэм байгаагүй юм.
  Хурлын дараа Малайз улсын нэгэн иргэн шүүхийн шийдвэрийг эсэргүүцэн Ш.Алтантуяагийн зураг нэртэй футболкны ард “Алуурчдыг там руу илгээе” хэмээн бичиж, хэдэн мянган ширхэгийг тарааж байжээ. Малайз улсад нөхцөл байдал хурцдаж байсан тэр үед Монголын төр хааяа л нэг дипломат үгтэй мэдэгдэл гаргаж, ажиглагчийн байр суурьнаас хандаж байлаа. Монголын төр иргэнээ яагаад мартана вэ?