-
2016 оны 1 сарын 21
Нийслэлийн Засаг даргын Тамгын газар, Улаанбаатар хотын Худалдааны танхимтай хамтран “Улаанбаатар худалдан авалт - 2016” бизнес чуулга уулзалтыг зохион байгууллаа. Чуулга уулзалтад нийслэлийн ИТХ-ын төлөөлөгчид, нийслэлийн Нутгийн захиргааны байгууллагын удирдлагууд, Улаанбаатар хотын Худалдааны танхимын гишүүд, Олон улсын байгууллагын төлөөлөгч, Үндэсний баялаг бүтээгчид, хөрөнгө оруулагчид зэрэг 1000 гаруй төлөөлөгч оролцов.
Чуулга уулзалтаар ”Улаанбаатар хот - хөрөнгө оруулалт 2016”, ”Ногоон худалдан авалт”, ”Төр, хувийн хэвшлийн түншлэл”, “Найрсаг Улаанбаатар” хөтөлбөр, ”Улаанбаатар хотын Худалдааны танхимын дэргэдэх Арбитр”, ”Хог хаягдлын менежментийг сайжруулах эко парк төсөл”, “Эко Улаанбаатар”, ”Нийслэлийн концессын худалдан авалт”, “Улаанбаатар хотын хөгжлийн корпораци” ХК ба төр хувийн хэвшлийн түншлэл, ”Нийслэлийн орон сууцны төсөл, хөтөлбөр, хувийн хэвшлийн оролцоо” зэрэг илтгэлүүдийг танилцуулав.
Нийслэлийн Засаг даргын Санхүү, эдийн засгийн асуудал хариуцсан орлогч Н.Батаа “Улаанбаатар хот – хөрөнгө оруулалт 2016” илтгэлдээ “Нийслэл энэ онд 427 тэрбум төгрөгийн хөрөнгө оруулалт хийнэ. Үүнээс нийслэлийн төсвөөр 203.5 тэрбум, Хөгжлийн банкнаас нийслэлд хэрэгжүүлэх төслүүдэд 120 тэрбум төгрөг, орон нутаг болон улсын төсвөөр 103.4 тэрбум төгрөгийн хөрөнгө оруулалт хийх юм. Бүтээн байгуулалтын ажлуудаа хувийн хэвшилтэй хамтран гүйцэтгэж, бизнес эрхлэгчдээ дэмжиж ажиллах нь чухал” гэдгийг дурьдлаа.
Нийслэлийн төсвийн хөрөнгө оруулалтаар 203.5 тэрбум төгрөгийн ажлуудыг гүйцэтгэнэ. Үүнд:
Хот байгуулалтын салбар - 59.3 тэрбум төгрөг
Авто замын салбар - 55.1 тэрбум төгрөг
Нийгмийн салбар - 31.7 тэрбум төгрөг. Үүнээс боловсролын салбарт 53 цэцэрлэг, 26 сургууль, 42 бага сургууль, цэцэрлэгийн цогцолбор барилга барьж, 10 цэцэрлэг, 12 сургуулийн их засварын ажлыг 24.8 тэрбум төгрөгөөр гүйцэтгэнэ. Харин эрүүл мэндийн салбарт 2.1 тэрбум төгрөгөөр Баянзүрх, Баянгол дүүрэгт 100 ортой эрүүл мэндийн төв, Чингэлтэй, Баянгол дүүрэгт 200 ортой хүүхдийн эмнэлэг, Чингэлтэй дүүрэгт Түргэн тусламжийн төвийн салбар пункт, Баянзүрх дүүрэгт 100 ортой амаржих газар барьж, түргэн тусламжийн 10 автомашин худалдаж авахаар төлөвлөжээ.
Инженерийн дэд бүтэц - 12.9 тэрбум
Нийтийн тээврийн салбар - 11.3 тэрбум
Хот тохижилтийн салбар - 7.5 тэрбум
Төр захиргааны салбар - 6.1 тэрбум
Бусад 19.1 тэрбум төгрөгийн хөрөнгө оруулалт хийнэ. Эдгээр бүтээн байгуулалтын ажлыг хувийн хэвшлийнхэнд санал болголоо.
Энэ үеэр нийслэлийн Засаг дарга бөгөөд Улаанбаатар хотын Захирагч Э.Бат-Үүл “Улаанбаатар хотын захиргаа цаашид төсвөөс мөнгө гаргаж, байшин барилга барих бус хувийн хэвшлээ дэмжиж ажиллахыг зорьж байна. Тодруулбал, хувийн хэвшлийнхэн өөрсдийн хөрөнгө оруулалтаар хотын дэд төвүүдийг барьчихвал тухайн барилга, байгууламжийг нийслэл 100 жилээр түрээслэх боломжтой” гэдгийг онцоллоо. Мөн хувийн хэвшлийн хөрөнгө оруулалтаар сургууль, цэцэрлэг, ногоон байгууламж барих зэргийг хот бүхий л талаар дэмжих юм. Өөрөөр хэлбэл, тухайн барьсан сургуулийг хэн нэгэн хувь хүний нэрэмжит болгох, газар олголтыг шийдэх зэргээр хамтран ажиллах боломжтой гэдгийг мэдэгдэв.
Чуулга уулталын үеэр нээлттэй хэлэлцүүлэг явуулж, нийслэлийн удирдлагууд оролцогчдын асуултад хариулт өгөв. Улаанбаатар хотын Худалдааны танхим байгуулагдсанаас хойш аж ахуйн нэгжүүд нийслэлтэй хамтран ажиллахад харьцангуй хялбар, хүнд суртал багатай болсон гэдгийг бизнес эрхлэгчид дуулгалаа. Гэхдээ дунд шатанд гардаг хүндрэл, бэрхшээл их хэвээр байгаад шүүмлэлтэй хандаж байгаа юм. Энэ талаар нийслэлийн Засаг даргын Хот байгуулалт, хөрөнгө оруулалтын асуудал хариуцсан орлогч С.Очирбат “Нийслэлийн зүгээс дунд шатанд гардаг хүндрэлийг арилгах талаар бүхий л хүчээ дайчлан ажиллаж байна. Тухайлбал, өнгөрсөн хугацаанд газар олгоход гардаг байсан хүндрэлүүдийг бүрэн шийдэж, цахим газар олголтыг эхлүүлсэн. Мөн “Дүнжингарав” худалдааны төвд “Нийслэлийн үйлчилгээний нэгдсэн төв”-ийг байгуулсан юм. Нээлтийн өдөр нэг иргэн найман нэрийн барааны дэлгүүрийн зөвшөөрөл авч, 1000 төгрөгийн үйлчилгээний хураамж төлөөд л асуудлаа бүрэн шийдүүлсэн. Үйлчилгээ авсан иргэд “Үнэхээр ингээд л болчихож байгаа юм уу” гээд итгэж ядах байдалтай байсан. Цаашид яг л ийм үйлчилгээг нэвтрүүлэх нь нийслэлийн зорилт болно. Дараагийн удаад “Нийслэлийн үйлчилгээний нэгдсэн төв”-ийг “Мишээл экспо” худалдааны төв, Сонгинохайрхан дүүрэг “Драгон” төв орчимд байгуулахаар ажиллаж байна” гэв.
“Улаанбаатар худалдан авалт-2016” чуулга уулзалтын үеэр Улаанбаатар хотын захиргаа, Монголын Барилгын Үндэсний Ассоциаци, “Баярс констракшн” ХХК, Монголын Аялал Жуулчлалын холбоо, Улаанбаатар хотын Худалдааны танхимтай хамтран ажиллах санамж бичиг байгууллаа гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.
-
2016 оны 1 сарын 21
Төрийн албан хаагчдын хувийн ашиг сонирхлын болон хөрөнгө, орлогын мэдүүлгийг бүртгэх, хадгалах, хянах чиг үүргийг хэрэгжүүлдэг албан тушаалтнууд төрийн захиргааны болон нутгийн захиргааны төв байгууллагуудад ажилладаг бөгөөд тэдгээрийг эрх бүхий албан тушаалтан /ЭБАТ/ хэмээн нэрлэдэг юм. Авлигатай тэмцэх газраас зохион байгуулсан семинарын үеэр Сүхбаатар, Дорнод аймгийн, мөн Зам тээврийн яамны ЭБАТ-уудтай ярилцав.
Ж.Жаргалсайхан: ЭБАТ-ын ажлын утга учир бол төрийн албан хаагчдыг авлигын эрсдлээс хамгаалах юм
Сүхбаатар аймгийн ИТХ-ын нарийн бичгийн дарга, эрх бүхий албан тушаалтан Ж.Жаргалсайхантай ярилцав.
-Та Сүхбаатар аймгийн ИТХ-ын хэмжээнд хэчнээн мэдүүлэг гаргагчийг хариуцаж ажилладаг вэ?
-2012 оноос эхлэн аймаг, сумын бүх шатны ИТХ-ын 336 төлөөлөгчийн материалыг салбар ЭБАТ-уудын бүрдүүлсний дагуу хянаж, арга зүйн зөвлөгөө өгч ажиллаж байна. ЭБАТ-ын ажлын утга учир бол төрийн албан хаагчдыг авлигын эрсдлээс хамгаалах юм. Түүнчлэн төрийн албан хаагчдынхаа нэр төрийг хамгаалах нь бидний ажлын гол зорилго байх ёстой.
-Таныг ЭБАТ-аар ажиллаж байх хугацаанд мэдүүлгийг бүртгэх, хадгалах, хянах, олон нийтэд мэдээлэхтэй холбоотой ямар нэгэн зөрчил гарч байв уу?
-Том хэмжээний зөрчил бол гарч байгаагүй. Гэхдээ нэгэнт харилцаа үүсч байгаа учраас ямар нэгэн асуудал тохиолдож байна. Зарим сумын ИТХ-ын төлөөлөгчдийн хувьд мэдүүлэг гаргахын ач холбогдлыг ойлгохгүй тал бий. Мэдүүлэг гаргах байтугай Авлигын эсрэг хууль байдгийг ч мэдэхгүй хүн төлөөлөгчөөр сонгогдож байна. Ийм хүмүүс мэдүүлгээ буруу, дутуу гаргана, бүр гаргахгүй байсан ч удаатай. Эхний жилдээ иймэрхүү хүндрэл гарч байсан бол одоо үүргээ ухамсарладаг болсон. Энэ талын сургалтыг ч бидний зүгээс хангалттай хийсэн.
-Сонирхлын зөрчлийн хууль хэрэгжсэнээр ЭБАТ-уудын ажлын хүрээ нэлээд өргөжсөн. Энэ хуульд нийцүүлж УИХ-ын байнгын хорооноос тогтоол гарган хэрэгжүүлж байгаа. Эдгээр хууль тогтоомжуудыг газар дээр нь хэрэгжүүлж байгаа ЭБАТ-ын хувьд ямар санал сэтгэгдэлтэй байдаг вэ?
-Нийтлэг харагддаг асуудал гэвэл төрийн албан хаагчид маань өөртөө үйлчлэх хууль эрх зүйн актуудаа судалдаггүй. Хувь хүн өөрөө санаачилга гаргаж судлах ёстой шүү дээ. Бидний ажилд хамгийн их хүндрэл учруулдаг зүйл нь энэ. Тиймээс зориуд хөрөнгө гаргаж, сурталчилгааны ажил заавал хийх шаардлагатай болдог. Тиймээс гарч байгаа хууль тогтоомж, дүрэм журам, тушаал шийдвэрийн өөрчлөлтийг ЭБАТ-ууд бид өөрсдөө хамгийн түрүүнд уншиж, танилцаж, судалж мэдэх ёстой. Үүнийгээ эзэмшсэн байх ёстой.
-УИХ-ын Хууль зүйн байнгын хорооны тогтоолоор нэлээд олон хүнийг мэдүүлэг гаргагчдын жагсаалтаас хассан. Үүнийг та юу гэж үздэг вэ?
-Энэ бол их зөв шийдвэр болсон. Бид энэ асуудлаар өмнө нь санал гаргаж хэлдэг байсан. Яг тэр хэлж ярьж байсан албан тушаалтнууд хасагдсан байна лээ. Одоо бол яг ИТХ-ын түвшинд сонгогдсон төлөөлөгчдөөс мэдүүлэг авах нь зүйтэй. Тэд их бага ямар нэгэн хэмжээгээр хүний эрх ашигтай холбоотой, хөрөнгө мөнгөтэй холбоотой шийдвэр гаргахад наад зах нь гар өргөж батлалцаж байгаа учраас үүнийхээ төлөө хариуцлага хүлээх учиртай.
Д.Жавхлан: АТГ-тай маш ойр харилцаж ажилладаг
Зам тээврийн яамны Хууль зүйн хэлтсийн ахлах мэргэжилтэн, эрх бүхий албан тушаалтан Д.Жавхлантай ярилцав. Тэрээр төрийн албанд арав гаруй жил ажиллаж байгаа бөгөөд сүүлийн 7 жилд нь АТГ-ын ЭБАТ-аар ажиллаж байна.
-Та АТГ-аас зохион байгуулдаг ээлжит сургалтад оролцлоо. Энэ сургалтын ач холбогдлыг юу гэж үздэг вэ?
-Жил бүр ЭБАТ-ыг давтан сургах, мэргэшүүлэхэд чиглэсэн арга хэмжээ гэж ойлгодог. Төрийн албан хаагчдын хувийн ашиг сонирхлын болон хөрөнгө, орлогын мэдүүлгийг бүртгэж авах ажлыг гүйцэтгэдэг бидний хувьд хууль тогтоомжийг үр дүнтэй хэрэгжүүлэх чиглэлээр АТГ-аас байнга арга зүйн зөвлөгөө, туслалцаа авах шаардлагатай байдаг. Зарим хууль шинээр батлагдсантай холбогдуулан, мөн хууль тогтоомжийн нэмэлт, өөрчлөлттэй уялдуулан мэдлэг, ойлголтоо улам нэмэгдүүлж, энэ удаагийн сургалтаас илүү олон зүйлийг таньж мэднэ гэж найдаж байна.
-Зам тээврийн салбарын хэмжээнд хэчнээн мэдүүлэг гаргагч байдаг вэ?
-Салбарын хэмжээнд 400 гаруй мэдүүлэг гаргагч бий. Зам тээврийн яаманд 130 орчим мэдүүлэг гаргагч байгаа.
-ЭБАТ-аар ажиллаж байхад ямар нийтлэг асуудал, бэрхшээл тохиолдож байна вэ?
-Төрийн албан хаагчид орлогынхоо хэмжээг гаргаж мэддэггүй. Хамаарал бүхий этгээд гэдэгт хэнийг оруулах вэ гэдгээ бас мэддэггүй. Тэр байтугай нэг гэр бүлийн гишүүн гэдэг ойлголтоо мэдэхгүй ч байх нь бий. Мөн хувь хүн, хуулийн этгээдтэй холбогдсон харилцаагаа ялгаж салгадаггүй. Энэ бүхнийг төрийн албан хаагч нэг бүрт таниулж, ойлгуулж ажилладаг.
-АТГ-тай хэр ойр хамтарч ажилладэг вэ?
-Сүүлийн жилүүдэд хамтарч ажиллаж байгаа, маш ойр харилцаж ажилладаг. Ойлгомжгүй зүйл гарахад манай салбарыг хариуцсан АТГ-ын ажилтантай тухай бүр холбогдож арга зүйн заавар зөвлөгөөг шуурхай авдаг. Ямар нэгэн саад бэрхшээл, хүндрэл чирэгдэл гардаггүй.
Э.Нандин-Эрдэнэ: Мэдүүлгийг цахимаар авах нь бидний ажлын ачааллыг хөнгөлж байна
Дорнод аймгийн Төрийн захиргаа, удирдлагын хэлтсийн Сум орон нутаг хариуцсан мэргэжилтэн, эрх бүхий албан тушаалтан Э.Нандин-Эрдэнэтэй ярилцав. Тэрээр аймагтаа авлигатай тэмцэх үйл ажиллагааг 2007 оноос хэрэгжүүлж байгаа юм.
-Одоогийн байдлаар нийт хэчнээн мэдүүлэг гаргагчийг хариуцан ажиллаж байна вэ?
-Анх Хууль зүйн байнгын хорооны 5 дугаар тогтоолоор 480 гаруй мэдүүлэг гаргагчийг хариуцан ажиллаж байсан. Одоо 20 дугаар тогтоолын дагуу 192 төрийн албан хаагчийн хөрөнгө, орлогын мэдүүлгийг бүртгэх, хадгалах, хянах ажлыг гүйцэтгэж байна.
-ЭБАТ-аар ажиллахад ямар хүндрэл бэрхшээл тулгарч байна вэ?
-Хүндрэл бэрхшээл гэх юм бол нийтлэг байдлаар бид сургалт семинарт хамрагдах үеэрээ ярьж хэлдэг зүйл байна. Бид мэдүүлэг бүртгэх, хадгалах, хянахаас гадна авлигаас урьдчилан сэргийлэх үйл ажиллагааны төлөвлөлтийг давхар хариуцаж байгаа. Энэ нь нэлээд ажлын ачаалал үүсгэж байна. ЭБАТ-ын ажил бол бидний үндсэн гол ажил биш. Хавсарч хийдэг учраас ачаалал ихтэй. Ялангуяа мэдүүлэг бүртгэж байгаа яг энэ цаг мөчид орон нутагт тайлан мэдээ авах, нэгтгэх, дараа оныхоо ажлыг төлөвлөх, сум, агентлагийн ажлыг дүгнэх зэрэг ажлуудтай давхацдаг учраас цаг хугацааны хувьд нэлээд ачаалалтай байдаг.
-ХОМ бүртгэх хуулийн хугацааны хувьд асуудал байна гэсэн үг үү?
-Тийм. Яг энэ хугацааны хувьд ачаалалтай байдаг.
-ЭБАТ-ын ажлыг анхнаас нь хийж ирсэн туршлагатай хүний хувьд орон нутагт мэдүүлэг гаргагчидтай харилцаж ажиллахад ямар хандлага илүүтэй ажиглагдаж байна вэ?
-Анх 2006 оноос мэдүүлэг авч байхад бэрхшээлтэй байсан. Төрийн албан хаагчид маань хуулийнхаа цар хүрээ, ач холбогдлыг ойлгодоггүй, мэдүүлэх үүргээ мэддэггүй, зарим нь хөрөнгө орлогынхоо тодорхой хэсгийг зориуд нуух, үнэн мэдүүлбэл эргээд би татварын дарамтад орно гэсэн байдлаар ханддаг байсан. Сүүлийн жилүүдэд ийм хандлага байхгүй болсон. Ер нь бол төрийн албан хаагчид мэдүүлэх үүргээ ухамсарладаг болсон.
-ЭБАТ-аар ажиллах хугацаанд мэдүүлгийн бүртгэх, хянахтай холбоотой ямар зөрчил илэрч байсан бэ?
-2009 оноос хойш манай аймгийн хэмжээнд хөрөнгө, орлогын мэдүүлэгтэй холбоотой зөрчил гараагүй. Түүнээс өмнө манай аймгийн Засаг даргаар ажиллаж байсан хүнтэй холбоотой асуудал гарсан. Энэ нь тухайн албан тушаалтны хуулийн талаарх ойлголт буруу байснаас үүдсэн зөрчил.
-ЭБАТ-ы хийдэг бас нэг ажил нь сургалт, сурталчилгаа байдаг. Энэ чиглэлээр аймагтаа ямар ажил зохион байгуулж байгаа вэ?
-Өмнө нь би Хууль зүйн хэлтсийн мэргэжилтэн байхдаа сургалт, сурталчилгааг хариуцдаг байсан. Энэ хүрээндээ авлигын эсрэг хууль тогтоомжийн талаарх сургалтыг хийх боломжтой байсан. Одоо харин орон нутаг хариуцаж ажиллахад сургалт, сурталчилгааны ажил заримдаа орхигдох гээд байдаг. 2015 онд Төрийн албаны зөвлөлтэй хамтран төрийн албаны болон сонирхлын зөрчлийн хууль тогтоомжийн асуудлаар сумын 300 гаруй албан хаагчийг хамруулж зохион байгуулсан. Аймагтаа салбар ЭБАТ-ууддаа сургалтыг байнга өгч байгаа. Манай аймгийн нэг онцлог нь жилд 2 удаа бүх сумыг хамруулан шалган туслах ажил хийдэг. Энэ үеэрээ сургалт хийж, арга зүйн заавар зөвлөгөө өгч ажилладаг.
-Хөрөнгө, орлогын мэдүүлгийг цахимаар авдаг болсон. Энэ нь орон нутагт хэр ахицтай байна вэ?
-Энэ нь бидний ажлын ачааллыг тодорхой хэмжээгээр хөнгөлж байгаа.
-АТГ орон нутагт салбаргүй. Тиймээс орон нутаг дахь төрийн албан хаагчдын хөрөнгө, орлогын мэдүүлгийг бүртгэх, хадгалах, хянах үйл ажиллагааг ЭБАТ-уудаар дамжуулан хэрэгжүүлдэг. Энэ ажлыг Та хэр үр дүнтэй гэж үздэг вэ?
-Бидний хувьд үндсэн чиг үүргийнхээ зэрэгцээ АТГ-ын ЭБАТ-ы ажлыг давхар гүйцэтгэдэг учраас зарим тохиолдолд хүч мөхөсддөг тал бий. УИХ-ын Хууль зүйн байнгын хорооны 20 дугаар тогтоолоор ТЗ-5 зэрэглэлийн албан тушаалтнуудаас мэдүүлэг авахгүй болсон. Миний хувьд өөрөөсөө дээш зэрэглэлийн албан тушаалтнуудаас мэдүүлэг авдаг. Асуудал хааяа гарна. Тиймээс Засгийн газрын 2007 оны 354 дүгээр тогтоолд өөрчлөлт оруулж, ЭБАТ-уудын шатлалыг ахиулж өгвөл зүгээр санагддаг.
-
2016 оны 1 сарын 21
Авлигын эсрэг хууль, Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийн үйлчлэлд хамаарах албан тушаалтнуудаас 2015 оны хувийн ашиг сонирхлын болон хөрөнгө, орлогын мэдүүлгээ шинэчлэн гаргах ажил улсын хэмжээнд зохих журмын дагуу үргэлжилж байна.
Монгол Улсын Ерөнхийлөгч, Улсын Их Хурал, Засгийн газраас томилогдсон төрийн өндөр, тэдгээртэй зэрэг зиндаа адилтгах 274 албан тушаалтан Авлигатай тэмцэх газарт, бусад мэдүүлэг гаргагч 40 мянга орчим албан тушаалтан харьяа байгууллагын мэдүүлгийг бүртгэх, хянах, хадгалах эрх бүхий албан тушаалтанд 2016 оны 2 дугаар сарын 15-ны дотор мэдүүлгээ бүртгүүлэхээр хууль тогтоомжид заасан.
2016 оны 1 дүгээр сарын 20-ны өдрийн байдлаар 10 мянга орчим албан тушаалтан https://meduuleg.iaac.mn системд нэвтрэн мэдүүлж, зохих шатны байгууллагын мэдүүлгийг бүртгэх, хянах, хадгалах эрх бүхий албан тушаалтанд цаасан хэлбэрээр бүртгүүлээд байна.
Энэ жилийн хувьд сар шинийн баяр 2 дугаар сарын 8-11-ний өдрүүдэд тохиож буй тул хувийн ашиг сонирхлын болон хөрөнгө, орлогын мэдүүлгээ яаравчлан бүртгүүлэхийг Авлигатай тэмцэх газраас төрийн албан хаагчдад болон мэдүүлэг гаргагч нарт анхааруулж байна.
-
2016 оны 1 сарын 21
ХУД-инй нутаг То вангийн гудамж, “Хан уул тауэр” барилгын зүүн замд Benz маркийн авто машины жолооч нь явган зорчигч 27 настай эмэгтэй Ж-г мөргөж гэмтээн хэргийн газрыг орхиж явсан илрүүлэн шалгаж байна.
Хөдөө орон нутагт Өмнөговь аймгийн Баяy овоо сум Могойт багийн нутаг Ухаа худгийн уурхайгаас Гашуун сухайт хилийн боомт хүртэлх хатуу хучилттай авто замд Х.Грейс маркийн авто машины жолооч М нь Nord Веnz маркийн Т жолоочтой авто машинтай мөргөлдөж зорчигч 29 настай эрэгтэй Д нас барсан.
-
2016 оны 1 сарын 21
Авлигатай тэмцэх газраас томилогдсон ажлын хэсэг авлига, ашиг сонирхлын зөрчлийн эсрэг хууль тогтоомжийн хэрэгжилттэй газар дээр нь танилцах, ашигт малтмалын салбартай холбогдох гомдол, мэдээллийг судлан үзэх, мөрдөн байцаагчаас хүргүүлсэн мэдэгдлийн мөрөөр ажиллах, авлигын эсрэг үйл ажиллагааны үр дүнг дээшлүүлэхэд чиглэсэн арга хэмжээг авах, арга зүйн удирдлагаар хангах зорилгоор Ашигт малтмалын газарт ажиллаж эхэллээ.
Ажлын хэсэг тус газрын удирдлагаас гаргасан аливаа шийдвэр, төлбөр, хураамж тогтоосон баримт бичиг, хууль тогтоомжид заасан хориглолт, хязгаарлалтыг баримтлан ажиллаж буйтай танилцаж, дүрэм, журам, зааврыг хянан үзэхийн зэрэгцээ орон нутагт гарч байгаа бичил уурхайн олборлолттой холбогдох гомдол, мэдээллийн талаар холбогдох асуудлыг судлан үзэх юм байна.
Түүнчлэн Авлигатай тэмцэх газрын Мөрдөн байцаагчаас хүргүүлсэн мэдэгдлийн мөрөөр авч хэрэгжүүлсэн арга хэмжээтэй танилцаж, шаардлагатай тайлбар, тодруулга авах, мэдээлэл гаргуулахаар ажиллаж байна.
Авлигатай тэмцэх газрын ажлын хэсэг Ашигт малтмалын газарт ажиллах үеэр тус салбартай холбоотой санал хүсэлт, гомдол мэдээллээ Авлигатай тэмцэх газрын 18001969 дугаарын утсаар болон атг.мон цахим хуудсаар өгч болох юм.
САНАЛ СЭТГЭГДЭЛ БИЧИХ
Үсэг тэмдэгтийн тоо: 1000
НИЙТ САНАЛ СЭТГЭГДЭЛ: 0
-
2016 оны 1 сарын 21
2016 оны 01 дүгээр сарын 20-ны өдөр Улаанбаатар хотын Замын цагдаагийн газрын ЖШУХ дээр нийт дуудлага мэдээ мэдээлэл 329 хүлээн авснаас зам тээврийн ослын 275 дуудлага бүртгэгдсэн байна. Үүнээс ХАБАЖЭГХэрэг 7 бүртгэгдэж 7 хүн хүнд хөнгөн гэмтсэн үүнээс жолооч-0, явган зорчигч-6, зорчигч-1. Хүүхэд зам тээврийн осолд өртсөн 0 үүнээс сургуулийн өмнөх насны , сургуулийн насны0, согтууруулах ундааны зүйл хэрэглэсэн үедээ хөдөлгөөнд оролцож осолд өртсөн жолооч 0, явган зорчигч 0. Согтуугаар тээврийн хэрэгсэл жолоодсон 57 жолоочийг журамлан гарч болзошгүй осол хэргээс урьдчилан сэргийлсэн.
-
2016 оны 1 сарын 21
УИХ-ын Төрийн байгуулалтын байнгын хороо, Нийслэлийн ИТХ-тай хамтран Төр, сүм хийдийн харилцааны эрх зүйн орчинг боловсронгуй болгох нь сэдвээр хэлэлцүүлэг зохион байгууллаа. Хэлэлцүүлэгт УИХ-ын Төрийн байгуулалтын байнгын хорооны дарга болон гишүүд, НИТХ-ын ажлын алба, нийслэл хотод үйл ажиллагаа явуулж байгаа сүм хийдүүдийн төлөөлөл, энэ чиглэлээр судалгаа явуулдаг ТББ-ын төлөөлөл оролцлоо.
УИХ-аас 1993 онд “Төр сүм хийдийн харилцааны тухай” хуулийг баталж тус хуульд 1994, 1995, 1997, 2014, 2015 онуудад өөрчлөлт оруулж байсан байна.
Энэхүү хуульд сүм хийд байгуулах иргэдээс гаргасан өргөдлийг дүрмийн хамт аймаг, НИТХ хянан үзэж зөвшөөрөл олгох эсэхийг шийдвэрлэнэ гэж заасан байдаг. Тиймээс нийслэлийн ИТХ-аас 2005 онд “Нийслэлийн нутаг дэвсгэрт шинээр шашны байгууллага байгуулах үйл ажиллагаа явуулахад зөвшөөрөл олгох журам”-ыг баталсан байна. Эдгээр хууль тогтоомжийн хүрээнд НИТХ-аас шашны байгууллагуудтай холбоотой харилцааг зохицуулсаар ирсэн ч цаашид хууль эрх зүйн орчинг шинэчлэх зайлшгүй шаардлага байгаа талаар хэлэлцүүлгийн үеэр НИТХ-ын Тэргүүлэгчдийн нарийн бичгийн дарга Б.Энхболд хэллээ.
Тодруулбал, НИТХ-аас баталсан журмыг агуулга болон нэр томъёоны хувьд шинэчлэх хэрэгцээтэй байгаагаас гадна хэрэгжүүлэх үйл ажиллагааг илүү тодорхой болгох шаардлагатай болжээ.
Өнөөдрийн байдлаар нийслэлд албан ёсны зөвшөөрөлтэй 296 шашны байгууллага үйл ажиллагаа явуулж байгаагаас буддын 99, христийн 162, Бөө мөргөлийн 21, католик 7, муслам 2, бахит шүтлэгийн 1, шинто 1, хинди 1, мүүний 2 сүм байдаг байна.
Эдгээр байгууллагуудын үйл ажиллагаанд шалгалт хийхэд сүм хийд нь галын болон бусад аюулгүй байдлыг бүрэн хангаагүй, агааржуулах системгүй, өвлийн улиралд халаалтгүй, эрүүл ахуйн шаардлага хангаагүй орчинд хоол хийж тараах, аялал жуучлал, бизнес, оюутны гэх мэт чиглэлээр монголд түр оршин суух зөвшөөрөл авсан гадаадын иргэд шашны үйл ажиллагаа гардан хэрэгжүүлэх, татвараас зайлсхийх, зөвшөөрлөө сунгуулахгүйгээр үйл ажиллагаагаа явуулах, дур мэдэн салбар байгуулах гэм мэт нийтлэг зөрчил ихээр илэрдэг байна. Мөн ийм зөрчил гаргасан сүм хийдүүдэд хэрхэн, ямар хэлбэрийн хариуцлага тооцох нь тодорхойгүй байсаар байгааг хэллээ.
Хэлэлцүүлгийн үр дүнд төр, сүм хийдийн харилцааг сайжруулахад салбар бүрийн төлөөллийн саналыг авч нэтгэх боломж бүрдэнэ гэж зохион байгуулагчид онцолж байна гэж НИйслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.
-
2016 оны 1 сарын 21
“Макс” продакшны жүжигчин М.Баярмагнай нутаг нэгтнээсээ 100 сая төгрөг залилжээ.
-
2016 оны 1 сарын 21
Нийслэлийн Хан-Уул дүүргийн 12 дугаар хорооны нутаг Биокомбинатын ... тоотод оршин суудаг иргэн Ж /45 настай, эрэгтэй/ гараашдаа “Huyndai Porter” автомашинаа халаахаар ил гал түлснээс гал алдаж, гарааш болон “Mustang-5” мотоциколь шатжээ.
-
2016 оны 1 сарын 21
Сар шинийн баяр болох гэж буйтай холбогдуулан хуурамч архитай тэмцэх талаар цагдаагийн байгууллага мэргэжлийн хяналтын газартай хамтран ажиллаж байгаа.
-
2016 оны 1 сарын 21
Энэ сарын сүүлээр нийт нутгаар хүйтний эрч чангарах төлөвтэй байгаа ажээ. Ойрын хоногуудад баруун болон төвийн бүсийн нутгаар цас орно.
-
2016 оны 1 сарын 21
Прокурорын удирдах ажилтнуудын зөвлөгөөн өнгөрсөн өдрүүдэд болж өндөрлөв. Энэ үеэр Сэлэнгэ аймгийн прокурор Ж.Мөнхжаргалаас зарим зүйлийг тодрууллаа.
-Прокурорууд өнгөрсөн онд хийсэн ажлаа тайлагналаа. Сэлэнгэ аймгийн хувьд өнгөрсөн онд хэр тайван байв?
-Сэлэнгэ аймгийн Прокурорын газар бусад аймгийнхныг бодвол онцлогтой. Хоёр сум дундын прокурорын газартай. Улсын ерөнхий прокурорын газраас 2015 онд дэвшүүлсэн зорилтоо амжилттай биелүүллээ. Өнгөрсөн онд Сэлэнгэ аймгийн хэмжээнд 793 хэрэгт шинээр эрүүгийн хэрэг үүсгэн шалгасан. Прокурорууд 1150 орчим хэрэгт хяналт тавьж ажиллалаа. Аймгийн хувьд гэмт хэргийн гаралт 3.8 хувиар өссөн дүнтэй гарсан. Үүний дотор анхаарал татаж байгаа хэрэг нь хүн амины хэрэг 2.5 дахин өссөн. ОХУ руу визгүй зорчдог болсонтой холбогдуулан иргэдийн дамжин өнгөрөх нэмэгдсэнээр хууль бус эд зүйлс хилээр нэвтрүүлэх гэмт хэрэг өсөх хандлагатай байгаа. Түүнчлэн согтуугаар үйлдсэн гэмт хэргийн тоо өсч 21.9 хувиар өссөн. Үүнийг дагаад хүн амины гэмт хэрэг өснө. Мөн бусдын биед хүнд гэмтэл учруулах, хулгайн гэмт хэргийн гаралт өссөн байна. Харин малын хулгай, эм бэлдмэл бодис хууль бусаар тээвэрлэх тохиолдол буурсан. Бид энэ онд Улсын ерөнхий прокурорын газраас дэвшүүлсэн зорилтыг хэрэгжүүлж ажиллана. Түүнээс гадна аймагтаа прокурорын ажилтнуудынхаа сахилга хариуцлага, ур чадварыг дээшлүүлэх зорилт тавин ажиллаж байна.
-Иргэд ямар төрлийн эд зүйлс хууль бусаар нэвтрүүлж байна вэ?
-Архи, согтууруулах ундаа, ургамлын тос, шампанск зэргийг маш их хэмжээгээр оруулж ирдэг. Гэхдээ орон нутгийн иргэдийг хөлсөлж хууль бус ажиллагаандаа татан оролцуулж байна. Хуулийн заалтыг шүүгч, прокурор, хэрэг бүртгэгч, мөрдөн байцаагч нар өөр өөрөөр хэрэглэж байгаагаас энэ төрлийн гэмт хэргийг шалгаж шийдвэрлэхэд хүндрэлтэй тал бий. Энэ асуудлыг удирдах ажилтны зөвлөгөөнд хэлж танилцуулсан.
-Сэлэнгэ аймагт оны өмнө валютын ченжийн амийг хөнөөсөн хэрэг гарсан. Энэ хэргийн шалгалт ямар шатандаа явж байна вэ?
-Алтанбулаг суманд ченжийн аминд хүрч, цогцсыг нь шатаасан хэрэг гарсан. Хэргийн мөрдөн байцаалт дуусч прокурорын хяналтад ирээд байна.
-Хэд хоногийн өмнө цэргүүд хилийн манаагаа орхиж оргосон. Уг хэрэг юунаас болж гарсан нь эцэслэн тогтоогдсон уу?
-Цэргийн ангийн үйл ажиллагаатай холбоогүй болох нь шалгалтын явцад тогтоогдсон. Хоёр цэргийн нэг нь эмнэлэгт байгаа. Нөгөөд нь цагдан хорих таслан сэргийлэх арга хэмжээ авсан. Прокурор байнгын хяналт тавьж, долоо хоног тутамд очиж уулзаж байгаа.
-
2016 оны 1 сарын 21
Нийслэлийн Засаг даргын “Нийтийн тээврийн үйлчилгээний сахилга хариуцлагыг дээшлүүлэх, хөдөлгөөний аюулгүй байдлыг хангах талаар авах зарим арга хэмжээний тухай” албан даалгаварыг хэрэгжүүлэх ажлын хүрээнд нийслэлийн Тээврийн газрын Авто тээврийн улсын байцаагчид, Улаанбаатар хотын Замын цагдаагийн албан хаагчид хамтран зорчигч тээврийн үйлчилгээ эрхлэгч аж ахуйн нэгжүүдэд авто тээврийн салбарт мөрдөгдөж байгаа хууль тогтоомж, түүнд нийцүүлэн гаргасан дүрэм, журам, стандартыг хэрхэн ханган ажиллаж байгаа талаар хяналт шалгалтыг хийж байна. Энэхүү ажлын хүрээнд автозамын зорчих хэсгийн нэгдүгээр эгнээгээр нийтийн тээврийн хэрэгслийг саадгүй зорчуулах, автобусны зогсоолд удаан зогсож байгаа автомашинуудад хяналт тавин ажиллаж 203 зөрчил гаргасан тээврийн хэрэгслийг баримтжуулж, хаягаар нь торгуулийн хуудсыг хүргүүлээд байгаа юм гэж нийслэлийн Тээврийн газраас мэдээллээ.
-
2016 оны 1 сарын 21
МОНГОЛЧУУД ЭНХ АМГАЛАН АМЬДРАЛААРАА ДЭЛХИЙД ҮЛГЭРЛЭХ БОЛОЛЦООТОЙ
-
2016 оны 1 сарын 21
Эрэн сурвалжилж байсан этгээдийг олжээ
-
2016 оны 1 сарын 21
ШӨХТГ хэвлэл мэдээлэлтэй хамтарч иргэдийг гэгээрүүлнэ
-
2016 оны 1 сарын 21
Авлигын эсрэг хууль, Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийн үйлчлэлд хамаарах албан тушаалтнуудаас 2015 оны хувийн ашиг сонирхлын болон хөрөнгө, орлогын мэдүүлгээ шинэчлэн гаргах ажил улсын хэмжээнд зохих журмын дагуу үргэлжилж байна.
-
2016 оны 1 сарын 21
Монгол Улсаас охид бүсгүйчүүдийг Малайзад худалдаалж байсан сүлжээг илрүүлжээ.
-
2016 оны 1 сарын 20
Нийслэлийн Өмч хувьчлах комиссын хурлаар Төрийн болон орон нутгийн өмчийн тухай хуулийн 43 дугаар зүйлийн тав дахь заалт, Худалдах худалдан авах гэрээний үүргээ биелүүлсэн Монгол Улсын иргэн З.Пүрэв-Очир, “Эко тунамал” ХХК, “Таван богд трейд” ХХК-д “Өмчлөгчийн эрхийн гэрчилгээ” олгох тухай асуудлыг хэлэлцэж шийдвэрлэжээ
Үүнд, Монгол Улсын иргэн З.Пүрэв-Очир нь худалдан авсан барилгын үнэ 4.320.000.000 /дөрвөн тэрбум гурван зуун хорин сая/ төгрөгийг бүрэн төлсөн тул Чингэлтэй дүүргийн 1 дүгээр хорооны нутаг дэвсгэрт байрлах “Шүд эрүү нүүрний эмгэг судлалын төв”-ийн барилгын өмчлөлийн эрхийг шилжүүлэн олгохоор болсон байна. Мөн “Эко тунамал” ХХК нь худалдан авсан барилгын үнэ 135.500.000 /нэг зуун гучин таван сая таван зуун мянган/ төгрөгийг бүрэн төлсөн тул Баянгол дүүргийн 17 дугаар хорооны Өрхийн эрүүл мэндийн төвийн хуучин барилгын өмчлөх эрхтэй болсон бол “Таван богд трейд” ХХК нь худалдан авсан барилгын үнэ 23.850.000 000 /хорин гурван тэрбум найман зуун тавин сая/ төгрөгийг бүрэн төлсөн тул Сүхбаатар дүүргийн наймдугаар дугаар хорооны нутаг дэвсгэрт байрлах “Улаанбаатар” сонины хуучин хэвлэх үйлдвэрийн барилгыг газрынх нь хамт өмчлөх эрхээ авчээ.
Өнгөрсөн онд хуучин хэвлэх үйлдвэрийн газрыг нээлттэй дуудлага худалдаанд оруулж, 24 тэрбумаар Абдул Карим гэгч Монголын иргэншилтэй гадаадын иргэн авсан ч, дараахан нь хэвлэх үйлдвэрийн худалдаж авахаасаа татгалзсан. Тиймээс дуудлага худалдааны журмын дагуу дараагийн саналыг хэлсэн “Таванбогд” групп 23.8 тэрбумаар авахаар болсон бөгөөд ийнхүү албан ёсоор тус группын өмчлөлд шилжээ.
-
2016 оны 1 сарын 20
“Улаанбаатар худалдан авалт - 2016” бизнес чуулга уулзалтын үеэр нийслэлийн Засаг даргын Тамгын газар, Монголын Барилгын Үндэсний Ассоциаци, “Баярс констракшн” ХХК-тай хамтран ажиллах санамж бичиг байгууллаа.
Монгол Улсын эдийн засаг, барилгын салбарын хөгжилд хамтын хувь нэмрээ оруулж, хамтын ажиллагааг шинэ шатанд гарган үр өгөөжийг дээшлүүлэх, цаашид харилцан ашигтай, тогтвортой хамтын ажиллагааг өрнүүлэх зорилгоор нийслэлийн Засаг даргын Хот байгуулалт, хөрөнгө оруулалтын асуудал хариуцсан орлогч С.Очирбат, Монголын Барилгын Үндэсний Ассоциацийн гүйцэтгэх Захирал Б.Нэмэхбаатар нар харилцан ойлголцлын санамж бичигт гарын үсэг зурав.
Санамж бичгийн хүрээнд угсармал орон сууцны дулаан техникийн шинэчлэл төсөл, “Түрээсийн орон сууц” хөтөлбөрийг дэмжих төслийг хэрэгжүүлэх, орон сууцны цахим мэдээллийн сан байгуулах, шинээр байгуулж буй хөрөнгө оруулалтын сангийн үйл ажиллагааг дэмжих зэрэг ажлуудыг хамтран хэрэгжүүлэхээр тохиролцлоо.
Мөн нийслэлийн Засаг даргын Хот байгуулалт, хөрөнгө оруулалтын асуудал хариуцсан орлогч С.Очирбат, “Баярс констракшн” ХХК-ийн захирал Н.Баянсайхан нар хамтран ажиллах санамж бичигт гарын үсэг зурав. Талууд санамж бичгийн хүрээнд Улаанбаатар хотыг 2020 он хүртэл хөгжүүлэх ерөнхий төлөвлөгөөний тодотгол, 2030 оны хөгжлийн чиг хандлагад нийцүүлэн томоохон төсөл хөтөлбөрүүдэд хөрөнгө оруулалт хийх, төр хувийн хэвшлийн түншлэлийн хүрээнд бүтээн байгуулалтын ажил хийх санаачилга гаргах, Улаанбаатар хотын хуучин барилгуудын дулаан алдагдлыг бууруулах, сэргээн засварлах, импортыг орлох үндэсний үйлдвэрлэлийг дэмжих, ажлын байр нэмэгдүүлэх зэрэг ажилд хамтран ажиллах юм гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.
