-
2016 оны 2 сарын 29
Тээврийн хэрэгсэл эзэмшигч ААНБ, иргэн та Авто тээврийн болон өөрөө явагч хэрэгслийн албан татвар, Агаарын бохирдоын төлбөр, авто зам ашигласны төлбөрийг тээврийн хэрэгслийн улсын дугаарын сүүлийн оронгоос хамааран 2016 оны 1-р сарын 1-ны өдрөөс 5-р сарын 31-ны өдрийг дуустал хуулийн хугацаанд төлнө үү. Хэрэв таны тээврийн хэрэгслийн улсын дугаарын сүүлийн орон нь:
1 болон 6 дугаараар төгссөн бол 1-р сард
2 болон 7 дугаараар төгссөн бол 2-р сард
3 болон 8 дугаараар төгссөн бол 3-р сард
4 болон 9 дугаараар төгссөн бол 4-р сард
5 болон 0 дугаараар төгссөн бол 5-р сард
тус тус албан татвар, төлбөрөө төлнө.3-р сарын 1-ны өдрөөс эхлэн 1,2,6,7 дугаараар төгссөн тээврийн хэрэгслийн татвар төлөгдөөгүй тохиолдолд замын хөдөлгөөнд оролцуулахгүй ба захиргааны арга хэмжээ тооцож торгууль ногдуулахыг анхаарна уу.
-
2016 оны 2 сарын 29
Жил бүрийн дулааны улиралд буюу гуравдугаар сараас есдүгээр сард хийгддэг урсгал засвар гуравдугаар сарын 1-ний өдрөөс эхлэх гэж байна.
15Шугам сүлжээний ашиглалтыг сайжруулах, найдвартай ажиллагааг хангах зорилгоор хийдэг засвар үйлчилгээний ажлыг тухайн тоноглолыг хүчдэлээс бүрэн чөлөөлсний дараа хийхээс аргагүй байдлыг харгалзаж зарлагдсан хугацаанд хэрэглээгээ түр зохицуулан, хүлээцтэй хандахыг хэрэглэгч та бүхнээс хүсье.
Гуравдугаар сарын 1-ний мягмар гарагт дараах байршил дахь хэрэглэгчдийг цахилгаанаар хангадаг шугам тоноглолд урсгал засвар хийх тул та бүхэн зарлагдсан хугацаанд хэрэглээгээ түр зохицуулна уу.
-
2016 оны 2 сарын 29
МАХН-ын шаардлагад хариу өгчээ
-
2016 оны 2 сарын 29
Оюутнууд ирэх гуравдугаар сарын 4-ний өдөр 14.00 цагт төв талбайд тайван жагсаал хийж, өөрсдийн эрхийн төлөө дуу хоолойгоо өргөхөөр болжээ. Тэд энэхүү жагсаалаараа Засгийн газар, БСШУЯ болон бусад холбоотой байгууллагуудад хандан оюутныг ажлын байраар хангах тухай болон 70200 төгрөгийн тэтгэлэг, нийтийн тээвэр, оюутны эрхийн тухай асуудлаар үзэл бодлоо илэрхийлж, шаардлага тавих гэнэ.
Мөн тэнд цугласан нийт оюутнуудынхаа анкетыг авч, мэдээллийн бааз бүрдүүлэн, АСЕМ-д ажиллах бүртгэлийг явуулж, холбогдох байгууллагууд руу анкетыг илгээх юм байна.
Монголд нийт 217 мянган оюутан байгаа гэж үзвэл тэдний 10 хувь буюу ”21700 оюутныг ажлын байртай болгох нь” хөтөлбөрийг санаачлан явуулж буй аж. Энэ ажлын хүрээнд www.icv.mn сайтыг нээн ажиллуулахад бэлэн болжээ. Энэхүү сайтад оюутнууд өөрсдийн мэдээллийг оруулснаар ажил олгогч байгууллагуудтай холбоо тогтоох боломжтой болох юм байна.
Энэ талаар Монголын оюутны холбооны дэд ерөнхийлөгч З.Төмөртөмөр ”Ирэх долоодугаар сард оюутнуудын амралтын үе таарч байгаа учраас АСЕМ-д олон мянган оюутан ажиллах боломжтой. Хэчнээн оюутан ажиллаж болох тухай нарийн тоог гаргаагүй байгаа” гэжээ.
-
2016 оны 2 сарын 29
Орон нутгийн хөрөнгө оруулалтаар мэдээлэл технологийн үйлчилгээг хүртээмжтэй болгох ажлын хүрээнд Чингэлтэй дүүргийн 17, 72 дугаар сургуулийн дотоод сүлжээг шинэчлэх ажил хийгджээ.
-
2016 оны 2 сарын 29
Өндөр жил гэдэг нь цагалбарын жилийг астрономийн буюу улирлын жилийн мөчлөгтэй тааруулахын тулд ердийнхөөс нэг өдрөөр (нар-сарны тоололд нэг сараар) илүү байдаг жилийг хэлнэ. Улирал болон астрономийн үзэгдлүүдийн мөчлөг нь бүхэл тоотой өдрөөр хэмжигддэггүй тул цагалбарын жилүүдийг бүгдийг ижил өдөртэйгээр хийвэл аажимдаа зөрүү гарч ирдэг. Иймээс уг зөрүүг арилгахын тулд зарим жилд нэмэлт өдөр (сар) оруулж өгдөг байна. Өндөр биш жилийг ердийн жил гэдэг.
Жишээлбэл, нийтийн нарны тоолол болох Григорийн тоололд ердийн жилийн хоёрдугаар сар 28 хоногтой байдаг бол өндөр жилийн хоёрдугаар сар нь 29 хоногтой байдаг. Өөрөөр хэлбэл, Григорийн тооллын өндөр жил 366 хоногтой байдаг юм. Мөн үүнтэй төстэйгээр, нар-сарны тоолол болох Еврейн тоололд 19 жил тутамд 7 удаа 13 дахь сарыг нэмж оруулдаг аж.
-
2016 оны 2 сарын 29
Нийслэлийн Засаг дарга “Татварын буцаан олголтын тухай” А/155 дугаар захирамж гаргалаа. Тус захирамжаар хуулийн дагуу татварын хөнгөлөлт чөлөөлөлтөд хамрагдах иргэдийн материалыг хүлээн авч, бичиг баримтын бүрдлийг шалган, Хувь хүний орлогын албан татварын буцаан олголт авах иргэдийн жагсаалтыг баталгаажуулан ирүүлэхийг нийслэлийн Татварын газарт даалгасан байна. Түүнчлэн нийслэлийн 2016 оны төсөвт тусгагдсан, Хувь хүний орлогын албан татварын буцаан олголтод олгохоор батлагдсан 26,500,000,000 /хорин зургаан тэрбум таван зуун сая/ төгрөгийг нийслэлийн Татварын газраас баталгаажуулан ирүүлсэн жагсаалтын дагуу татвар төлөгчдийн харилцах данс байршиж буй арилжааны банкуудаар дамжуулан, банкуудтай байгуулсан гэрээний үндсэн дээр татвар төлөгчдөд олгохыг холбогдох албаныханд үүрэг болголоо гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.
-
2016 оны 2 сарын 29
Дэлхийн иргэний хамгаалалтын өдрийг тэмдэглэн өнгөрүүлэх ажлын хүрээнд өдөр ОБЕГ, НОБГ, ГСХ, АТА, УУАА, ХҮАнгийн албан хаагчид Богд уулын ноён оргил Цэцээ гүнд гарах спорт аялал зохион байгууллаа.
-
2016 оны 2 сарын 29
Ашиглалтын хугацаа нь дууссан микробусыг гуравдугаар сарын 1-нээс эхлэн үйлчилгээ эрхлүүлэхгүй байх шийдвэрийг Тээврийн газраас гаргасан билээ.
-
2016 оны 2 сарын 29
ЭМСЯ-ны Төрийн нарийн бичгийн дарга С.Ламбаа “Үндэсний оношилгоо эмчилгээний төв байгуулах төсөл”-ийн гүйцэтгэгчээр шалгарсан БНСУ-ын Самсунг С&T консорциумын төлөөлөгчидтэй уулзжээ.
-
2016 оны 2 сарын 29
Энэ онд багтаж хотын хог хаягдлын менежментийг сайжруулах хөтөлбөрийн хүрээнд 2-оос доошгүй хог боловсруулах үйлдвэр барьж, Улаанчулуутын хогийн цэгийг нүүлгэх ажлыг зохион байгуулахаар болжээ.
-
2016 оны 2 сарын 29
Нийслэлийн Засаг дарга бөгөөд Улаанбаатар хотын Захирагч Э.Бат-Үүл “Үйлчилгээг сайжруулах чиглэлээр хэрэгжүүлэх зарим арга хэмжээний тухай” А/153 дугаар захирамж гаргалаа. Захирамжаар “Нийслэлийн Үйлчилгээний нэгдсэн төв”-ийн үйл ажиллагааг жигдрүүлэх, үйлчилгээг шуурхай болгох, байгууллагуудын үйл ажиллагааны уялдаа холбоог сайжруулах зорилгоор дараах арга хэмжээг зохион байгуулж, хэрэгжүүлэхийг үүрэг болгов. Үүнд:
Газар, барилгажилтын зөвлөлийн хурлыг долоо хоног бүр тогтмол хуралдуулж, тухайн долоо хоногт ирсэн хүсэлт бүрийг хурлаар хэлэлцүүлэх ажлыг зохион байгуулж ажиллахыг нийслэлийн Ерөнхий төлөвлөгөөний газарт, Өмчийн харилцааны газарт
Нийслэлийн Засаг даргын захирамжийн төсөл хянах хугацаа, хянах албан хаагчийг тодорхой болгож, захирамж гаргах үйл ажиллагааг сайжруулахыг нийслэлийн Засаг даргын Тамгын газарт
Үйлчилгээний нэгдсэн програмд яаралтай хөгжүүлэлт хийж, хүсэлтийн шийдвэрлэлтэд хяналт тавих, шаардлагатай тайлан мэдээ гаргах, албан хаагчдын ажлын үзүүлэлтэд дүн шинжилгээ хийх нөхцөлийг бүрдүүлж ажиллахыг нийслэлийн Засаг даргын Тамгын газарт
Өргөдөл, гомдлын нэгдсэн програмын 3 дахь шатны хөгжүүлэлтийг хийх, нийслэлд ашиглаж байгаа програм хангамжуудыг холбох, хоорондын уялдаа холбоог хангах, нэгдсэн админ удирдлагатай болгох асуудлыг шийдвэрлэж ажиллахыг нийслэлийн Засаг даргын Тамгын газарт, Мэдээллийн технологийн газарт
Үйлчилгээний хүсэлтийг шийдвэрлэхдээ хугацаа хэтрүүлж байгаа шалтгааныг судлаж, холбогдох арга хэмжээ авах, буруутай албан хаагчдад хариуцлага тооцох, хугацаа хэтрүүлэхгүй байх нөхцлийг бүрдүүлж, хяналт тавьж ажиллахыг нутгийн захиргааны байгууллагын удирдлагуудад
“Нийслэлийн Үйлчилгээний нэгдсэн төв”-д ажиллаж байгаа албан хаагчдын сургалтын хэрэгцээг тодорхойлж, шаардлагатай сургалтуудыг зохион байгуулах, туршлага судлуулах ажлыг төлөвлөгөө гарган зохион байгуулж ажиллахыг нийслэлийн Засаг даргын Тамгын газарт
“Нийслэлийн Үйлчилгээний нэгдсэн төв”, байгууллага хооронд шилжүүлэх баримт бичгийг холбогдох дүрэм, журамд нийцүүлэн шуурхай хүргэх чиг үүрэг бүхий шуудан хүргэлтийн тогтолцоонд шилжүүлэх ажлыг зохион байгуулж, шаардлагатай хөрөнгийн асуудлыг шийдвэрлүүлж ажиллахыг нийслэлийн Засаг даргынТамгын газарт
Нийслэлийн Засаг даргын Тамгын газар, Улаанбаатар хотын Захирагчийн ажлын алба, нийслэлийн Засаг даргын эрхлэх асуудлын хүрээн дэх хэрэгжүүлэгч агентлагаас иргэдэд үзүүлж буй үйлчилгээг Нийслэлийн үйлчилгээний нэгдсэн төвөөр дамжуулан бүртгэж, хяналт тавьж ажиллахыг нутгийн захиргааны байгууллагын удирдлагуудад
Иргэдэд үзүүлж буй нийслэлийн үйлчилгээг шинэ шатанд гаргах, үйлчилгээний шилдэг менежментийг нэвтрүүлэх, шинээр ажилд орж буй ажилтныг нийслэлийн хөгжлийн хэрэгцээ, шаардлага, онцлогт тохирсон шалгуурын дагуу шалгаруулж тэднийг үнэ цэнэтэй мэргэшсэн албан хаагч болгон төлөвшүүлэх зорилго бүхий “Нийслэлийн нутгийн захиргааны байгууллагад шинээр ажилд орох болон албан тушаал дэвшүүлэн ажиллахад мөрдөх нийтлэг журам”-ыг хэрэгжүүлэн ажиллахыг нийслэлийн нутгийн захиргааны байгууллагын удирдлагуудад
Нийслэлийн нутгийн захиргааны байгууллагын тасралтгүй, хэвийн үйл ажиллагааг хангах, бүтээмжийг дээшлүүлэх, албан хаагчдыг ашиг сонирхлын зөрчлөөс урьдчилан сэргийлэх зорилгоор Хангарди ордонд ажлын цагаар зөвхөн төрийн албан хаагчид нэвтрэх боломжоор хангах зохион байгуулалтын арга хэмжээг шуурхай авч хэрэгжүүлэхийг нийслэлийн Нийтлэг үйлчилгээний газарт тус тус үүрэг болголоо гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.
-
2016 оны 2 сарын 29
НӨАТ-ын хонжворт сугалааны тохирол өчигдөр орой явагджээ.
-
2016 оны 2 сарын 29
Авто тээврийн болон өөрөө явагч хэрэгслийн албан татвар, агаарын бохирдлын төлбөр, авто зам ашигласны төлбөр хураах ажлыг хуулийн дагуу энэ оны 1 сарын 15-ны өдрөөс 5 дугаар сарын 31-ны өдрийг дуустал зохион байгуулах талаар Нийслэлийн засаг дарга захирамж гарсан.
-
2016 оны 2 сарын 29
Монголын шатрын холбоо, Эрүүл мэндийн яам, “Хүннү молл“ худалдааны төв хамтран зохион байгуулж буй өсвөрийн шатарчдын УАШТ-ий нээлт өнөөдөр 15.30 цагаас болно. Өчигдөр ”Хүннү молл”-д эхэлсэн тус тэмцээний аваргууд ирэх сарын 3-ны өдөр тодорно.
Тэмцээнээс ангилал тус бүрт АЛТАН медаль авсан нийт 12 шатарчин 4 сарын 5-15-нд Улаанбаатарт болох Ази тивийн Өсвөрийн аварга шатарчин шалгаруулах тэмцээнд үндсэн тамирчнаар оролцох эрх авна. Мөн МӨНГӨ, ХҮРЭЛ медаль авсан нийт 24 шатарчин Ази тивийн аварга Өсвөрийн шатарчин шалгаруулах тэмцээнд нэмэлт тамирчнаар оролцох эрх авна гэж МШХ-ны хэвлэлийн албаас мэдээлэв.
-
2016 оны 2 сарын 29
“Эмийн зохистой хэрэглээ аян”-ы нээлт болно. Аянаар эмийн гаж нөлөө, ауюлгүй байдал, жороор олгох асуудал, хуурамч болон бүртгэлгүй эм зэрэгт үнэлгээ, хяналт шалгалт хийнэ.
-
2016 оны 2 сарын 29
Жилийн бүрийн гуравдугаар сарын нэгэнд Дэлхийн иргэний хамгаалалтын өдрийг тэмдэглэдэг уламжлалттай. Энэ жилийн хувьд Олон Улсын Иргэний Хамгаалалтын Байгууллагаас дэлхийн иргэний хамгаалалтын өдрийг “Иргэний хамгаалалт ба мэдээллийн шинэ технологиуд” гэсэн уриан дор тэмдэглэн өнгөрүүлнэ. Монгол Улсын хувьд тус уриалгын хүрээнд Дэлхийн иргэний хамгаалалтын өдрийг улсын хэмжээнд тэмдэглэн өнгөрүүлэх юм.
Түүнчлэн Онцгой байдлын ерөнхий газрын хувьд энэ өдрийг байгууллагаа олон нийтэд сурталчилан таниулах, албан хаагчдын чөлөөт цагийг зөв боловсон өнгөрүүлэх, мэдлэг боловсролыг дээшлүүлэх зорилтын хүрээнд спортын уралдаан тэмцээн, мэдээллийн цагийг зохион байгуулан тэмдэглэхээр болсон байна.
Нийслэлийн хүрээний Онцгой байдлын байгууллагын офицер бүрэлдэхүүний дунд “Гар бөмбөг”-ийн тэмцээн, Цэцээ гүний ноён оргилд спорт явган аялал зохион байгуулжээ. Харин гуравдугаар сарын 2-ны өдөр нийслэлийн Онцгой байдлын газрын анги байгууллагуудын дунд “Марш тактик” тусгай бэлтгэлийн тэмцээнийг Хүй долоон худагт зохион байгуулах аж.
-
2016 оны 2 сарын 29
Тухайн өдөр нохой, хонь жилтнээ аливаа үйлийг хийхэд эерэг сайн. Эл өдөр хараалыг дарах, хариулга хийх, мод босгох, газрын үүд боох, тангаргаас няцах, зэтгэрийг дарах, мал адгуус муулах үйл, эм найруулах, эхнэрийг дуудах, үс авах, элчид эд өгөх зэрэгт сайн. Бурхныг тахих, бэрийн үйл, байшингийн суурь тавих, өс дарах, угаал үйлдэх, залбирал тавихад муу. Өвчин болвол арван хоногт амирлана. Замд гарвал сайн бөгөөд эд, идээ арвижна. Зүүн чих хангинавал татвал хэрүүл тэмцэл болно. Баруун нүд татвал эд, хувцас олно. Зүүн чих хангинавал жуулчин ирнэ. Баруун чих хангинавал муу гаслан ирнэ. Нохой уливал халуун болохуй ба хэрээ дуугарвал муу хэл дуулна. Тагнай эрвэгнэвэл хэн нэгэн үхнэ. Бие татвал гэнэтийн жуулчин ирнэ. Шилбэ татвал үхлийн гэм ирэх нигууртай гэж номлосон. Өдрийн сайн цаг нь морь, хонь, нохой, гахай, үхэр, луу болой. Үс шинээр үргээлгэх буюу засуулбал өвчин ирнэ.
-
2016 оны 2 сарын 29
2016 оны 02 дугаар сарын 29-ний 08 цагаас 20 цаг хүртэлх цаг
агаарын урьдчилсан мэдээ:
Нутгийн зүүн хэсгээр солигдмол үүлтэй. Төвийн нутгийн зарим газраар бага зэргийн цас орно. Бусад нутгаар багавтар үүлтэй. Цас орохгүй. Салхи нутгийн зүүн хэсгээр баруун хойноос, бусад нутгаар баруунаас секундэд 6-11 метр. Завхан голын эх, Их нууруудын болон Дархадын хотгор, Идэр, Тэс голын хөндийгөөр 9-14 градус, Хараа, Ерөө, Туул Тэрэлж, Хэрлэн голын эх, Халх голын сав газар, Хэнтэйн уулархаг нутгаар 2-7 градус хүйтэн, говийн бүс нутгийн баруун хэсгээр 5-10 градус дулаан, бусад нутгаар 3 градус хүйтнээс 2 градус дулаан байна.
УЛААНБААТАР ХОТ: Үүлшинэ. Цас орохгүй. Салхи баруун хойноос секундэд 5-10 метр. 1-3 градус хүйтэн байна.
Өглөө 05 цагт Улаанбаатарт: 11 градус хүйтэн, харьцангуй чийг 72 хувь, агаарын даралт 873 гектопаскаль байлаа. Даралт өдөртөө тогтвортой байна.
-
2016 оны 2 сарын 28
Архангай аймагт хаваржилт хүндэрч байгаатай холбогдуулан аймгийн онцгой комиссын ээлжит хуралдаан болов.
