Өнгөрсөн долоо хоногт болж өнгөрсөн онцлох үйл явдлуудаас хүргэж байна.
ЦЭРГИЙН АЛБАН ХААГЧИЙН ТЭТГЭВЭР, ТЭТГЭМЖИЙН ТУХАЙ ХУУЛЬД ӨӨРЧЛӨЛТ ОРУУЛЛАА
УИХ-ын чуулганы нэгдсэн хуралдаанаар С.Бямбацогт, Б.Дэлгэрсайхан, Ж.Энхбаяр, Б.Энх-Амгалан тэргүүтэй гишүүдийн өргөн мэдүүлсэн Цэргийн алба хаагчийн тэтгэвэр, тэтгэмжийн тухай хуульд өөрчлөлт оруулах тухай хуулийн төслийг хэлэлцлээ. Байнгын хороо уг төслийг анхны хэлэлцүүлгээр нь батлахыг дэмжсэнийг чуулганы нэгдсэн хуралдаанд оролцсон гишүүдийн олонхи нь дэмжиж баталлаа.
ЕРӨНХИЙЛӨГЧИЙН ӨРГӨН МЭДҮҮЛСЭН ХУУЛИЙН ТӨСЛИЙГ ДЭМЖЛЭЭ
Эдийн засгийн байнгын хороо хуралдаж байна. Хуралдаанаар Ерөнхийлөгч Х.Баттулгын 10 дугаар сарын 12-ны өдөр өргөн мэдүүлсэн Валютын зохицуулалтын тухай хуульд нэмэлт оруулах тухай хуулийн төсөл болон хамт өргөн мэдүүлсэн Төв банк /Монголбанк/-ны тухай хуульд нэмэлт оруулах тухай хуулийн төслийг хэлэлцлээ.
ХӨГЖЛИЙН БАНК 500 САЯ АМ.ДОЛЛАРЫН ЭХ ҮҮСВЭРИЙГ ГАДААД ЗАХ ЗЭЭЛЭЭС БОСГОЖЭЭ
Эдийн засгийн байнгын хорооны өнөөдрийн хуралдаанд валютын ханшийн асуудлаар Монголбанкны ерөнхийлөгч Н.Баяртсайхан мэдээлэл хийлээ.
Монгол банкны ерөнхийлөгч Н.Баяртсайхан ярихдаа “Монгол төгрөгийн ам.доллартай харцих ханш энэ оны нэгдүгээр сараас хойш 5.5 хувиар суларсан бөгөөд энэ дотоод болон гадаадын хэд хэдэн хүчин зүйлээс шалтгаалсан хэмээн Монголбанк үзэж байгаа. Дотоод хүчин зүйлд эдийн засгийн сэргэлтийг дагасан импортын өсөлт, 2012 онд босгосон бондуудын эргэн төлөлт зэргийг оруулан тооцсон.
МОНГОЛБАНКНЫ ЕРӨНХИЙЛӨГЧ Н.БАЯРТСАЙХАНЫГ АЖЛААС НЬ ЧӨЛӨӨЛНӨ ГЭВ
УИХ-ын гишүүн Т.Аюурсайхан Монгол төгрөгийн ханш суларч, валют, долларын ханш чангарч өсч байгаагаас иргэдийн худалдан авах чадвар муудаж байгаад Монголбанкны ерөнхийлөгч Н.Баяртсайхан буруутай гэв. Тэрбээр энэ талаар мэдэгдэл хийлээ.
КАЗАХСТАН УЛС 500 МЯНГАН АМ.ДОЛЛАРЫН ТУСЛАМЖ ҮЗҮҮЛЭВ
Монгол Улсын Шадар сайд Ө.Энхтүвшин өнөөдөр Бүгд Найрамдах Казахстан Улсын Элчин сайд К.И.Кобландиныг хүлээн авч уулзав.
Хоёр орны харилцаа, хамтын ажиллагаанд ахиц гарч, дээд, өндөр түвшний яриа хэлэлцээ идэвхжиж байгаад баяртай байгаагаа Шадар сайд илэрхийлэв. Хоёр улсын төрийн тэргүүн Циньдао хотноо уулзсан бол өнгөрсөн гуравдугаар сард Астана хотноо Засгийн газар хоорондын комиссын долоодугаар хуралдаан амжилттай болсныг тэмдэглэв.
“ХӨРӨНГИЙН ЗАХ ЗЭЭЛИЙН ЧАДАВХЫГ БЭХЖҮҮЛЭХ II ҮЕ ШАТНЫ ТӨСӨЛ”-ИЙН ХУРЛЫН ТЭМДЭГЛЭЛД ГАРЫН ҮСЭГ ЗУРАВ
Санхүүгийн зохицуулах хороо өнөөдөр Японы Олон Улсын хамтын ажиллагааны байгууллага (ЖАЙКА)-тай хамтран хэрэгжүүлэхээр төлөвлөж буй техникийн хамтын ажиллагааны “Монгол Улсын хөрөнгийн зах зээлийн чадавхыг бэхжүүлэх II үе шатны төсөл”-ийн цар хүрээ, үйл ажиллагаа, хүлээгдэх үр дүнг тохиролцсон хурлын тэмдэглэлийг албажууллаа. Хурлын тэмдэглэлд Хорооны Үнэт цаасны газрын дарга Б.Лхагвасүрэн, ЖАЙКА-гийн Монгол дахь Төлөөлөгчийн газрын дарга Мүцүми Сато нар гарын үсэг зурав.
1072 ХУВЬЦААГ ХОЁРДОГЧ ЗАХ ЗЭЭЛИЙН АРИЛЖАА НЭЭГДЭХ ХҮРТЭЛ АРИЛЖААЛЖ БОЛОХГҮЙ
“Эрдэнэс Тавантолгой” ХК-ийн хувьцааг Монгол Улсын Их Хурлын 2010 оны 39 дүгээр тогтоол болон Монгол Улсын Засгийн газрын 2011 оны 98 дугаар тогтоол, 2012 оны 116 дугаар тогтоолуудаар иргэдэд үнэ төлбөргүй эзэмшүүлэхээр шийдвэрлэж, Монгол Улсын Засгийн газрын 2010 оны 350 дугаар тогтоолын дагуу, “Эрдэнэс Тавантолгой” ХК-ийн хувьцааг түүний хоёрдогч зах зээлийн арилжаа нээгдэх хүртэл бусдад худалдах, шилжүүлэхгүй байхаар заасан байдаг.
Б.Лхам