АТГ-аас 2017 онд шүүхэд шилжүүлэх саналтай прокурорт шилжүүлсэн 106 хэргээс 46 эрүүгийн хэрэг шийдвэрлэж байсан бол өнгөрөгч 2018 онд нийт 224 хэрэг шүүхээр шийдвэрлүүлэхээр прокурорт шилжүүлснээс 84 хэргийг шүүхээр эцэслэн шийдвэрлүүлсэн байна. Үүнд,

• Автотээврийн үндэсний төвийн тээвэр зохицуулалтын хэлтсийн дарга Д.Батбаяр, 
• Боловсрол соёл шинжлэх ухааны яамны санхүүгийн газрын даргаар ажиллаж байсан Д.Батмагнай,
• Барилга, хот байгуулалтын сайдаар ажиллаж байсан Ц.Баянсэлэнгэ,
• Гаалийн Ерөнхий газрын Төрийн захиргаа, хамтын ажиллагааны газрын даргаар ажиллаж байсан  Б.Оюундэлгэр,
• НӨХГ-ын Газар чөлөөлөх хэлтсийн дарга Н.Баяр, ахлах мэргэжилтэн Э.Энхтулга,
• Төрийн орон сууц санхүүжилтийн корпорацийн хуулийн хэлтсийн дарга Б.Батбаатар,  
• Баян-Өлгий аймгийн Ногооннуур сумын Засаг дарга А.Мейремхан,
• Чингэлтэй дүүргийн Эрүүл мэнд, нийгмийн даатгалын хэлтсийн нийгмийн даатгалын шимтгэл ногдуулалт, төлөлт хариуцсан байцаагч Б.Золбоо,
• Баянгол дүүргийн татварын байцаагч А.Энхтүвшин,
• Хан-Уул дүүргийн татварын байцаагч Н.Пүрэвдорж нарын,
• Батлан хамгаалах яамны Төрийн захиргаа, удирдлагын газрын орлогч дарга, хурандаа Ж.Алтансүх,
• ДЦС-4 ТӨҮГ-ын гүйцэтгэх захирал С.Анхбаяр зэрэг албан тушаалтнуудад холбогдох хэргийг шүүхээр шийдвэрлүүлжээ.

Түүнчлэн мөрдөн шалгасан эрүүгийн хэргүүдээс УИХ-ын гишүүн асан Н.Батбаяр, Б.Гарамгайбаатар, Эрчим хүчний сайд асан М.Сономпил, Нийслэлийн Засаг даргаар ажиллаж байсан Э.Бат-Үүл, Хөгжлийн банкны захирал асан Н.Мөнхбат, ТОСК-ийн А.Гантулга, МХЕГ-ын газар, хэлтсийн дарга Б.Аззаяа, Д.Баярсайхан нарын албан тушаалтнуудад холбогдох эрүүгийн 76 хэргийг шүүхэд шилжүүлэх саналтайгаар прокурорт шилжүүлсэн байна. Эдгээр хэргээс Н.Батбаяр, Б.Гарамгайбаатар нарт холбогдох хэргийн шүүх хурал өнөөдөр болох байсан ч Н.Батбаяр шинэ өмгөөлөгч авсан тул шүүх хурал ирэх сарын 15-ныг хүртэл хойшлоод буй. Тэгвэл М.Содномпилд холбогдох шүүх хурал ч гэсэн удаа дараа хойшлогдсон юм.

АТГ өнгөрсөн онд авлигатай холбоотой гомдол мэдээлэл, хэрэг бүртгэлт, мөрдөн байцаалтын хэргийн тоо, ажлын ачаалал нэмэгдсэнтэй холбогдуулан эрүүгийн 12 хэрэгт ТЕГ, ЦЕГ-тай хамтарсан тушаалаар ажлын хэсэг байгуулагдсан бөгөөд тус ажлын хэсгүүдийг өдөр тутмын мэргэжлийн удирдлагаар хангаж, ажлын явцыг тухай бүр хэлэлцэн чиглэл өгч ажилласан гэв. Ингээд хэвлэлийн хурлын үеэр сэтгүүлчдийн сонирхсон асуултад хариулт өгснийг товчхон хүргэе.

-Оффшор бүсээс орж ирсэн мөнгөний тухай тодруулж болох уу?

-АТГ мөрдөн шалгах хэлтэст оффшор бүсэд данстай иргэдийн мэдээлэл задарснаас хойш дөрөв дугаартай хэрэг үүсгэн шалгаж байна. Энэ бүсэд мөнгө хадгалах нь бүхэлд гэмт хэрэг гэж үзэхгүй. Гэхдээ мөнгө болгоныг хөөн шалгаж байгаа.

-“Голомт-ын Ч.Даваанямыг баривчлан саатуулсан. Энэ талаар?

-1 дугаартай хэрэг дээр Монгол Улсад нэлээд том хоёр аж ахуйн нэгжийн дансаар удаа дараа мөнгө угаасан байж болзошгүй. Цаана нь ямар зориулалтаар мөнгө орж ирсэн, албан тушаалтан байгаа эсэх нь мөрдөн шалгалтаар тогтоогдоно.

- С.Баяр, С.Баярцогтын хэрэг юу болж байна вэ?

-Оффшортой холбоотой С.Баярын хэрэг, С.Баярцогттой холбоотой хэрэг дээр Оюутолгойн гэрээ байгуулагдахаас өмнө гаднын хөрөнгө оруулагч компаниас хувьцаа эзэмшсэн, гэрээ байгуулагдсаны дараагаар хувьцааны үнэ өсөхөд зарж борлуулан их хэмжээний мөнгөтэй болсон нь албан тушаалаа ашигласан хэрэг гэж үзэн шалгаж байгаа.

-УИХ-ын гишүүн Ж.Батзандангийн эхнэрийн дансаар ЖДҮХС-гаас гарсан мөнгө орсон тухай мэдээлэл цацагдсан. Энэ талаар?
-ЖДҮХС-тай холбоотой асуудалд мөрдөн байцаалтын хэрэг үүсгэн шалгаж байгаа. 1.031 төсөл хөтөлбөр ирсэн юм билээ. 216 иргэн, хуулийн этгээд санхүүжилт авсан. Үүнийг АТГ шалгаж байна. Төсөл хөтөлбөрөөс зээл авсан аж ахуйн нэгж, иргэн бүрийг хууль зөрчсөн гэж ойлгож болохгүй. УИХ-ын гишүүний эхнэр зээл аваад түүнийгээ зориулалтынх нь дагуу хэрэглэсэн бол хууль зөрчсөн гэж үзэхгүй. Харин зээл авахад албан тушаалтан нөлөөлсөн бол шалгана. Энэ асуудалд ялгаж салгаж хандах ёстой. Бид шалгалтын хүрээнд ЖДҮХС-гаас зээл авсан төсөл бүрийг шалгаж байгаа.

-“УБДС” ТӨХК-ийн гүйцэтгэх захирал асан Д.Бямба-Очир 500 сая төгрөгийн хахууль авах гэж байгаад баригдсан, 87 орон сууцтай гэх мэдээлэл байгаа?
- Хахууль авсан хэмжээ нь 500 сая төгрөг биш. Албан ёсны бүртгэлтэй гурван орон сууцтай. Энэ хэрэг дээр мөрдөн шалгах ажиллагаа явж байгаа. Мөн “Стандарт Банк”-наас ЖАСТ групп зээл авсан гэх зургаан хүнтэй холбогдолтой хэрэг шүүхэд шилжсэн.

-ЖДҮХС-гийн асуудалд УИХ-ын 43 гишүүн холбогдон шалгагдаж байгаа гэсэн. Энэ тоо яг хэд вэ?
-Шүүхээр гэм буруутай нь тогтоогүй, шалгагдаж байгаа хэрэгт нэр заан хэлэх нь хуулиар хориотой. Харин УИХ-ын таван гишүүнд эрүүгийн хэрэг үүсгэн яллагдагчаар татах тогтоол гарсан. Одоогоор хоёр гишүүн нь тогтоолтой танилцсан.

-С.Баяр болон Ч.Сайханбилэг нарыг шалгаж байгаа. С.Баярыг гадуур шалгаж байгаа гэсэн. Ч.Сайханбилэгийг гадаад улс руу явсан гэх мэдээлэл бий. Энэ үнэн үү?

-2009 оны аравдугаар сарын 6-ны өдөр үзэглэсэн гэрээтэй холбоотой мөрдөн шалгах ажиллагаа явагдаж байгаа. Санхүүгийн болон мэргэжлийн албанаас бүрдсэн шинжээчдийн баг ажиллаж байна. Яллагдагчаар татан шалгаж байгаа нэр бүхий зургаан хүнээс байцаалт авсан. Хилийн хоригтой учир гадаад улс руу зорчоогүй. Мөрдөн шалгах ажиллагааны явцтай танилцаад шаардлагатай гэж үзвэл хувийн батлан даалтад гаргадаг.

Г.Нацаг