Ноорог Креатив Студио ХХК-аас мэдэгдэл гаргажээ. Тус мэдэгдэлийг бүрэн эхээр хүргэж байна.
Байгууллагын зүгээс албан ёсны мэдэгдэл хийж байна.
Ноорог Креатив Студио ХХК-ийн 20-27 насны найман гишүүнийг 2025 оны 3 сарын 17-ны өдрөөс 18-нд шилжих шөнө Кибер гэмт хэрэгтэй тэмцэх газраас хойшлуулшгүй ажиллагаа явуулж саатуулсан. Энэ үеэр ажлын байран дээрх бүх компьютер, хард, гишүүдийн гар утас зэрэг хэвлэн нийтлэх үйл ажиллагаанд ашигладаг эд зүйлийг хураан авсан болно.
Цагдаагийн алба хаагчид ажлын байрнаас гадуур байсан 8 гишүүний байгаа газарт орж, харилцаа холбооны хэрэгслийг хурааж авсны дараа мэдүүлэг авахаар авч явсан. Өмгөөлөгчгүй мэдүүлэг өгөхөөс татгалзсан хэдий ч зарим гишүүнээс мэдүүлэг авч, 21:50 минутаас өглөөний 06:30 минут хүртэл прокуророос баривчлах зөвшөөрөл хүлээж байна гэх шалтгаанаар саатуулсан.
Энэхүү ажиллагаанд манай гишүүн нэг бүрийн хууль зүйн туслалцаа авах, мэдүүлэг өгөхөөс татгалзах эрх зөрчигдсөн гэж үзэж байна. Мөн хэрэг бүртгэлийн хэрэг үүсгээгүй байхад прокурорын зөвшөөрөлгүй ажлын байранд нэгжлэг хийж, эд зүйл хураан авсан, 8 гишүүний биеэс гар утас хураан авсан, эдгээрт үзлэг хийсэн ажиллагааг хуулиар зөвшөөрсөн хэр хэмжээнээс хэтэрсэн гэж үзэж байна.
Бид энэ бүх хугацаанд цагдаагийн албан хаагчдын үйл ажиллагаанд саад учруулаагүй боловч ЦЕГ-ын хийсэн мэдэгдэлд дурдсан дараах мэдээлэлд тайлбар хүргүүлж байна.
-
Энэхүү ажиллагаа нь манай редакцын хэвлэн нийтлэх үйл ажиллагаатай шууд хамааралтай байсан нь хураан авсан эд зүйл, мэдүүлгийн үеэр тавьсан асуултаас ойлгогдохуй байсныг мэдэгдэж байна.
-
Бид нийгэмд эерэг нөлөө үзүүлэх үнэ цэнтэй, утга учиртай контент бүтээх зорилготой хамт олон. Аливаа хууль бус үйл ажиллагаа, тэр дундаа цахим мөрийтэй тоглоом зохион байгуулах, сурталчлах, дэмжих зорилготой үйл ажиллагаанд оролцож байгаагүй. Эдгээр үйл ажиллагаа нь манай байгууллагын үйл ажиллагааны төрөл, редакцын бодлогод нийцэхгүй гэдгийг мэдэгдэж байна.
-
Хэрэг бүртгэлийн хэрэг үүсгээгүй байгаа энэ цаг хугацаанд заавал прокурорын зөвшөөрөлтэй хийдэг үзлэг, нэгжлэг, эд зүйл хураан авах ажиллагааг фэйсбүүк хаягаар ирсэн гомдлын мөрөөр явуулсан. Мөн хэрэг бүртгэлт, мөрдөн байцаалтын шатанд хэргийн оролцогчоос гаргуулдаг нууц хадгалах баталгаанд гарын үсэг зуруулахаар танилцуулсныг өмгөөлөгчид зогсоож, татгалзсан учраас ийнхүү мэдэгдэл гаргах боломжтой үлдсэнийг мэдэгдэж байна.
Ноорог үүсгэн байгуулагдсан цагаасаа ялгаварлан гадуурхалт, хүний эрх, хүүхэд хамгаалал, орчны хүртээмжтэй байдал зэрэг сэдвүүдийг хөндөж, хувь хүний нууцад хамааралтай, нууцад халдсан аливаа сэдэв, контентийн төрлөөс зайлсхийсээр ирсэн гэдгээ мөн албан ёсоор мэдэгдэж байна.
Тохиолдсон үйл явдалтай холбоотой мэдэгдэл хийсэн олон улсын болон дотоодын иргэний нийгэм, хэвлэл мэдээллийн байгууллагуудын шаардлага, мэдэгдлийг доор хавсаргаж байна.
Nest Center for Journalism Innovation & Development, Mongolia
Монголын сэтгүүлчдийн нэгдсэн эвлэл
Mongolian Peacebuilding Institute
Талархал: Мэдэгдэл гаргасан бүх байгууллагууд, энэхүү үйл явдалд ач холбогдол өгч мэдээллийг олон нийтэд түгээсэн үзэг нэгт сэтгүүлчид, хэвлэл мэдээллийн салбарынхан, хэвлэлийн эрх чөлөөг дурангаараа хамгаалагч зураглаачдадаа Ноорог-ийн хамт олны зүгээс тусгайлан талархал илэрхийлж байна.
