Опозит хамтлагийн "Болор цом" нэртэй тоглолтын тасалбар аль хэдийн худалдаалагдаж эхэлсэн. Гэтэл Монголын Зохиолчдын Эвлэл нь Монгол Улсын Оюуны өмчийн газрын даргын 2024 оны А/126 тоот тушаалаар олон жилийн түүхтэй оны шилдэг шүлэг шалгаруулах “Болор цом” зэрэг утга зохиолын наадмуудын Барааны тэмдгийг эзэмшдэг байна.

Дээрх асуудалтай холбогдуулан МЗЭ-ийн удирдах албан тушаалтнаас тодруулахад "Албан ёсны уулзалт хийнэ. Болор цом, Алтан өд зэрэг наадмын оюуны өмч, барааны тэмдэгийн гэрчилгээг МЗЭ эзэмшдэг. Хэрвээ тухайн наадмуудын нэртэй давхацсан урлаг, соёлын арга хэмжээ зохион байгуулах бол зайлшгүй зөвшөөрөл авах учиртай. Бид удахгүй Опозит хамтлагийнхантай уулзана" гэсэн мэдээллийг өглөө. 

Түүнчлэн "Барааны тэмдэг" гэж иргэн, хуулийн этгээд өөрийн бараа, үйлчилгээг бусад этгээдийн бараа, үйлчилгээнээс ялгах зорилгоор хэрэглэх ялгагдах чадвартай илэрхийлэл юм. Барааны тэмдэг нь үг, дүрс, үсэг, тоо, гурван хэмжээст дүрс, өнгө, өнгөний хослол, дуу авиа, үнэр, эсхүл тэдгээрийг хосолсон байдлаар илэрхийлэгдэж болно.