Эрчим хүчний хууль тогтоомжийг шинэчлэн боловсруулах үүрэг бүхий Улсын Их Хурлын ажлын хэсгээс өнөөдөр орон сууц, нийтийн аж ахуйн үйл ажиллагаа эрхэлж буй хувийн хэвшлийн аж ахуйн нэгжийн төлөөллүүдэд Дулаан хангамжийн тухай хуулийн төслийг танилцуулав. Ажлын хэсгийн ахлагч, Улсын Их Хурлын гишүүн М.Энхцэцэг Монгол Улсын эрчим хүчний систем, салбарын нөхцөл байдлыг судалж, үнэлгээ дүгнэлт өгсөн болон гадаадын орнуудын эрчим хүчний салбарын хууль, эрх зүйн орчныг судалсан талаар дэлгэрэнгүй ярьж, Эрчим хүчний тухай хуулийг шинэчлэн найруулж, дулаан болон цахилгаан хангамжийн тус тусад нь, бие даасан байдлаар боловсруулсан үндэслэл, шаардлагыг тодорхой дурдав.
Дулаан хангамжийн тухай хуулийн төслийн танилцуулгыг Ажлын хэсгийн гүйцэтгэх багийн зөвлөх, инженер Х.Эрдэнэчулуун хийж, төслийн бүлэг, зүйл заалт бүрээр тодорхой мэдээлэл өгсөн юм. Үүний дотор дулааны эрчим хүчний систем, дулаан хангамжийн байгууллагууд, сүлжээний холболт, техникийн нөхцөл, үнэ тариф, тоолуур болон хэрэглэгчийн эрх, аюулгүй байдал, хяналт зэрэг асуудлаар дэлгэрэнгүй танилцуулав.
Хуулийн төслийн танилцуулгыг ажлын хэсгээс өчигдөр (2025.05.05) нийслэлийн өмчит “Орон сууц, нийтийн аж ахуйн удирдах газар” үйлдвэрийн газарт танилцуулсан юм. Тус үйлдвэрийн газар аж ахуйн тооцоотой ажилладаг бөгөөд нийслэл хотын нийт хэрэглэгчдийн 50 хувьд дулааны эрчим хүч, хэрэглээний халуун, хүйтэн усны хангамж, үйлчилгээг үзүүлдэг юм. Үлдэх 50 хувьд хувийн хэвшлийн аж ахуйн нэгжүүд үйлчилгээ үзүүлдэг бөгөөд өнөөдрийн байдлаар Улаанбаатар хотын хэмжээнд энэ төрлийн үйл ажиллагаа эрхэлж буй 52 аж ахуйн нэгж байна.
Орон сууц, нийтийн аж ахуй компаниудын инженер, техникийн ажилтнууд Дулаан хангамжийн тухай хуулийн төслийн үзэл баримтлал, үндсэн концепцийг дэмжиж буйгаа илэрхийлээд, шугам сүлжээний насжилт, ашиглалт, эзэмшил болон засвар үйлчилгээний ажил, үнэ тариф болон ухаалаг тоолуур, түүний мэдээллийг алсын зайнаас хүлээн авах тоноглол, түүний програм хангамж, хөрөнгө оруулалт, хэрэглэгчид, хувийн хэвшлийг төрийн бодлогоор дэмжих, түгээх сүлжээ болон Сууц өмчлөгчдийн холбооны эзэмших шугамын заагийн нарийвчлан тогтоох, хууль хоорондын зөрчлийг арилгах, хэрэглээний халуун болон цэвэр усны харилцааг мөн хуулийн төсөлд харгалзан үзэх зэрэг олон асуудлаар саналаа хэллээ.
Салбарын оролцогчдоос хуулийн төсөлд санал авах уг хэлэлцүүлэгт ажлын хэсгийн гишүүн, Улсын Их Хурлын гишүүн Д.Энхтуяа, Ж.Золжаргал нар оролцож, эрчим хүчний салбарын эрх зүйн шинэчлэлийн хүрээнд тус ажлын хэсгээс хийж буй бодлого, судалгааны ажлын талаар товч танилцуулан, хуулийн төсөлд саналаа өгч, идэвхтэй оролцохыг хүслээ гэж Улсын Их Хурлын Хэвлэл мэдээллийн газраас мэдээлэв.
