2021 он, Ковидын цар тахлын хатуу жил байлаа. Тухайн үед Засгийн газрыг тэргүүлж байсан, одоогийн Ерөнхийлөгч Ухнаагийн Хүрэлсүх өөрийн хүсэлтээр огцорч түүнийг залгамжилж гарч ирсэн хүн бол Л.Оюун-Эрдэнэ. Өнөөдөр түүний гэр бүлийг тойрсон шуугиан хурцдаж иргэд, залуус түүнийг огцруулахаар "Огцрох Амархан" жагсаалд нэгдсээр байна. 

Тэрбээр 2021 онд Ерөнхий сайд болсноосоо хойш цөөнгүй жагсаалын нүүр үзжээ. Тэдгээрийн хамгийн том нь 2022 оны сүүлээр болсон "Нүүрсний хулгайн эсрэг" жагсаал байв.

NoNaadam

Өнгөрсөн дөрвөн жил гаруйн хугацааны эхэнд 2021 оны 6-7 дугаар сард “NoNaadam” жагсаалын нүүрийг үзсэн. "NoNaadam" хөдөлгөөнөөс иргэдийг эрх чөлөөгөө хэтрүүлсэн хэмээн басамжлан доромжилсон Ерөнхий сайд Л.Оюун-Эрдэнэ, түүний Засгийн газрыг огцрохыг шаардаж байлаа. 

“Монголоо аваръя” жагсаал

МУГЖ, УИХ-ын гишүүн асан С.Жавхлан суулт зарлаж, Засгийн газрыг огцрохыг шаардаж, 2021 оны аравдугаар сарын 23-ны өдрөөс эхлэн Сүхбаатарын талбайд “Монголоо аваръя” нэртэй жагсаалыг зохион байгуулсан. Тэрбээр суулт хийх явцдаа өлсгөлөн зарлаж, улмаар 17, 18 хоног гадаа хүйтэнд суусны улмаас биеийн байдал нь муудаж, эмнэлгийн байгууллагад хүргэгдсэн. Ийнхүү жагсаал, цуглаан хийх үеэр Засгийн газар болон УИХ-ын гишүүдээс нэг ч удаа С.Жавхлан болон түүнийг дэмжиж үзэл бодлоо илэрхийлж буй иргэдтэй уулзаж, сонсоогүй юм. 

Эмч нарын жагсаал

2021 оны зургаадугаар сарын 26-наас эхлэн 10 гаруй хоног үргэлжилсэн уг жагсаалаар эмч ажилчдын цалинг хоёр дахин нэмэгдүүлж, ачаалалтай ажиллаж байгаа эмч нарын өөрсдийнх нь эрүүл мэнд, аюулгүй байдлыг хангах, хүний нөөцийн дутагдалтай байдлыг бодлогоор зохицуулах шаардлагыг Засгийн газарт хүргүүлсэн. Голлох шаардлага нь цар тахлын хүнд нөхцөлд ажиллаж буй эмч ажилчдын цалин урамшууллыг улаан, ногоон бүс гэж ялгавартай байдлаар олгохгүйгээр бүгдэд ижил тэгш хандахыг тайлбарлаж, Сүхбаатарын талбайд суулт зарласан. Хэрэв цалин нэмэгдүүлэхгүй бол ажил хаялт зарлахаа илэрхийлсэн байдаг. 

Тэд Засгийн газрын шийдвэрт хууртагдсан. Засгийн газрын зүгээс судалж байна гэсэн шийдэлгүй хариу үйлдэл үзүүлж байсан ба тайван суулт зохион байгуулагчдад хэрэг үүсгэн, шалгаж дарамталсан. Тухайн суулт зарласнаас хагас жилийн дараа үргэлжлүүлэн тууштай тэмцэнэ гэдгээ мэдэгдэж байв.

“Монголдоо сайхан амьдаръя” жагсаал

“Монголдоо сайхан амьдаръя” жагсаал 2022 оны дөрөвдүгээр сарын 7-9-ний өдрүүдэд Сүхбаатарын талбай, Маршалын гүүр цахим орчинд болсон. Нийтдээ 10-15 мянган хүн оролцсон. Төв талбай дээрх жагсагчдын гол уриа нь “Эх орондоо сайхан амьдармаар байна”, “Үнийн өсөлтийг зогсоо”, “Ажлаа хий”, “Хүнсээ авч хүчрэхгүй 21-р зуун”, “Тэвчээр тасарлаа” гэх мэт уриа лоозонтой байсан юм. Жагсаал цуглаан үндсэн зорилгодоо хүрсэн. Жагсагчдын 15 зүйл бүхий шаардлагыг хэрэгжүүлэх ажлын хэсэг байгуулахаар шийдвэрлэсэн. Ерөнхий сайд Л.Оюун-Эрдэнэ уулзаж, санал хүсэлтийг нь сонсов. Улмаар Засгийн газрын ээлжит бус хуралдаан зарлаж, залуучуудын шаардлагыг хэлэлцэхээр болсон.

Нүүрсний хулгайн эсрэг жагсаал

2022 оны 12 дугаар сард олон мянган хүн өвлийн хүйтнийг үл ажран жагссан. Олон нийтийн дургүйцэл дээд цэгтээ байсан мөчид иргэдтэй уулзаж, тайлбар өгөхөөр Ерөнхий сайд Л.Оюун-Эрдэнэ, ХЗДХ-ийн сайд Х.Нямбаатар нар гарч ирлээ. Дөрөв дэх өдрөө  жагсаж буй иргэд бухимдлаа илэрхийлж шуугилдан, Ерөнхий сайд руу дайрч байв. 

Ерөнхий сайд, Үг хэлэх, жагсаж цуглах эрхээ эдэлж байгаа та бүхэндээ талархаж байна. Манай улсын эдийн засгийн дийлэнх хүчийг уул уурхайн салбар бүрдүүлдэг.  Гол  нь нүүрс, зэс. Тиймээс нүүрстэй холбоотой, зэсийн орд газруудтай холбоотой улстөрчид, хууль хяналтын байгууллага, шүүх зэрэг олон хүмүүсийн бүлэглэл амь бөхтэй оршсоор байна. Энэ асуудалтай Монгол Улсын Засгийн газар тэмцсээр ирсэн. Бүлэглэлтэй хийх тэмцэл тийм амар байгаагүй. 

Одоо бид шийдвэрлэх үедээ ажиллаж байна, энэ бол нүүрсний хулгай. Засгийн газар Тавантолгой компанид онцгой дэглэм тогтоогоод 14 хонож байна. Засгийн газрын өнөөдрийн хуралдаанаар 14 хоногийн ажлын үр дүнг авч хэлэлцсэн. Олон асуудлыг илчилж, гарган тавьж байгаа. Тийм учраас нүүрсний хулгайн асуудал Оюутолгой, Хөгжлийн банк, Эрдэнэт үйлдвэрийн 49 хувьтай адилхан шийдэгдэж, үр дүнд хүрнэ. 

Тавантолгой компанийн захиалгаар залуусын жагсаалыг эмх замбараагүй байдалд уриалан дуудаж байгаа хэсэг бүлэг бий. Иргэд маань ялгаж салгаж хандана гэдэгт итгэж байна.

Нүүрсний хулгайтай холбоотой асуудлыг Монгол Улсын Засгийн газар илрүүлэхийн төлөө тэмцэх болно. Ард түмэн та бүхэн бидэнтэй хамт байна гэдэгт итгэж байна гэж хэлсэн байдаг. 

"Огцрох амархан"

Ерөнхий сайд Л.Оюун-Эрдэнийн хүү О.Тэмүүлэнгийн найз охин Ө.Өгөөмөрийн инстаграм хаяг дахь тансаг хэрэглээний зургуудаас үүдэлтэй асуудал улс орны хэмжээнд том шуугиан боллоо. Улмаар Ерөнхий сайдын орлогыг нотолж, огцруулах ч асуудал яригдаж байна.

Тэрбээр жагсагчдын өмнө гарч ирээгүй ч хэвлэлд өгсөн тайлбартаа, "Ард түмнээсээ дахин уучлалт гуйя, сэтгэл санааг нь чилээж эргэлзээ төрүүлсэндээ уучлалт хүсье. Надтай холбоотой нотлогдоогүй сэтэрхий тэвнэ, сиймхий хадаг байдаг юм бол би хариуцлага хүлээхэд бэлэн байна. Хэрэв миний хүүгийн орлого нотлогдохгүй бол би хариуцлага хүлээхэд бэлэн байна. Өнгөрсөн хугацаанд олон зүйл туулахдаа надад энэ байтугай цохилтууд ирэх байх гэж бодож байсан. Сэтгэл зүйн хувьд үргэлж бэлэн амьдарч байсан. Харин одоо явж буй Баялгийн сангийн хууль, Хөрөнгө хураах хууль гэх мэтийг зориудаар улс төрийн зорилгоор ашиглах гэж буй "ялаа"-нуудад хандаж хэлэхэд та нар яагаад ч миний итгэл үнэмшил, үзэл санаа, тэмцлийг бөхөөж чадахгүй, битгий горьд!" гэсэн юм. 

Л.Баяр