Нийгэм, соёлын урсгал даган бидний амьдрал ч хувьсан өөрчлөгдөж байна. Зарим нь үл анзаарагдах боловч түр азнаад харвал олон янзаар хувирч байгаа. Тэдгээр зүйлсийн тухай “24tsag.mn” сайтаас долоо хоног бүр тантай хуваалцдаг билээ.

Залуучуудын хэлж байгааг сонсож байна уу? Үнийн өсөлт, эдийн засгийн савалгаанд "залуу нас"-аа ч мартаад ажиллаж хөдөлмөрлөж, нийгмийн даатгал, татвараа төлж, ардчилал, эрх чөлөөний сургийг хамгийн их сонсож, авдаг хэдэн төгрөгөө хураан хуримтлуулж гэр оронтой болохоор ажилч шоргоолж шиг ажил, гэрийн хооронд шогшиж яваа залуусын үгийг сонссон гэж найдаж байна. 

Залуусын мөрөөдөл тухлаг байр, хөл залгах унаа, хадгаламжийн дэвтэр, гайхалтай аялалууд байж болно. Монголд үүнийг мөрөөдөж болно. Гэхдээ зөвхөн "мөрөөдөж" л болно. Суурь хөрөнгөгүй бол хичээгээд, хичээгээд мөрөөдөлдөө хүрч чадахгүй. Чадсан зарим нь зээлтэй. Чадсан зарим нь гадаадад зорчсон тэмдэглэлтэй л байгаа вий. Яагаад эх орондоо үүнийг мөрөөдөж болохгүй байгааг мэдэрч буй биз. 

Гэсэн ч эх орондоо хайртай, гэсэн ч монгол хүн болж төрсөндөө бахархдаг. Энэ үг зүрхний үг билээ, бахархал, итгэл найдвар билээ.

Харин ард түмэн хөлс урсаж байхад хэн нэг даргын шүлс гоожиж байдаг нь тохуутай юм. Хүний боломжийг булаахгүйгээр, зориг зүрхийг нь мохоохгүйгээр хүндлэлт нэгэн болж үлддэг удирдагчийн үе хэзээ ирнэ дээ.