Жил бүр уламжлал болгон зохион байгуулагддаг олон улсын Улаанбаатар марафон өнөөдөр буюу тавдугаар сарын 24-ны өдөр болж байна. Марафонд гүйхээр нийт 23 мянга гаруй хүн бүртгүүлжээ. Гүйгчдийн тал хувь нь буюу 14 мянга нь эрүүл мэндийн гүйлтийн төрөл болох 5 км-т гүйхээр бүртгүүлсэн байна.
Оролцогчид өмнөх жилүүдтэй адил 500 метрээс 42 км хүртэл долоон төрөлд гүйнэ. Харин 5 км, 21, 42 км зайд гүйгчид шинэ маршрутаар гүйх аж. Тодруулбал, 5 км зайд гүйгчид өнгөрсөн жилийнхтэй адил замаар гүйх боловч нар буруу тойрог гүйх бол 21, 42 км зайд гүйгчид “Дүнжингарав” худалдааны төвийн урдуур дугуйн замаар гүйж шинэ гүүр давснаар барианд орох юм.
Ийнхүү уншигч та бүхэнд "Улаанбаатар марафон"-ы тухай дараах мэдээллийг хүргэж байна.
“УЛААНБААТАР МАРАФОН"-НЫ ТУХАЙ
"Улаанбаатар марафон" нь 2014 оноос хойш Нийслэлийн Засаг даргын Тамгын газраас зохион байгуулж буй олон улсын тэмцээн бөгөөд Монгол Улсад гүйлтийн спортыг хөгжүүлэх, иргэдийн оролцоог нэмэгдүүлэх, залуучуудын бие бялдар, оюун санааны эрүүл мэндийг дэмжих зорилготой. Оролцогчдынх нь хүрээ жилээс жилд нэмэгдэж ирсэн Улаанбаатар марафонд анх 15 мянга гаруй иргэн оролцож байсан бол өнөө жил 23 мянга гаруй иргэн бүртгүүлжээ.
“УЛААНБААТАР МАРАФОН"-НЫ ГҮЙЛТИЙН ТӨРЛҮҮД
- 1.5 км
Хамгийн ойрын зайн энэ төрөл нь гэр бүл болон тусгай хэрэгцээт иргэдэд зориулсан төрөл бөгөөд найз нөхөд, гэр бүлээрээ бие биеэ хүлээж, дэмжиж, урамшуулан хамтдаа бариандаа орж, тухайн өдрийг дурсамж дүүрэн өнгөрүүлдэг. Уг төрөлд нэг гэр бүлээс хэдэн ч гишүүн гүйх боломжтой. Бүртгэлийг гэр бүлийнхээ нэг гишүүний бүртгэлийн хаягаар хамтад нь хийх бөгөөд гүйх гишүүн тус бүр 5000 төгрөгийн хураамж төлнө.
- 5 км – Эрүүл мэндийн гүйлт
Хэрэв та анх удаа гүйх гэж байгаа бол энэ төрөлд бүртгүүлэх нь хамгийн тохиромжтой. Гүйлтийн спортоор хичээллээд удаагүй эсвэл тодорхой хэмжээнд спортоор хичээллэдэг, фитнест явдаг хүмүүс энэ төрөлд бүртгүүлэх нь илүү оновчтой юм. Хураамж: 10,000 төгрөг
- 10 км
Гүйлтийн спортоор тогтмол хичээллэдэг, амьсгалаа зөв хуваарилж сурсан, гүйх арга барил эзэмшсэн хүмүүс энэ төрөлд гүйх нь төгс сонголт. 10 км нь тэвчээр шаарддаг атлаа нэг мэдэхэд л дуусчихдаг зай юм. Хураамж: 50,000 төгрөг
- 21 км хагас марафон
Энэ төрөлд урьд нь марафонд гүйж байсан туршлагатай, дор хаяж 2-3 сар бэлтгэл хийсэн хүмүүс оролцвол зохистой. Хагас марафонд гүйх бол зориулалтын гутал, хувцас, тоноглол зэргээ сайтар зэхэж бэлтгэх хэрэгтэй. Хураамж: 70,000 төгрөг
- 42 км марафон
Бэлтгэлийн үеэр багадаа 21 км-т хэд хэдэн удаа гүйж үзсэн хүмүүс 42 км-т гүйхээр сонгодог. Хэрэв энэ төрөлд амжилттай гүйж чадах юм бол өөрийнхөө чадварын хязгаарыг давах нэг томоохон сорилт болно гэж үздэг билээ. Хураамж: 90,000 төгрөг
- Тусгай олимп төрөл буюу 500, 800 метр зайд гүйгчдээс бүртгэлийн хураамж авахгүй.
Марафонд гүйх хүсэлтэй иргэд https://ulaanbaatar.marathon.mn/ цахим хаягаар болон “Hipay” аппликейшнаар бүртгүүлэх боломжтой. Гүйлтэд оролцогчийн иргэний үнэмлэх, гадаад паспорт болон https://ulaanbaatar.marathon.mn/ цахим хуудас, Hipay аппликэйшнээр хийсэн төлбөрийн баримтыг үндэслэн энгэрийн дугаар олгож бүртгэл баталгаажсанаар гүйлтэд оролцох эрх нь нээгдэх юм.
-“УЛААНБААТАР МАРАФОН"-д оролцож байсан ДЭЛХИЙН ШИЛДЭГ ТАМИРЧИД-
- Кени Улсын бүтэн марафоны тамирчин Серой Андерсон Сайтоти
Итали Улсын “Венис-2021” марафонд 2:12:21 секундийн амжилтаар алтан медаль хүртэж байсан. 2020 онд Тайландад болсон “Amazing Thailand Marathon”-д 2:23:52 секундийн амжилтаар долдугаар байрт, “Шиамэн – 2020” марафонд 2:13:47 секундийн амжилтаар наймдугаар байранд тус тус шалгарсан, Кени Улсын шилдэг тамирчдын нэг.
- Кени Улсын бүтэн марафоны тамирчин Киура Денис Мугенди
Тэрбээр “Chi Zhou-2019” тэмцээний алтан медальт, Итали Улсын “Палермо-2021” марафонд 2:23:54 секундийн амжилт, 2016 онд болсон “Чунгчин” олон улсын тэмцээнд 2:21:05 секундийн амжилт үзүүлж, шилдэг 20-д шалгарсан тамирчин юм.
- Казакстан Улсын бүтэн марафоны тамирчин Айгараев Султан Арманулы
“Шымкент 2021” марафонд 01:15:23 секундийн амжилтаар хоёрдугаар байр, Албан ёсны марафон гүйлтийн 10 зай, “Алма-Аты” марафон, “Иссык-Куль марафон”, “Астана марафон” зэрэг марафонд амжилттай оролцсон Казакстан Улсын шилдэг тамирчдын нэг.
- Казакстан Улсын бүтэн марафоны тамирчин Скендир Дархан
Тэрбээр “Алматы 2022” хагас марафонд тэргүүн байр, “Залуу гүйгч уралдаан 2022” марафонд болон “Копа 2022” марафонд тус бүр гутгаар байр, “Шымкент -2021” марафонд тавдугаар байр, “Туркестан 2021” марафонд зургадугаар байрын шагнал хүртсэн Казакстан Улсын нэр хүндтэй тамирчин юм.
- Франц Улсын хагас марафоны тамирчин Боукебал Азиз
Испани Улсад болсон “Барселон-2022” хагас марафонд оролцож, 1:03:54 секундийн амжилтаар 13-р байрт шалгарсан тамирчин юм.
- Япон Улсын хагас марафоны эмэгтэй тамирчин Акемото Ай
2022 онд Япон Улсад болсон “Hofu Yomiuri“ бүтэн марафонд оролцож, 2:34:17 секундийн амжилт үзүүлж хүрэл медаль медаль хүртсэн. 2019 онд Япон улсад болсон Үндэсний корпорацийн нэрэмжит хагас марафонд 1:12:49 секундийн амжилт үзүүлсэн.
-ЭНЭ ЖИЛ “УЛААНБААТАР МАРАФОН"-Д УРИГДСАН ШИЛДЭГ ТАМИРЧИД-
