Гэр бүл судлаач, ШУ-ны доктор, профессор Төмөр-Очирын Намжил багшийн маань нэрэмжит “XXI ЗУУНЫ МОНГОЛ ГЭР БҮЛ” ОУ-ын эрдэм шинжилгээний бага хурал зохион байгуулагдаж байна.

УИХ-ын гишүүнээр ажиллах хугацаандаа Т.Намжил багштайгаа болон шавь нартай нь хамтран Завхан аймгийн бүх сумдад гэр бүлийн харилцаа, хандлага, хүний хөгжил, нийгмийн хөгжил төлөвшин тогтох суурь нь гэр бүл гэдгийг 8 настай балчраас 80 настай буурай хүртэл ойлгуулан таниулахын төлөө ажиллаж байлаа. 

Өнөөдөр энэ цаг үед гэр бүл судлаач багш, эрдэмтэн, соён гэгээрлийн төлөө зүтгэдэг, ажилладаг олон хүмүүстээ гэр бүлийн чиглэлээр бодлогын түвшинд хийгдэх чухал ажлууд төлөвлөгдсөн өөрчлөлт, шинэчлэлийн онцлог үе ирж байгааг дуулгахад таатай байна. 

Монгол Улсын Засгийн газраас 2026 оныг Боловсролыг дэмжих жил болгон зарлаж, “Гэр бүлийн боловсролыг дэмжих хөтөлбөр”-ийг боловсруулах ажил хийгдэх гэж байна. Миний бие ажлын хэсгийн гишүүний хувьд өнөөдрийн хурлаас гарсан санал, зөвлөмжийг уламжилж, судлаачдынхаа дуу хоолой болж ажиллана. 

Дэлхий даяар технологийн хурдацтай эн зэрэгцэн хүнээ хүнээр нь авч үлдэх, үндэстнийхээ онцлогийг хадгалах, үр хойчдоо өв уламжлалаа хэрхэн өвлүүлэх талаар хамгийн их анхаарч, бодлого шинэчлэлээ хийсээр байна. Манай улс энэ чиглэлээр хоцрогдолтой явж байгаа боловч одоо гарч буй чухал шийдвэрүүд том ахиц авч ирнэ гэдэгт итгэж байгаа. 

Олон жилийн турш хүч хөдөлмөрөө зарцуулан судалдаг, зүтгэдэг, соён гэгээрлийн төлөө чармайн ажилладаг гэр бүл судлаач нартаа маш их талархаж байна. Монгол гэр бүлийн тогтвортой байдал, нийгмийн хөгжилд хамтдаа хувь нэмрээ оруулахад бэлэн байна. Та бүхний санал, зөвлөмжийг үргэлж сонсож ажиллана. 

Өнөөдрийн хурлыг зохион байгуулсан Олон Улсын Улаанбаатарын Их Сургуулийн хамт олонд талархал илэрхийлье. Бүх багш, судлаач, эрдэмтдэдээ амжилт хүсэж, сайн сайхныг ерөөе.