-
2016 оны 11 сарын 14
Оросын спортын бөхийн холбооны тайлан-сонгуулийн хурал Оросын олимпийн хорооны байранд болж 17 бүс нутгийг төлөөлсөн 132 төлөөлөгч оролцож өнгөрсөн 4 жилд тус холбооноос явуулсан үйл ажиллагааг сайшаажээ. Хуралд ДБНХ-ны дэд ерөнхийлөгч Ахрол Рузиев, тус холбооны дэргэдэх Бөхийн нөхдийн клубын тэргүүн Аббас Аббасов нар хүндэт зочноор оролцсон байна.
Хурлаар олимпийн аварга, 1997 оноос хойш ерөнхийлөгчөөр ажиллаж байгаа Михаил Мамиашвилиг дахин улираан сонгожээ. Ерөнхийлөгчийн нэр дэвшигчээр ганцхан түүний нэрийг дэвшүүлсэн байжээ. Тэргүүн дэд ерөнхийлөгчөөр Георгий Брюсов, Омар Муртузалиев, Наталья Ярыгина, Арсен Фазаев, Виктор Игуменов нарыг баталжээ.
М.Мамиашвили ерөнхийлөгчөөр сонгогдсоны дараа талархлаа илэрхийлж үг хэлэхдээ “Итгэл хүлээлгэсэнд баярлалаа. Манай шигшээ баг олимпийн шинэ мөчлөгт тэргүүлэх байр сууриа хадгалж байх ёстой. Олимпийн дэвжээнд ноёрхож байх нь бидний тэргүүн зэргийн зорилго юм. Бүс нутгуудад бөхийн спортыг өргөн дэлгэрүүлж хөгжүүлэх нь бидний бас нэг гол зорилго юм.” гэжээ.
-
2016 оны 11 сарын 14
С.Зориг агсныг хөнөөсөн хэргийн мөрдөн байцаалтын ажиллагаа дуусч хавтаст хэргийг шүүхэд шилжүүлжээ. Тодруулбал, тус хэрэгт прокуророос яллах дүгнэлт үйлдэж, Сүхбаатар дүүргийн Эрүүгийн хэргийн анхан шатны шүүхэд шилжүүлсэн байна. Хуулийн дагуу хавтаст хэргийг шүүхэд шилжүүлснээс 14 хоногийн дотор шүүх хурлын тов гарах ёстой аж.
Уг хэрэгт Орхон аймгийн харьяат хоёр иргэнийг сэжиглэн ШШГЕГ-ын харьяа хорих 461-р ангид саатуулан шалгаад жил гаруй хугацаа өнгөрөөд байна. Мөн хэрэгт С.Зоригийн эхнэр Б.Булганыг сэжигтнээр татан цагдан хорьж байсан ч сар гаруйн өмнө батлан даалтад гаргаад байгаа юм.
-
2016 оны 11 сарын 14
Улсын онцгой комиссын ээлжит хуралдаан маргааш 10.00 цагаас Төрийн ордон, Шадар сайдын өрөөнд болно. Энэ удаагийн хурлаар
- Ирэх саруудын цаг агаарын ерөнхий төлөв байдал,
- Хүнс, хөдөө аж ахуйн салбарын өнөөгийн байдал, авч хэрэгжүүлж буй арга хэмжээнүүд,
- Баруун аймгуудад гарсан мал, амьтны гоц халдварт өвчний нөхцөл байдлын мэдээлэл,
- Эрчим хүчний салбар, зам, тээврийн салбарын 2016-2017 оны өвөлжилтийн нөхцөл байдал,
- Эрүүл мэндийн салбарын өвөлжилтийн нөхцөл байдал, тулгамдаж буй асуудлууд,
- Нийслэлийн өвөлжилтийн нөхцөл байдал
- Цөмийн болон цацрагийн болзошгүй осол, агаарын хөлгийн осол, сүйрлийн үед эрэн хайх, аврах ажиллагааг зохицуулах хороо байгуулах тухай зэрэг асуудлыг хурлаар хэлэлцэх юм байна.
-
2016 оны 11 сарын 14
Төр нийгмийн нэрт зүтгэлтэн С.Зоригийг хөнөөсөн хэрэг 18 жилийн өмнө үйлдэгдэж, хэргийг одоо хүртэл хууль хяналтын байгууллага шалгасаар байна.
Уг хэрэгт С.Зориг агсны эхнэр Б.Булганыг цагдан хорьж байсан ч батлан даалтад гаргасан. Харин хэргийг прокурорын байгууллагад хянаж байгаа талаар УЕПГ-аас мэдээлж байсан юм.
Тэгвэл хэргийн мөрдөн байцаалтын ажиллагаа дуусчээ. Тодруулбал, УИХ-ийн гишүүн асан С.Зоригийн хэрэгт прокурор яллах дүгнэлт үйлдэж Сүхбаатар дүүргийн Эрүүгийн хэргийн анхан шатны шүүхэд шилжүүлсэн байна. Шүүхэд шилжсэнээр шүүгч хэрэгтэйгээ 30 хоногийн дотор танилцаж хурлын товыг гаргадаг. Шаардлагатай тохиолдолд хугацааг сунгаж болдог.
Юутай ч С.Зориг агсны хэргийн шүүх хурлын тов ирэх арванхоёрдугаар сүүлээр товлогдох нь.
-
2016 оны 11 сарын 14
МҮОНРТ дээр үүсгээд буй нөхцөл байдлын цаана ”Монголын үнэн” сонины эрхлэгч, уруул хэмээх Б.Ганболд буй талаар тус телевизийн ерөнхий захирал Ц.Оюундарь мэдэгджээ. Тэрбээр өөрийн цахим хуудсандаа
”МҮОНРТ дээр өрнөж буй үйл явдлын уг үндсийн талаар, бас миний тухай сүүлийн үед хэвлэл, сайтуудаар гарч байгаа нүүр дүүрэн цуврал мэдээллүүдийн талаар бяцхан тайлбар хийе гэж бодлоо.
-
2016 оны 11 сарын 14
Нийслэлийн Засаг даргын Дэд бүтэц, гэр хорооллын хөгжлийн асуудал хариуцсан орлогч П.Баярхүү “Аплас+ Монгол” компанийн гүйцэтгэх захирал Майкл Маршалыг өнөөдөр хүлээн авч уулзлаа. Аплас компани нь уул уурхай, инженер техник, барилга угсралт, үйлдвэрлэлийн салбарт үзлэг шалгалт, туршилтын цогц үйлчилгээ үзүүлдэг чанарын баталгаа, чанарын хяналтын зөвлөх үйлчилгээний олон улсын компани юм. Аплас компанийн захирал Майкл Маршал “Бид Монгол Улсад дөрөв дэх жилдээ үйл ажиллагаа явуулж байна. Өмнө нь Оюутолгой, Сайншандын салхин цахилгаан станц, Шангрила зочид буудлын барилга гэх мэт томоохон төслүүд дээр ажиллаж байсан туршлагатай. Энэ удаад бид Улаанбаатар хотын зүгээс хийж хэрэгжүүлэх гэж байгаа томоохон төслүүд дээр хамтран ажиллах саналтай байна” гэлээ. Засаг даргын орлогч П.Баярхүү “Улаанбаатар хот дэд бүтэц, автозам, дугуйн зам, хурдан замын “BRT” төсөл, Гэр хорооллын дахин төлөвлөлтийн хүрээнд АОС төсөл хэрэгжүүлэхээр ажиллаж байна. Мэдээж шинэ төсөл хэрэгжих, тоног төхөөрөмжийн нийлүүлэлтэд хөндлөнгийн хяналт шалгалт, дүн шинжилгээ хэрэг болох нь зайлшгүй юм. Үүнийг манай Хөрөнгө оруулалтын газар болон Хяналт шинжилгээ, үнэлгээний газар хийж гүйцэтгэдэг. Манай улсын хувьд эдийн засгийн амаргүй байдалд байна. Тиймээс энэ удаад та бүхний саналыг хүлээн авч хамтран ажиллах боломжгүй. Цаашдаа хамтран ажиллах боломж бүрдэнэ гэдэгт найдаж байна” хэмээн хэллээ гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.
-
2016 оны 11 сарын 14
Архангай аймгийн Тариат сум, Цэцэрлэг-Тосонцэнгэл чиглэлийн улсын чанартай авто замд байрлах Тэрхийн голын 217.1 у/м төмөр бетон гүүрэнд их засварын ажил гүйцэтгэж байгаа билээ. Хэдийгээр их засварын ажил дуусаагүй байгаа боловч 30 тн даацын хязгаарлалттайгаар үндсэн гүүрээр зорчих болсныг тус яамнаас иргэд, олон нийтэд мэдээллээ.
Тиймээс тээврийн хэрэгслийг тус голоор саадгүй нэвтрүүлэх зорилгоор Зам, тээврийн хөгжлийн яам болон Зэвсэгт хүчний жанжин штабын хооронд байгуулсан гэрээний дагуу хөвдөг гүүрийг өнгөрсөн долдугаар сарын 08-ны өдрөөс Тэрхийн гол дээр дэлгэн ажиллуулж, энэ сарын 08-ны өдөр хурааж авсан байна.
Төмөр бетон гүүрийн их засварын ажил дуусаагүй байгаа боловч 30 тн даацын хязгаарлалттайгаар үндсэн гүүрээр зорчих болсныг тус яамнаас иргэд, олон нийтэд мэдээллээ.
-
2016 оны 11 сарын 14
Зам,тээврийн хөгжлийн сайдын тушаалаар Балдандоржийн Алтанцомыг ИНЕГ-ын Тэргүүн дэд даргын үүргийг түр орлон гүйцэтгэгчээр томиллоо. Б.Алтанцом нь нислэгийн хөдөлгөөний удирдлагын инженер мэргэжилтэй. 1984 онд ИАТУЕГ-т Хөдөлгөөний диспетчерээр ажлын гараагаа эхэлснээс хойш иргэний нисэхийн салбарт тасралтгүй 32 дахь жилдээ ажиллаж буй, мэргэжлийн боловсон хүчин юм.
Тэрбээр 1984-1988 онд ИАТУГ-ын Хөдөлгөөн штурманы хэлтэст хөдөлгөөний диспетчер, 1988-1993 онд “МИАТ” нэгтгэлийн харьяа Агаарын хөдөлгөөн удирдах алба, Нислэгийн хөдөлгөөний хэлтэст нислэгийн ахлах удирдагч, байцаагч, инженер, 1993-1994 онд Нислэгийн хөдөлгөөн удирдах үндэсний төв/НХУҮТ/-ийн Тэргүүн дэд захирал, 1994-1996 онд ИАТУГ-ын Мэргэжлийн бодлогын хэлтэст мэргэжилтэн, 1996-1997 онд НХУҮТ-ийн Ерөнхий менежер, захирлаар ажиллаж байв. Мөн 1997-2000 онд “МИАТ” ХК-ийн Япон дахь төлөөлөгчийн газрын Ерөнхий төлөөлөгч, аэропорт менежер, 2000-2003 онд “МИАТ” ХК-д мэргэжилтэн, хэлтсийн дарга, 2003-2006 онд “МИАТ” ХК-ийн БНСУ дахь Ерөнхий төлөөлөгч, борлуулалтын менежер, 2006-2008 онд БНХАУ-ын Бээжин хотноо Азийг хариуцсан бүсийн захирал, 2008-2013 онд ИНЕГ-ын Аэронавигацийн үйлчилгээ хариуцсан дэд даргаар ажиллаж байсан аж.
-
2016 оны 11 сарын 14
Энэхүү уулзалт ярилцлагад GPPAC -ийн гүйцэтгэх захирал болон уг сүлжээний Зүүн хойд Азийн бүсийн төвийн удирдлага, тус бүсийн орнуудын эрдэмтэн судлаачид Солонгосын хойгийн асуудлаар зургаан талт хэлэлцээр явуулж байсан бүх орны төлөөлөл, төрийн бус байгууллагуудын төлөөлөгчид оролцож байгаа юм.
Дугуй ширээний уулзалт, ярилцлагад оролцогчид Зүүн хойд Азид цөмийн зэвсэггүй бүс байгуулах бололцоо, үүнд Монгол Улсын гүйцэтгэж болох үүрэг, Монгол Улсын цөмийн зэвсэггүй бүсийн статусыг цаашид баталгаажуулах зэргээр бүс нутгийн аюулгүй байдалтай холбоотой асуудлаар мэдээлэл солилцож, ярилцлага өрнүүлэн, төрийн бус байгууллагуудын үүргийг нэмэгдүүлэх, энх тайвныг бэхжүүлэхэд чиглэсэн бодитой санал санаачилгыг дэмжих чиглэлээр санал солилцож байна гэж УИХ-ын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.
-
2016 оны 11 сарын 14
Монгол Улсын Урлагийн Гавьяат Зүтгэлтэн, Монголын Хөгжмийн Зохиолчдын Холбооны шагналт, Пентатоник наадмын 5 удаагийн шагналт хөгжмийн зохиолч Л.Балхжавын “Миний дуунууд-2016” тоглолт 11-р сарын 18, 19-нд 19:00 цагаас “UB PALACE”-ийн концертын их танхимд болно.
Хөгжмийн зохиолч Л.Балхжав “Амин нутаг” анхны хөгжмөө бичсэнээс хойш Монголын хөгжмийн урлагт 40 жил уран бүтээлээ туурвиж,
ая данг нь тааруулсан 1000 гаруй дуу зохиожээ.Харин хөгжмийн зохиолчийн дотоод ертөнцийн илэрхийлэл, уран бүтээлийн тайлагнал “Миний дуунууд” тоглолт ийнхүү 18 нас хүрч, хэдийнэ эрийн цээнд хүрлээ.
Сэтгэлийн чимэг болсон аялгуут дуутай 18 дахь удаагийн “Миний дуунууд” тоглолтонд Монголын рок поп орчин үеийн хөгжмийн урлагийн шилдэг уран бүтээлчид дахин чуулах гэж байна. МУГЖ Т.Ариунаа, МУГЖ Б.Сарантуяа, МУГЖ Х.Лхагвасүрэн, МУГЖ Б.Дашдондог, СТА, поп дива С.Наран, СТА, хөгжмийн зохиолч Б.Чинбат, ОХУ-ын Буриад улсын Гавьяат жүжигчин Б.Амархүү, ”Sweetymotion” хамтлаг , ”Хар сарнай” хамтлагийн дуучин С.Амармандах, ”Номин талст” хамтлагийн дуучин Т.Дэлгэрмөрөн, дуучин Б.Баярцэцэг, ”Мотив” хамтлагийн дуучин Т.Ганбаатар, Улсын филармонийн гоцлол дуучин Ц.Хулан, дуучин А.Хишигдалай, Э.Соёмбо, ”My Voice-2015” уралдааны Гран-При шагналт Э.Хосбаяр, Хөгжим Бүжгийн Коллежийн симфони найрал хөгжим тус тус оролцож, аялгуу эгшигээр үзэгч олноо хөглөн баясгана.
Хөгжмийн зохиолчийн 2016 оны онцлох бүтээлүүдийн нэг нь Үндэсний их баяр наадмын сүлд дуу болон мэндэлсэн “Миний Монгол наадам” дуу юм. Сонгодог, нийтийн, рок попын бүхий л шилдэг уран бүтээлчдийн хамтрал болсон энэхүү дуун бүтээл энэ жилийн тоглолтын тайзнаас үзэгчиддээ дахин хүрнэ. Мөн цөөнгүй шинэ бүтээлүүд “Миний дуунууд-2016” тоглолтын тайзнаа анхлан дуулагдаж, сонсогчдын хүртээл болно. Дуунд дуртай монголчууддаа өргөн барих шинэ, шилдэг бүтээлүүдийн дээжис, гэнэтийн бэлэг бүхнээр тоглолт арвин байна.
Хөгжмийн зохиолчийн сэтгэлээс ундарсан үе үеийн бүтээл туурвил, шилдэг хамтлаг дуучдын зүрхнээс зүрхэнд эгшиглэх аялгуут дуу бүхэн үзэгч танд зориулагдав. Тоглолтын тасалбарын онлайн захиалга www.TICKET.mn сайтаар, 1900-1800 утсаар тасалбар хүргэлт хийгдэж байна.
Миний дуунууд хичнээн цаг хугацаа орон зайг туулан танд хүрч, баясал, гуниг ухаарлын алиныг авчрахыг би таашгүй...
Л.Балхжав
-
2016 оны 11 сарын 14
“Үндэсний чанарын зөвлөл”-ийн анхдугаар хуралдаан өнөөдөр боллоо. Хуралдааныг Монгол Улсын Шадар сайд У.Хүрэлсүх даргалж “Үндэсний чанарын хөтөлбөр”-ийн талаар хэлэлцлээ.
-
2016 оны 11 сарын 14
ДНБ, 2010 оны зэрэгцүүлэх үнээр энэ оны эхний 9 сард 11365.6 тэрбум төгрөг болж, өмнөх оны мөн үеэс 180.3 тэрбум төгрөгөөр /1.6 хувь/ буурчээ. Улирлын нөлөөллийг арилган тооцсоноор ДНБ, 2010 оны зэрэгцүүлэх үнээр энэ оны гуравдугаар улиралд өмнөх улирлаас 1.8 хувиар буурсан байна.
-
2016 оны 11 сарын 14
Улаан бурхан өвчний хүндрэлээс сэргийлдэг өндөр тунт А аминдэмийг энэ сарыг дуустал Өрхийн эрүүл мэндийн төвүүдээр дамжуулан зургаан сараас таван нас хүртэлх хүүхдүүдэд олгоно.
Жил бүрийн тав, арваннэгдүгээр сард А аминдэмийг уулгадаг бөгөөд
6-аас нэг настай хүүхдэд 100 000 олон улсын нэгж тунтай (цэнхэр өнгөтэй),
12-59 сартай буюу нэг наснаас 4 нас 11 сар 29 хоногтой хүүхдэд 200 000 олон улсын нэгж тунтайг (улаан өнгөтэй) уулгадаг юм байна.
Хүүхэд А аминдэм уух үедээ 6 сар хүрсэн байх ёстой. Харин таван нас хүрсэн бол уулгахгүй.
-
2016 оны 11 сарын 14
“Түрээсийн байр эзэмшигчдийн эрх ашгийг хамгаалах холбоо”-ноос 1971 оны тогтоолоор тухайн үеийн ЗСБНХУ (одоогийн ОХУ)-д олгосон байруудыг одоо оршин сууж буй иргэдэд нь хувьчлахыг Ерөнхийлөгч Ц.Элбэгдорж, УИХ-ын дарга М.Энхболд нараас шаардлаа.
-
2016 оны 11 сарын 14
Энэ оны гуравдугаар улирлын байдлаар Төрийн банкны нийт актив хоёр их наяд төгрөгт хүрсэн талаар тус банкны захирал Д.Баярсайхан “Зууны мэдээ”сонинд өгүүлжээ. Энэ нь манай банкны системд эхний тавд орох актив юм. Төрийн банкны нийт активт эзлэх чанаргүй зээлийн хэмжээ энэ оны гуравдугаар улирлын байдлаар 1.5 хувьтай байгаа аж. Монголын банкны системд чанаргүй зээлийн хувь одоогоор 4.1 байгаа юм. Өнгөрсөн есдүгээр сарын байдлаар Монгол Улсын хэмжээнд тэтгэвэр авагчдын 43 хувь нь буюу 156 мянга гаруй хүн Төрийн банкаар дамжуулан тэтгэврээ авч байгаа. Нийгмийн даатгалын сангийн мөнгөн хөрөнгийн 13.8 хувь нь Төрийн банкинд байршдаг билээ.
-
2016 оны 11 сарын 14
Өчигдөр буюу 11-р сарын 13-ны өдрийн оройн 22:00 цагийн орчимд “Under the dome” нэртэй БНХАУ-д нүүрлээд буй утааны гамшгийн талаар баримтат кино манай улсын мэдээллийн сувгуудаар нэгэн зэрэг цацагдсан. Тухайлбал, Ийгл, Боловсрол, UBS болон SBN гэх мэт нэр бүхий 10 орчим теллевиз нэгэн зэрэг нэвтрүүлсэн юм.
-
2016 оны 11 сарын 14
УИХ дахь МАН-ын бүлэг хуралдаж байна. Хуралдаанаар энэ долоо хоногт байнгын хороо,чуулганы хуралдаанаар хэлэлцэх хууль, тогтоолын төсөлд байр сууриа нэгтгэж байгаа юм. Хуралдаанаар хэлэлцсэн асуудлын талаар мэдээлэл хийхгүй гэж тус бүлгийн хэвлэлийн төлөөлөгч мэдээллээ.
-
2016 оны 11 сарын 14
МАН-ын бүлгийн хуралдаан 14:00 цагт эхэллээ. Хуралдаанаар гаалийн тариф, гаалийн татварын тухай нэмэлт өөрчлөлт оруулах тухай хуулийн төслийн танилцуулгыг сонсох аж. Мөн дэлхийн худалдааны байгууллагын худалдаа хөнгөвчлөх хэлэлцээрт Монгол Улс нэгдэн орох тухай асуудлыг хэлэлцэх юм. Түүнчлэн өвөлжилтийн бэлтгэл хангах асуудлаар салбарын сайд нартай бүлгийн гишүүд зөвлөлдөх юм байна.
УИХ дах МАН-ын бүлгийн хуралдаанд Барилга хот байгуулалтын сайд Г.Мөнхбаяр, Эрчим хүчний сайд П.Ганхүү нар оролцож байна.
-
2016 оны 11 сарын 14
АН-ын Гүйцэтгэх зөвлөл өнөөдөр 17.00 цагаас хуралдахаар болжээ. Хуралдаанаар энэ сарын 16-нд хуралдах Үндэсний зөвлөлдөх хороогоор хуралдах асуудлыг хэлэлцэж магадгүй талаар эх сурвалж мэдээлж байна.
-
2016 оны 11 сарын 14
Баруун болон төвийн аймгуудын ихэнх нутгаар 11 дүгээр сарын 12-ны өдрөөс эхлэн цас орж, салхи 12-14 м/с хүртэл ширүүсч цасан шуурга шуурсан бол 13-ны өдөр баруун аймгуудын нутгийн зүүн хэсэг, төв, зүүн аймгуудын ихэнх нутаг, говийн аймгуудын зарим газраар цас орж, 14-16 м/с хүртэл ширүүсч цасан шуурга шуурсан.
Цаг агаарын энэхүү хүндрэлтэй нөхцөл байдлын улмаас автозам, даваа цасанд хаагдах, хальтиргаа гулгаа үүсэх, үзэгдэх орчин хязгаарлагдах зэрэг хүндрэл гарсан тул иргэдийн амь нас, эрүүл мэнд, эд хөрөнгийг авран хамгаалах зорилгоор Улаанбаатар хотоос гарах бүх чиглэлийн хот хоорондын болон олон улсын автозамын хөдөлгөөнийг Зам тээврийн хөгжлийн сайдын 2016.11.13-ны өдрийн 82 дугаар тушаалаар 11 дүгээр сарын 13-ны өдрийн 13:00 цагаас 14-ний өдрийн 10:00 цаг хүртэл хугацаагаар хязгаарласан юм.
Онцгой байдлын асуудал эрхэлсэн байгууллагын албан хаагчид цасан шуурганд төөрсөн, автомашинтайгаа цасанд суусан зэрэг иргэдийн дуудлагаар ажиллаж 70 гаруй иргэдийн эрүүл мэнд, амь нас, аюулгүй байдлыг ханган ажиллалаа.
Тухайлбал, Төв аймгийн Сэргэлэн сумын Хөшигт багийн “Үнэгтийн-Үзүүр” гэдэг газар малчин Б /31 настай, эрэгтэй/ 2016.11.13-ны өдрийн 15:30 цагийн үед малдаа гарч яваад сураггүй болсон тухай дуудлагаар сумын Засаг даргын Тамгын газрын даргаар ахлуулсан орон нутгийн иргэд, Багахангай дүүргийн Онцгой байдлын хэлтсийн албан хаагчид эрэн хайх ажиллагааг зохион байгуулж Баян сумын “Хэхэрийн хоолой” гэдэг газраас 1000 орчим малтай нь эсэн мэнд олж ар гэрийнхэнд нь хүлээлгэн өгсөн.
Нийслэлийн Багахангай дүүргийн 1 дүгээр хороо, дүүргийн төвөөс 5 км зайтай “Алсын худаг” гэдэг газраас иргэн Г өглөө малаа хариулахаар яваад сураггүй болсон тухай дуудлагаар /2016.11.13-ны өдрийн 16:02 цагт/ тус дүүргийн Онцгой байдлын хэлтсийн Гал түймэр унтраах, аврах 80 дугаар ангийн албан хаагчид ажиллаж тус дүүргээс 7 км зайд “Өндөр толгой” гэдэг газраас иргэн Г /45 настай, эрэгтэй/-г 500 гаруй бог малтай нь төөрсөн байсныг эсэн мэнд олж ар гэрийнхэнд нь хүлээлгэн өгсөн.
Мөн Төв аймгийн Баян сумын 1 дүгээр баг, Санд гэдэг газраас Багахангай дүүргийн төв рүү явж байсан гурван иргэн төөрсөн, автомашины шатахуун дуусан гэсэн дуудлагыг 21:50 цагт өгснөөр Багахангай дүүргийн Онцгой байдлын хэлтсийн Гал түймэр унтраах, аврах 80 дугаар ангийн албан хаагчид эрэн хайх ажиллагааг зохион байгуулж 23:30 цагт төв аймгийн Сэргэлэн сумын 3 дугаар баг, Даац гэдэг газарт 39 настай, эрэгтэй, 38 настай, эмэгтэй, 51 настай, эрэгтэй нарыг Вонго загварын автомашины шатахуун дуусч, төөрсөн байдалтай байсныг эсэн мэнд олж аюулгүй газар хүргэсэн
Завхан аймгийн Тосонцэнгэл сумын Оргих багийн “Их мухар” гэдэг газар /сумын төвөөс урд зүгт 25 км-т/ 70-22 УБН улсын дугаартай “Мазда” загварын суудлын автомашин цасанд сууж, эвдэрсэн тухай дуудлагаар /2016.11.13-ны өдрийн 08:25 цагт/ тус аймгийн Онцгой байдлын газрын албан хаагчид ажиллаж автомашиныг татан гаргаж сумын төвд чирж авчран аюулгүй болгосон.
Дорнод аймгийн Баянтүмэн сумын Жаргалант багийн “Цагаан чулуут” гэдэг газар /аймгийн төвөөс баруун урагш 30 км/-т иргэн Б 31-79 ДОР улсын дугаартай “Аксент” загварын автомашин эвдэрч, цасанд суусан тухай дуудлагаар /2016.11.13-ны өдрийн 17:16/ тус аймгийн Онцгой байдлын газрын Эрэн хайх аврах ангийн албан хаагчид ажиллаж иргэн Б /70 настай эрэгтэй/, Э /40 настай эрэгтэй/, Т /21 настай эрэгтэй/, Б /20 настай эрэгтэй/ нарыг аварч, автомашиныг цаснаас татан гаргасан. /4 иргэн/
Дорнод аймгийн Хэрлэн сумын 2 дугаар багийн нутаг “Дэхт” гэдэг газрын орчимд иргэн Г /60 настай, эрэгтэй/ “Ниссан ипсум” загварын автомашинтай цасанд суусан дуудлагаар /2016.11.13-ны өдрийн 21:15 цагт/ тус аймгийн Онцгой байдлын газрын Эрэн хайх, аврах ангийн албан хаагчид ажиллан, “Портер” загварын 37-68 ДОР улсын дугаартай автомашинд /4 хүн/, “Ниссан ренеза” загварын 96-41 ДОА улсын дугаартай автомашинд /2 хүн/ нийт 6 иргэнийг аварч, 2 автомашиныг цаснаас татан гаргасан.
Дорнод аймгийн Сэргэлэн сумын “Ар хоолой” багийн нутаг “Галын гол” гэдэг газaр иргэн Б /29 настай, эрэгтэй/, А /40 настай, эрэгтэй/ нар 39-06 ДОР улсын дугаартай, Карина загварын автомашинтай цасанд суусан тухай дуудлагаар /2016.11.13-ны өдрийн 17:30/ тус аймгийн Онцгой байдлын газрын Эрэн хайх, аврах ангийн албан хаагчид ажиллан 39-06 ДОР улсын дугаартай, Карина загварын автомашинд /2 хүн/, “Субару фростер” загварын 28-99 ДОР улсын дугаартай автомашинд /6 хүн/, “Хонда фит” загварын 48-99 ОРО улсын дугаартай автомашинд /4 хүн/, “Портер” загварын 43-74 ДОР улсын дугаартай автомашинд /5 хүн/, “Ниссан сани” загварын 39-06 ДОР улсын дугаартай автомашинд /3 хүн/ нийт 20 иргэнийг аварч, 3 автомашиныг цаснаас татан гаргаж аюулгүй болгосон.
Дорнод аймгийн Матад сумын Буянбадрах багийн нутаг “Очиртын говь” гэдэг газaр /аймгаас зүүн урагш 75 км-т/ нийт 5 хүнтэй “Портер” загварын автомашинтай цасанд суусан тухай дуудлагаар /2016.11.13/ тус аймгийн Онцгой байдлын газрын Эрэн хайх аврах ангийн албан хаагчид ажиллаж “Бонго“ загварын 21-34 ДОР улсын дугаартай автомашинтай 5 хүн цасанд суусан байсныг татан гаргасан.
Дорнод аймгийн Чойбалсан сумын “Хулстай” багийн нутаг “Танкийн саад” гэдэг газaр /аймгаас зүүн хойш 25 км-т/ нийт 18 хүнтэй, “Приус”, “Фургон” загварын автомашинууд цасанд суусан тухай дуудлагаар /2016.11.13-ны өдрийн 23:55/ тус аймгийн Онцгой байдлын газрын Эрэн хайх аврах ангийн албан хаагчид ажиллаж “Приус-10“ загварын 54-84 ДОА улсын дугаартай автомашинд 3 хүн, Фургон автомашинд 12 хүн, нийт 15 хүнийг аварч, 2 автомашиныг цаснаас татан гаргасан.
Дорнод аймгийн Баянтүмэн сумын Өлзийт багийн “Цайдам” гэдэг газар /аймгийн төвөөс хойш 10 км/-т иргэн Х-гийн автомашин эвдэрсэн, цасанд суусан тухай дуудлагаар /2016.11.14-ний өдрийн 03:50 цагт / тус аймгийн Онцгой байдлын газрын Эрэн хайх аврах ангийн албан хаагчид ажиллаж “Приус-20“ загварын 33-31 УБА улсын дугаартай автомашиныг татан гаргаж сумын төвд авчирч аюулгүй болгосон гэж Онцгой байдлын ерөнхий газраас мэдээллээ.