Нийтийн тээврийн үйлчилгээг сайжруулж, цахим картаар үйлчлүүлдэг болгох ажил нээлтээ хийгээд нэлээд хэд хонож байгаа билээ. Гэтэл өдгөө цахим картаар үйлчлүүлж байгаа иргэд бараг алга.

Уг нь албаны хүмүүсийн мэдээлж буйгаар өнгөрсөн сарын 30-ны өдрийн байдлаар 500 мянган ширхэг “U money” карт хэвлэсэн бөгөөд 150 мянган ширхэг картыг худалдан борлуулсан гэх мэдээллийг өгсөн.

Гэтэл хачир дээрээ иргэд өнөөдрийг хүртэл картаа худалдаж аваагүй, хаанаас худалдан авах, хэрхэн үйлчлүүлэх гэх мэдээллийг бүрэн аваагүй л байх юм.

Нийтийн тээврийн шинэчлэх энэ ажлын хэрэгжилт хэр байгааг сонирхохоор нэлээд хэдэн автобусаар зорчлоо.

Хуучин автобусанд хойд талын хаалгаар орж, урд талын хаалгаар бууж үйлчлүүлдэг байсан. Харин нийтийн тээврийн шинэчлэх ажлын хүрээнд урд хаалгаар сууж, хойд хаалгаар буудаг болжээ. Энэ нь бас л нэг шинэчлэл гэлтэй.

Эхний автобусанд сууж картаа уншуулав. Харин бидний араас ганц нэгэн хүнд л карт уншуулж байгаа харагдлаа.  Харин зарим нэг нь хойд хаалгаар орж, кондукторт мөнгөө хураалгаж байсан бол нөгөө хэсэг нь урд хаалгаар орж мөнгөний хайрцагт мөнгөө хийж байв.

Кондуктор “Хайрцагт 500 төгрөг л хийнэ шүү. Хариулт нь гарц ирэхгүй. Картаа уншуулсан хүмүүс хойд хаалган дээр ирж бас картаа уншуулах ёстой шүү. Хэрэв уншуулахгүй бол карт чинь хаагдана” хэмээнэ.

Картаа уншуулсан иргэд “Их ачааллын үед бол энэ үнэхээр бүтэхгүй юм байна. Дүүрэн хүн чихчихсэн үед яаж хойшоо яваад картаа уншуулдаг юм” гэцгээн кондукторыг загнах шахам уцаарлацгаана.

Харин хайрцагт мөнгөө хийсэн үйлчлүүлэгч нарт жолооч тасалбар авч өгөх ёстой гэх боловч тийм зүйл харагдсангүй.

Ийнхүү хойд хаалган дэргэд байрлах карт уншигчинд картаа уншуулж, кондуктараас зарим нэгэн зүйлийг тодруулав. Тэрбээр нэр хэлж, зураг авахуулахыг хүссэнгүй. Зөвхөн асултанд хариулахыг зөвшөөрлөө. Түүнээс цахим картаар үйлчүүлэх ажил хэр явагдаж байгаа болон иргэд хэрхэн хүлээж авч байгаа талаар асуувал “Уг нь нийтийн тээврийг шинэчлэнэ гэж байгаа нь сайхан л юм. Гэхдээ энэ ажил амьдралд хэрэгжинэ гэдэг худлаа.

Өнөөдөр картаар үйлчлүүлж байгаа хүн бараг алга байна. Бас дээр нь картыг хоёр уншуулах нь буруу юм шиг санагдаж байна. Урд хаалгаар орж ирсэн хүн картаа уншуулахын тулд хүмүүсийн дундуур хойшоо зүтгэнэ гэдэг ёстой бүтэхгүй хэрэг. Бас дээр нь есдүгээр сараас ачаалал нэмэгдээд ирэхээр хүн болгоныг урд хаалгаар суулгах гээд дараалал үүсгээд зогсоод байх болоод байна. Ёстой л картын бараанд дугаарлаж байгаа юм шиг зүйл болох байх. Иргэдийн хувьд эхлээд автобусныхаа өнгө үзэмж, үйлчилгээг сайжруулчихаад дараа нь карт энэ тэрээ зохион байгуулахгүй л гэцгээж байна” гэсэн хариултыг өгөв.

Мөн түүнээс та бүхэнд тэгвэл өдрийн норм, орлого гэх зүйлийг өгч байгаа юу хэмээн лавлахад “Өгч байгаа. Орой болгон бааз дээрээ очиж бүх тооцоогоо хийж байгаа. Бидний ажлыг хөнгөвчилсөн зүйл байхгүй. Харин ч нэмэгдүүлээд байна. Зарим залуучууд урд хаалгаар орж мөнгөө хайрцагт хийгээгүй байж хийчихсэн гээд л хэрэлдээд үнэгүй зорчоод байх юм. Уг нь урд хаалгаар орж, хайрцагт мөнгөө  хийсэн, картаа уншуулсан хүмүүсийн жолооч хянах ёстой гэж байгаа ч үнэндээ тэр бүгдийг нэг бүрчлэн хянах боломжгүй бас тэр бүгдийг шүүж, энэ нь өгсөн энэ нь өгөөгүй гээд зарга шүүх цаг зав байхгүй шүү дээ” гэв.

Нийтийн тээврийн нэлээд хэдэн чиглэлийн автобусанд үйлчлүүлэхэд дээрх дүр зураг нэг л хэвийн давтагдаж байсныг дурдах нь зүйтэй болов уу.

Ямартай ч нэлээдгүй хөрөнгө мөнгө зарцуулж хийсэн энэхүү ажлыг үр дүнтэй болгож, бодит амьдрал хэрэгжүүлэх ажлыг эрчимтэй хийх хэрэгтэй байна гэдгийг холбогдох албаны хүмүүст дахин дуулгая. Түүнчлэн нийтийн тээврийн шинэчлэл хэмээгдэж буй энэхүү ажил салхинд бүү хийсээсэй гэх иргэд олон байна.