“I Love Mongolia” төслийн багийнхан энэ удаад Говь-Алтай аймгаас мэдээ мэдээллээ хүргэж байна.

Биднийг тус аймагт хүрэлцэн ирэх үеэр аймгийн аж ахуй эрхлэгчдийн “Нутгийн брэнд” үзэсгэлэн болж байв. Үзэсгэлэнд 100 гаруй аж ахуй нэгж оролцож байсан бөгөөд бүгд нутгийнхаа брэнд болсон бүтээгдэхүүнүүдийг дэлгэснээрээ онцлогтой байв. Шинэ жимсээр хийсэн дарстай, борлуулалт сайн чипсэн ааруултай үзэсгэлэнгийн мэдээлэлд тавтай морил.

Энэ үеэр Говь-Алтай аймгийн нийт иргэд болон зэргэлдээх аймаг сумдын иргэдэд ахуйн чиглэлийн үйлчилгээг нэг дор, нэг цэгээс хөнгөн шуурхай үйлчлэхийг зорилгоо болгосон “Шадар туслагч” ХХК-ийг үүсгэн байгуулагч, “Зах зээл бэлчээрийн удирдлагын хөгжил төсөл”-ийг идэвхжүүлэгч С.Эрдэнэчимэгээс зарим зүйлийг тодруулсан юм.

-“Шадар туслагч” ХХК хэдэн онд байгуулагдаж, байгуулагдсан цагаасаа хойш хэр ахиц дэвшилтэй ажиллаж байна?

-Манай компани 2007 онд байгуулагдсан. Баруун таван аймагтаа жишиг болохуйц ахуйн үйлчилгээний төв болдог бөгөөд 13 төрлийн үйл ажиллагаа явуулдагаараа онцлог юм.

Мөн аймаг орон нутагтаа НҮБ-ын хөдөө аж, ахуйг хөгжүүлэх олон улсын статустай “Зах зээл бэлчээрийн удирдлагын хөгжил төсөл”-ийг 2012 оноос хэрэгжүүлж байгаа нь аймаг, орон нутгийн иргэдийн талархыг хүлээгээд байна.

-Төслийнхөө талаар дэлгэрэнгүй мэдээлэл өгөхгүй юу?

-Говь-Алтай аймгийн 10 сумдад энэ төсөл хэрэгжээд байгаа төдийгүй Есөнбулаг суманд л гэхэд 36 бүлэг байгуулагдаад байгаа. Тодруулбал, төслийн журмаар аймгийн 10 гаруй сумдад 100 гаруй бүлэг байгуулагдсанаас 66 бүлгийн 329 гишүүн уг төсөл хөтөлбөрт хамрагдаад байна.

Энэ нь орон нутагт болон ард иргэдэд үр өгөөжөө өгч чадаж буйн илрэл  юм.  Цаашлаад уг төсөл хөтөлбөрт маань 1200 айл өрх,544 ам бүл хамрагдаж  сая төгрөгний хөнгөлттэй зээл авч төслийн үр шимийг хүртэн ажиллаж байна.

Энэ төсөл хөтөлбөрийн зорилго нь хөдөө орон нутгийн иргэдийн ядуурлыг бууруулах, ажлын байраар хангах юм.

Ажлын байраар хангаад ашиг орлогыг нь нэмэгдүүлээд ирэхээр иргэдийн амьжиргааны түвшин сайжрах нь дамжиггүй. Олон айл өрхөд үр шимээ өгсөн орон нутгийг бүхэлд хамрах боломжтой төсөл хөтөлбөр юм.

Төслийн журмаар зээл авсан бүх иргэд амжилттай ажиллаж байна

-Төсөлд нийт хичнээн айл өрх хамрагдаж, үр шимийг нь хүртээд байгаа вэ?
- Дээр дурдсанчлан төсөл хөтөлбөрт маань нийт 1200 айл өрх хамрагдаж 544 сая төгрөгний хөнгөлөлттэй зээл тусламжийг аваад амжилттай хэрэгжүүлж байгаа.

Энэхүү төслийн үр ашгаар орон нутгийн бизнесийн үйл ажиллагаа жигдэрч, ажилгүй иргэд идэвхтэй оролцож ашиг орлоготой болж байгаа нь бизнес эрхлэгчдийн талархалыг хүлээгээд байна.

Үүнээс гадна Бигэр, Жаргалан сумдын ажлын байрыг энэхүү төслийн үр шимээс санхүүжүүлж засварласан. Тус бүр 30 сая төгрөгний засварын ажлыг “Зах зээл бэлчээрийн удирдлагын хөгжил төсөл”-өөс санхүүжүүлж байна.   

Дашрамд хэлэхэд, төслийн хэрэгжилт орон нутагт сайн хэрэгжиж байгаатай холбогдуулан төсөлд хамрагдах, цаашид дэмжиж ажиллах сонирхолтой  иргэд олон байгаа юм. Сум орон нутагтаа юм хийж бүтээх чин эрмэлзэлтэй мөн орон гэрийнхээ амжиргааг дээшлүүлэх гэсэн хүмүүс байвал байнга хамтарч ажиллах зорилготой байгаагаа төслийг идэвхжүүлэгч С.Эрдэнэчимэг онцолж байв.

Д.Ундрах /24tsag.mn/