Гэр бүлийн гурван хүнийг онц хэрцгийгээр хөнөөсөн Б.Баасанжавд холбогдох анхан шатны шүүх хурал Төв аймаг сум дундын анхан шатны шүүхэд болжээ.

Тус шүүхээс шүүгдэгч Б.Баасанжавд Эрүүгийн хуулийн 91, 145, 57, 59, 497 зэрэг зүйл ангиудаар 25 жилийн хорих ял оноохоор шийдвэрлэсэн байна. Үүний 15 жилийг гянданд, 10 жилийг онцгой дэглэмтэй хорих ангид ял эдлүүлэхээр болсон аж. Харин хохирогчийн талаас амийг амиар нь солих байр суурьтай байгаа бөгөөд цаазын ял оноохыг хүсч байгаа юм байна.

Хэргийг эргэн сануулахад Төв аймгийн Сэргэлэн суманд өнгөрсөн оны долоодугаар сард Б.Баасанжав гэгч нь гэр бүлийн гурван хүнийг онц хэрцгийгээр хөнөөсөн хэрэг гарсан билээ. Хэрэг тус сумын Хөндлөнгийн ар гэх газар үйлдэгдсэн бөгөөд гэмт этгээд авга ах Б, түүний эхнэр Т, 11 настай ач охин Б нарын амийг хэрцгийгээр хөнөөгөөд цогцсыг нь зөөвөрлөн, худаг гаргахаар ухсан нүхэнд булсан байсан юм. Тэдний цогцсыг хэрэг гарснаас хойш 5 хоногийн дараа олсон байдаг.