Шинжээчийн дүгнэлт: Т.Лхагвасүмбэрэл агсан хөнгөн зэргийн согтолттой байх үедээ  живж, амиа алдсан

“Ирвэс хамгаалах сан”-гийн биологич  Т.Лхагвасүмбэрэлийн үхэлтэй холбоотойгоор ЦЕГ-аас өнгөрсөн нэгдүгээр сарын 14-ний өдөр мэдээлэл хийсэн. ЦЕГ-ын холбогдох албан тушаалтнуудын өгүүлж буйгаар Т.Лхагвасүмбэрэл агсны амиа алдсан шалтгааны талаарх шинжээчдийн анхны дүгнэлт гарсан байна. Уг  дүгнэлтээр Т.Лхагвасүмбэрэл агсан  хөнгөн зэргийн согтолттой байх үедээ  живж, амиа алдсан болох нь тогтоогджээ. 

Мөн түүний утасны бичлэгийн талаар ч шинжээчийн дүгнэлт гаргасан байна. Т.Лхагвасүмбэрэл агсан нь тухайн үед бичлэг хийхдээ ганцаараа байсан бөгөөд өөрөө өөртэйгээ ярьж байсан нь  тогтоогдсон аж. Улсын Мөрдөн байцаах газрын дэд дарга Э.Идэрцог  энэ  үеэр "2015 оны  11 сарын  05-ны өдөр Улаанбаатар хотод түүнийг алга боллоо гэсэн өргөдлийг талийгаачийн ах, дүүгээс нь СБД-ийн Цагдаагийн хэлтэст ирүүлсэн.

Бид гэмт хэргийн шинжтэй хэмээн бүртгэн авч, хэрэг дээр ажиллаж эхэлсэн. Улмаар талийгаачийг олохын тулд түүний гэр бүл, хамаатан садан, хамтран ажиллаж байсан хүмүүсээс байцаалт авсан. Ингээд 2015 оны арваннэгдүгээр сарын 11-ний өдөр Хөвсгөл аймгийн Хатгал тосгон Балчиргант гэдэг газарт талийгаачийн машин байна гэсэн дуудлага Хөвсгөл аймгийн Цагдаагийн газарт ирсэн. Үүний дараа хэргийн газрыг шалгаж эхэлсэн. Ингээд 2015 оны арваннэгдүгээр сарын 11-ний өдөр түүний машиныг олсон. Хэргийн газар руу явж буй 5-6 дүрс бичлэг олдсон байгаа.

Шалгалтын явцад Т.Лхагвасүмбэрэл хэргийн газар руу явж байхдаа 5-6 газрын хяналтын камерт бичигдсэн, 3-4 удаа машинаасаа бууж суусан нь тухайн камеруудад бичигдсэн байсан. Харин Мөрөн хот руу орох замд байрлуулсан камерт бичигдээгүй байсан. Бид судалж үзээд хяналтын камерт өртөлгүй Мөрөн хот руу орох боломжтой хэд хэдэн зам байдгийг тогтоосон.  

Тухайн газарт машин нь олон хоног байсан гэдгийг тогтоосон бөгөөд ундаа болон тал шил "Сархад" архи машин дотроос олдсон. Уг архины шилэн дээр хоёр ширхэг хурууны хээ байсныг илрүүлсэн. Мөн хоёр ширхэг гар утас машинд байсан бөгөөд утасны цэнэг нь дуусах гээд байсан учраас бичлэгүүдийг компьютерт хуулж аваад ар гэрийнхэнд нь хүлээлгэж өгсөн.

Талийгаачийн цогцос Хөвсгөл далайн эргээс 25 метрийн зайд, дөрвөн метрийн гүнээс олдсон. Түүнийг живэлтийн улмаас нас барсан бөгөөд хөнгөн зэргийн согтолттой байсан гэсэн задлан шинжилгээний хариу гарсан.

Түүнтэй холбоотой хэргүүдийг хэрэгсэхгүй болгоогүй, үргэлжлүүлэн нэг бүрчлэн шалгаж байгаа. Тост, Тосон бумбын нуруунд лицензтэй 16 аж ахуйн нэгжийг мөрдөн байцаалтаар шалгаж байна" гэсэн юм.

Ж.Төмөрсүх: Миний хүү ухаан санаа цоо эрүүл, архи уудаггүй хүүхэд байсан

Талийгаач өөд болсон өдрөөс хойш 115 хоног болж байна. Өнгөрсөн хугацаанд мөрдөн байцаалтын явцад ахиц гарсангүй. Гэвч хууль хяналтын байгууллага зүгээр суугаагүй нь ойлгомжтой. Анхнаасаа хэргийн газарт хариуцлагагүй хандсан. Хоёрдугаарт 2014 оноос хойш талийгаач хүү минь гурван удаа халдлагад өртсөн. Гэтэл хэрэг үүсгэж, шалгасан юм байдаггүй. Нас барснаас нь хойш шалгаж эхэлсэн. Тухайн үед халдлага үйлдсэн гэмт этгээд ил болно гэж найдахгүй байна. Энэ бол “хуулийн байгууллага ажлаа явуулж байна” гэж харагдуулах дүр эсгэсэн байдал гэж харж байна.

Хүүг минь далайгаас гаргахад ус залгиж нас барсан гэдэг нь ойлгомжтой байсан. Хамгийн гол нь ямар шалтгааны улмаас, хэн ийм үйлдэл хийв гэдгийг тогтоох хэрэгтэй. Улаанбаатар хотоос хаа байсан Хөвсгөлийн Хатгалд очоод, усанд живчихсэн гэдэг нь сонин байна. Онцгой байдлын аврагчид гаргаж ирэхдээ 4,5 метрийн гүнээс гаргаж ирсэн. Магадгүй 5-6 метр гүнд байсныг үгүйсгэхгүй. Бид ямар харсан биш. Мөн арваннэгдүгээр сард ямар ч хүн хөлдөх шахсан усанд зориглоод орно гэж байхгүй.

Шүүх шинжилгээний дүн нь тархи толгой, бие хаад нь хөхөрсөн, цус хурсан зүйл байгаагүй. Дараа нь цагдаа шүүх шинжилгээний дүнг танилцуулахад хөнгөн зэргийн согтолттой гарсан гэж танилцуулсан. Би түүнийг нь зөвшөөрч нь гарын үсэг зураагүй. Харин “архи уулгасан хүнийг нь олоорой” гэж би бичсэн. Миний хүү бол огт архи уудаггүй, өөр хүн уулгасан байж болно.

“Завьтай хүн ирж байна” гэсэн бичлэгийг утсан дээрээс нь сонсох юм бол маш аяархан сонсогддог. Нууцаар юм уу шивнэж хэлсэн мэт дуу хоолой үлдсэн байдаг. Гэтэл телевизийн нэвтрүүлгээр маш тод сонсогдож байна лээ. Мөн бичлэг дээр олон удаа хаалга онгойж, хааж буй чимээ дуулддаг нь өөр хүн байсан гэх хардлагыг улам нэмэгдүүлдэг. Талийгаачийн үлдээсэн бичлэгээс бодоход нуурын эрэг дээр завьтай хүн байсан. Тэр завиараа нуурын гүн рүү хаясан байх.

Тухайн үед машин дотор байсан хүний хөлийн мөрийг сайн харж, шалгаарай гэж бид зөндөө хэлсэн. Хүний хөлийн мөр байсан шүү дээ.    

Цагдаа анхнаасаа хэргийн үндсэн ул мөрийг алдсан. Тиймээс сэтгэл мэдрэлийн өвчтэй гэдэг гаргалгааг хийсэн. Д.Дорлигжав сайдад хүртэл сэтгэл мэдрэлийн өвчтэй гэсэн мэдээллийг цагдаа нар өгсөн байна лээ. Яагаад ийм юм яриад байгааг би асууна. Асуух ч ёстой. Миний хүү цоо эрүүл хүн шүү дээ. Харин цагдаа нар гүтгэсэн гүжирдсэн зүйлээ нотлох хэрэгтэй. Энэ хүнийг сэтгэцийн өвчтэй гэж итгүүлэх гээд байна гэдэг чинь ямар нэг ашиг сонирхол байна гэсэн үг. Тэгэхээр энэ гаргалгаа бол захиалга. Эсвэл ажлын хариуцлагаас зугтсан хүний арга. Би бол тэгж л хэлмээр байна.