УИХ-ын дэд дарга, УИХ-ын гишүүн Л.Цог өнгөрсөн долоо хоногт хэвлэлд өгсөн ярилцлагадаа "Н.Энхбаяр дарга надаас 1 сая ам.доллар нэхэж байсан. Чи миний буянаар албан тушаалд томилогдчихоод энэ мөнгийг өг гэж хэлсэн. Үнэнийг нь хэлсний төлөө Н.Энхбаяр амь тэмцэх хэрэггүй" хэмээн ярьсан билээ. Харин үүний дараа МАХН-ын нарийн бичгийн дарга, Н.Энхбаярын ойрын хүн гэгдэг Э.Эрдэнэжамъяан мэдээлэл хийж "Л.Цог бол хов хутгагч шулам. Н.Энхбаяр даргыг гүтгэсэн арчаагүй амьтан" гэх мэтээр ярьсан билээ. Ингээд тэдний эсрэг, тэсрэг байр, суурийг 24VS24 хүргэж байна.
|
УИХ-ын гишүүн Л.Цог
2012 онд Эрдэнэтэд нэр дэвшихэд намын дарга хандив нэхсэн, тухайн үед найз нөхдөөсөө бага сага юм цуглуулж өгч байсан. Харин өнгөрсөн жил Сөүлээс над руу утасдаж нэг сая ам.доллар өг гэсэн. Би хаанаас олох вэ гэхэд чи миний хүчинд намын нэрээр албан тушаалд очсон хүн өгөх ёстой гэсэн. Харин "Би чадахгүй тиймдээ хүрч байгаа бол албан тушаалаа ав надад энэ нам чинь хэрэггүй" гэхэд, за нээрээ та ч хаанаас олох билээ дээ. Би хэдэн сайдтайгаа ярья даа гээд утсаа тасалсан. Н.Энхбаяр дарга авлига хээл хахуулийн булхай нь илрэхээр хэлмэгдэж байна гэдгээ зогсоох хэрэгтэй. Түүнээс хойш намын шийдвэр биелүүлдэггүй, намын даргын үгийг сонсдоггүй гэх яриаг нам дотор гаргаж эхэлсэн. Нам доторхи өөрийг нь тойрон хүрээлдэг, өмгөөлж хамгаалдаг хүмүүс нилээн бухимдалтай байна. Хамгийн гол нь би Н.Энхбаярын тухайд худлаа хэлээгүй. Хүн гүтгэвэл хуультайг би мэднэ. Өөрийнх нь өмнөөс хүмүүс ял аваад өөрөө сугарч үлддэг байж болохгүй шүү дээ. Эд намайг харлуулж, өөрсдийгөө энхийн цагаан тагтаа шиг болгох гэж оролдох нь санасны гарз. Би өшөө ч юм хэлж чадна. |
МАХН-ын НБД Э.Эрдэнэжамъяан Л.Цог гэдэг хүн бол увайгүй шантаажчин. 2012 оны сонгуулиар хэний дэмжлэгээр, хэний хүчээр УИХ-д суулаа. Намын нэрээр УИХ-ын дэд дарга болсон. Өнөөдрийг хүртэл дандаа намын эсрэг явж байгаа. УИХ дахь “Шударга ёс” эвслийн бүлэг ямар шийдвэр гаргана, дандаа түүний эсрэг явдаг. Намын байрыг ав гэж Н.Энхбаяр даргад шахсан хүн нь Л.Цог шүү дээ. “Нам байртай болох хэрэгтэй. Миний таньдаг еврей хүмүүс ийм байр зарах гэж байна” гэж Н.Энхбаяр даргыг шахсаар байгаад авахуулсан. Тэгээд дараа нь “Эд байраа хямд үнээр зарсан гээд дахиж мөнгө нэхэж байна” гэж хүний нэр барьж худлаа ярьж, нэг сая ам.доллар нэхсэн хүн нь Л.Цог дарга өөрөө. Тэгэхэд нь Н.Энхбаяр дарга “Би шоронд орчихсон байна, яаж сая ам.доллар олж өгөх вэ. Чи энэ асуудлаа өөрөө шийд. Намынхаа төлөө санаа зовж, намаа байртай болгоё гэж бодсон юм бол энэ мөнгөө хандив босгоод ол. Эсвэл миний өмчинд байгаа юмнуудыг зараад ав” гэсэн. Үүнийг манай намынхан бүгд мэднэ. Хурал дээр олон түмний нүдэн дээр яригдсан асуудал. Гэтэл өнөөдөр АТГ дээр хэрэг үүсгүүлээд, өөрийнхөө олж ирсэн, өөрийнхөө зуучилсан байрны төлөө залилангийн хэрэгт унагаж, гэрчийн мэдүүлэг өгөөд явж байгаа нь урвагч Л.Цог өөрөө. Бид харин ч хүн чанар гаргаж, настай хүн юм, больчих байлгүй гэж бодож, энэ хүний талаар юм ярихгүй өдий хүрсэн. Иймэрхүү урваж, шарвасан, хорлох гэж орж ирсэн шулмасууд зөндөө байна. |
24tsag.mn
Сэтгэгдэл (30)