МЗХ-ноос "Хар жагсаалт" гээчийг гарган, сонгуульд нэр дэвшүүлж, сонгож болохгүй эрхмүүдийн нэрийг дуулиан шуугиантайгаар зарласан. Ингэхдээ тус холбооны ерөнхийлөгч А.Мөнхбат “Хар жагсаалтад орсон этгээдэд санал биш салаавч шүү” гэсэн зургаа дэлгэн, мэдээлэл хийж олны нүдийг орой дээр нь гаргасан билээ.
МЗХ-ноос "Хулгайчгүй Монголын төлөө" гэх хөдөлгөөнийг санаачилж, "Хар жагсаалт", "Цагаан жагсаалт" гэгчийг гаргах болсоноо нэлээд хэдэн сарын өмнө дуулгаж, энэхүү ажлаа эхлүүлсэн. Гэвч эцэстээ тэдний танилцуулсан хар жагсаалт нь сонгууль хаяанд ирсэн энэ үед нэр дэвшигчдийн талаарх иргэдийн ойлголтыг харлуулж, санаа бодлыг үймүүлсэн хэрэг болов. 2016 оны УИХ-ын сонгуульд нэр дэвшигчдийн ихэнхи нь хар жагсаалтад багтсан. Тодруулбал, УИХ-ын сонгуульд нэр дэвшигчээр бүртгүүлсэн АН-ын 76 хүний 65 нь, МАН-аас 69 нь МЗХ-оос гаргасан хар жагсаалтад багтсан байна. Түүнчлэн Хөдөлмөрийн баатар, жүдоч Х.Цагаанбаатар, дуучин Г.Эрдэнэтунагалаг нар ч энэ жагсаалтад багтсан нь олны эргэлзээг төрүүлж, хар жагсаалтад ард түмний итгэх итгэлийг үгүй хийн, үнэ цэнийг унагасан билээ.
Сонгуулийн тухай хуульд “Сонгуульд оролцогч нам эвсэл нэр дэвшигчийн талаар хуурамч буюу худал мэдээлэл тараасан, нийтэлсэн цацсан нь шүүхийн шийдвэрээр тогтоогдвол сонгуульд зарцуулсан хөрөнгийг нь гэм буруутай этгээд нөхөн төлнө” хэмээн заасан байдаг. Үүнийг А.Мөнхбат нар мэдэхгүй байна гэж байхгүй л байлтай. Гэвч МЗХ-ны гаргасан хар жагсаалт нь дээрх хуулийг зөрчсөн, ёстой л шантаажны зүйл болсон гэдгийг ч хэлэх хүн олон байна.
Тухайлбал “Оюуны ундраа групп”-ийн ерөнхийлөгч, НИТХ-ын төлөөлөгч С.Амарсайхан өчигдөр өөрийн цахим хуудаснаа “50 саяыг өгвөл цагаан жагсаалтанд оруулна гэж ирсэн. Өгөхгүй гэсэн. Хариу нь хар жагсаалт гэнэ” хэмээн өгүүлж, А.Мөнхбатын салаавч гаргасан зургийг нийтэлжээ. Харин түүний хариуд МЗХ-ны ерөнхийлөгч А.Мөнхбат "гүтгэлэг" гэх ганцхан үгнээс өөр зүйл бичсэнгүй.
Ямартай ч эдгээрийн үнэн худал нь удахгүй хуулийн дагуу шийдэгдэж, дэнслэгдэх нь ойлгомжтой. Харин МЗХ-ноос гаргасан хар жагсаалтыг эхнээсээ эсэргүүцэж байсан хүн олон. Тодруулбал, Монголын залуучуудын холбоо /МЗХ/-ны ерөнхийлөгч А.Мөнхбат энэхүү ажлыг эхлүүлэхдээ "Улс төрчдийн хар жагсаалт"-ыг гаргаж, УИХ-д сонгогдох эрхгүй эрхмүүдийг олон нийтэд зарлаж улмаар оюутнуудын саналыг тэдгээр улс төрчдөд өгүүлэхгүй байх ажлыг зохион байгуулна гэж мэдэгдэж байсан. Энэхүү асуудлыг Монголын оюутны холбоо /МОХ/-ноос эсэргүүцэн мэдээлэл хийж байв.
МОХ-ны Ерөнхийлөгч Д.Батбаяр "Монголын залуучуудын холбоо нь дэд ерөнхийлөгчийн албан тушаалдаа томоохон намын төлөөлөл болсон залуусыг сонгосон. Энэ нь тус холбоог улстөрийн үйл ажиллагаа явуулах эрсдэлтэй гэдгийг харуулж байгаа юм. Мөн "Улс төрчдийн хар жагсаалт" гаргана гэж ярьж, шоудаж байна. Гэтэл хэн нэгнийг гэм буруутай гэж үзэн олон нийтэд зарлан тунхаглаж, сонгох сонгогдох эрхэнд нь халдаж болохгүй шүү дээ. Тиймээс энэхүү хууль бус үйл ажиллагаанд МОХ оролцохгүй гэдгээ албан ёсоор зарлаж байна" хэмээн мэдэгдэж байв. Мөн МОХ-ын удирдлагууд "МЗХ-г улс төржүүлж, залуучуудыг нам, улс төрийн хүчнээр талцуулах, улс төрийн намуудтай наймаалцах оролдлого хийж буй эрхэм Ерөнхийлөгч А.Мөнхбатыг өнөөх "Хар жагсаалт"-ынхаа нэгдүгээр бичигдэх ёстой" гэж үзэж байгаагаа илэрхийлж байлаа. Харин тэдний үг ёстой л “Оготоны дуу тэнгэрт хүрдэггүй” гэгч болж, А.Мөнхбат нар үл тоомсорлосноор өдгөө хар жагсаалт гээчийг гаргаж, хэргийг мандуулаад байгаа юм.
МЗХ-ны ерөнхийлөгч А.Мөнхбатын ичгүүргүй, ёс суртахуунгүй тэнэглэл хэрээс хэтэрлээ. Монголын залуучуудын холбоог удирдаж яваа ерөнхийлөгч нь залуусын үлгэр дууриалал болж бусдыгаа манлайлах тэргүүн байх учиртай байлтай. Гэтэл А.Мөнхбат нь хар жагсаалтыг танилцуулахдаа салаавч гаргасан зураг бүхий танилцуулга хэвлүүлж ёстой л нийгэмд муу үрийг тарьж орхив.
Түүний энэхүү зохисгүй үйлдэл, хар жагсаалтын талаарх мэдээлэл өдгөө цахим ертөнцөд газар аваад байгаа. Тиймээс ч иргэд өөрсдийн үзэл бодлоо илэрхийлж байна. Энэ нь ч ардчилсан нийгмийн үнэт зүйл. Гэтэл А.Мөнхбат цахим ертөнцөд өөрийн байр сууриа илэрхийлсэн хүмүүсийн өөдөөс элдэв муу үгээр дайрч доромжлон элдвийг бичиж, ёстой л хэн гэдгээ таниулж байна.
Тэрбээр Х.Цагаанбаатар Г.Эрдэнэтунгалаг нарыг яагаад хар жагсаалтад багтсаныг тодруулсан нэгний хариуд “малнууд” гэх зүйлийг бичжээ. Үүгээр зогсохгүй хэр барагийн хүний үгийн санд байхааргүй “Чи шаалтуур, шаа, шаа, мал, солонгостойгоо зайл” гэх мэтийн элдэв муу үгийг бичиж байгаа нь олны дургүйцлийг төрүүлж, цахим ертөнцийнхөнийг бухимдуулж байна. Ийнхүү нийгэмд муу үрийг тарьж, залууст буруу үлгэр дууриалал үзүүлж, монголчуудыг үл тоомсорлон, доромжил байгаа эрхэм ерөнхийлөгч А.Мөнхбат та нэгийг бодож, хоёрыг тунгаах буй за.
24tsag.mn Б.Энхжин
Сэтгэгдэл (41)