Бурхан багшийн цахиур эрдэнэ буюу шүд Монголоос олдлоо. Үүнд зориулсан сүм барих ёстой гэж таваргаж явсан Ё.Отгонбаяр гэнэт бодлоо хувиргаж уг шүд нь хуурамч гэсэн мессежийг нисгэх болсон нь ихээхэн анхаарал татаж байна. Тэрээр яагаад ингэх болов?

  Энэ хавар Монголоос бурхан багшийн цахиур эрдэнэ буюу шүд олдлоо гэж баахан шуугисан. Шуугиулсан хүн нь БСШУ-ын сайд Ё.Отгонбаяр. Тэрбээр Энэтхэгт боловсрол эзэмшиж, бурхан шашны номд сүрхий нэвтэрсэн нэгэн. Тиймээс түүнийг бурхан багшийн шүд буюу цахиур эрдэнийг Монголоос олдлоо гэж зарлахад эргэлзэх хүн цөөн байсан. Харин ч Ё.Отгонбаяр сайдын үед түүх соёлын чухал зүйлс олдлоо хэмээн олон хүн ам сайтай байлаа.
   Тухайн үед юу болсныг олон хүн эргэн санана. Бурхан багшийн шүд буюу цахиур эрдэнэ Богдын музейд адууны шүд гэсэн нэрээр хадгалагдаж байгаад олдсоныг БСШУ-ны сайд Ё.Отгонбаяр нээлт хийсэн мэт зарласан. Тэгээд Монголд байгаа бараг бүх буддын сүмүүдийн хамба лам нарыг урьж үзүүлж, ном хуруулсан. Д.Чойжамц, Ч.Дамбажав, бурхан ч лам Г.Пүрэвбат гээд олон хүн очиж бурхан багшийн цахиур эрдэнэ мөн гэж баталцгаасан. Мөргөж сүсэглээд бөөн л юм болсон. Тэр ч бүү хэл Ерөнхий сайд С.Батболдыг аваачиж мөргүүлсэн. Монголын нэртэй бизнесменүүд, Ё.Отгонбаярыг дагаж гүйдэг хүмүүс бүгд л нууцаар очиж мөргөцгөөсөн. Тэгээд бурхан багшийн цахиур эрдэнийг Монголд хэрхэн авчирсан талаар нэвтрүүлэг хийж гавъяат Равдангаар уншуулж цөөнгүй телевизээр цацуулсан.     

   Гэвч ойрноос байдал бишдээд эхэлжээ. Нөгөө мөргөж сүсэглээд байсан бурханы багшийнхаа шүдийг хуурамч гэсэн яриаг БСШУ-ын сайд Ё.Отгонбаяр түгээж эхэлсэн сурагтай. Энэ тухай Төвд судлаач Г.Ням-Очир хэвлэлд хандаж тодорхой зүйлүүдийг ярьж эхэллээ. Түүний яриа олны анхаарлыг ихээхэн татаж байна. Тэрээр яриандаа “Ё.Отгонбаяр сайд 2011 оны аравдугаар сард Бурхан багшийн шүдний талаар судалгаа хийгээч гэж өөрөө хүсэлт тавьсан. Тэр дагуу судалгаа хийгээд бид өнгөрсөн нэгдүгээр сард судалгааны ажлаа томоохон ном болгоно гэсэн горьдлогоор эхийг нь сайдад өргөн барьсан. Гэтэл сайд өнөөдрийг хүртэл ямар ч хариу өгөхийг хүсэхгүй байгаа. Тэгээд ч зогсохгүй уг судалгааны араас эрэл сурал болж байгаа хүмүүст бурхан багшийн шүд хуурамч, Г.Ням-Очир чинь бараг худалч хүн шүү” гэж онцлон дурджээ. Энэ судлаачийн ярианаас дүгнэж үзвэл Ё.Отгонбаяр сайд бурхан багшийн шүдийг жинхэнэ гэдэгт гэнэт эргэлзэж эхэлжээ. Тэр ч бүү хэл Ерөнхий сайд С.Батболдыг хуурамч шүдэнд мөргүүлж, зурагтаар рекламдсан болж таарч байна. Монголын буддын шашны гол сумүүдийн хамба лам нарыг ч гэсэн хуурсан боллоо. Монголын сүсэгтэн олон, ард түмний хуурсан болж таарах нь.

   Уг нь Богдын музейд хадгалагдаж байсан цахиур эрдэнийг үзэх гэж, жинхэнэ болохыг батлахын тулд БСШУ-ны сайд Ё.Отгонбаярын шугамаар Энэтхэг болоод буддын шашинт олон орноос хүмүүс ирж судалсан юм. Далай лам, ажаа ринбүүчи зэрэг буддын гол төлөөлөгчид ч мөргөөд буцжээ.
Энэ бүх үйл явцын дараа БСШУ-ны сайд Ё.Отгонбаяр эрдэмт судлаачдын баг гаргаж Бурхан багшийн шүд буюу цахиур эрдэнэ мөн болохыг судлах чиглэл өгчээ. Энэхүү эрдэмтэдийн багт ШУА-ын болоод буддын шашин, төвд судлалаар мэргэшсэн олон хүмүүс багтжээ. Тэд судалгаагаа хугацаанд нь хийж сайддаа өгөөд одоо болтол хариу авч чадахгүй байгаа гэнэ. Тэгээд эцэстээ хэвлэл мэдээллийн хэрэгсэлд хандлаа. Эдгээр эрдэмтэдийн баг Ё.Отгонбаяр сайдтай уулзах гэж зургаан сарын турш хөөцөлджээ. Гэвч бүтэлтэй хариу сонсохгүй байгаа бололтой. Тэр ч бүү хэл та нарын судалгаа буруу болсон гэсэн утгатай үгийг хүмүүсээр дайлгах болсон байна. 

    Ийнхүү нэгэн цагт бурхан багшийн цахиур эрдэнэ буюу шүд Монголоос олдлоо. Үүнд зориулсан сүм барих ёстой гэж таваргаж явсан Ё.Отгонбаяр гэнэт бодлоо хувиргаж уг шүд нь хуурамч гэсэн мессежийг нисгэх болсон нь ихээхэн анхаарал татаж байна. Тэрээр яагаад ингэх болов? Угаасаа хуурамч байсан шүдийг сонгуулийн өмнө домог зохиох гэж ашигласана уу? эсвэл сүүлд хуурамч гэдэг нь батлагдсана уу? гээд олон асуулт урган гарлаа. Энэ талаар бид эргэн сурвалжлах болно. Ё.Отгонбаяр сайдын ойлгомжгүй байр суурийг ч тодруулна. Хэрэв бурхан багшийн шүд биш бол анхнаас нь мөн гэж шоудсан Ё.Отгонбаяр ямар хариуцлага хүлээх ёстой вэ?