Эдийн засгийн байнгын хорооны “Эдийн засгийн хүндрэлийг даван туулах, тогтворжуулах хөтөлбөр батлах тухай” УИХ-ын тогтоолын төсөл 86.6 хувийн саналаар дэмжигдлээ.
Өөрөөр хэлбэл, байнгын хорооны хуралдаанд оролцсон гишүүдийн дийлэнх хувь нь уг хөтөлбөрийг саналыг дэмжихээ илэрхийлэв.
Эдийн засгийн хүндрэлийг даван туулах, тогтворжуулах хөтөлбөрийн хүрээнд төсвийн алдагдлыг 2017 онд 9.9 хувь, 2018 онд 7.5 хувь, 2019 онд 5.5 хувьд хүргэж бууруулах зорилт тавьжээ. Энэ хүрээнд Тавантолгой, Гацуурт зэрэг стратегийн ач холбогдол бүхий ордыг эдийн засгийн эргэлтэд оруулах, Монгол-Орос-Хятадын эдийн засгийн коридор байгуулахаар тусгасан байна.
Хэлэлцэж байгаа асуудалтай холбогдуулан гишүүд асуулт тавьж, үг хэлсэн юм.
УИХ-ын гишүүн Д.Эрдэнэбат: Ам.долларын ханш сүүлийн 4 сарын дотор 400 төгрөгөөр өссөн.
Эдийн засаг ямар хугацаанд тогтворжуулах, ажлын байр, мөнгөний урсгалыг яаж нэмэгдүүлэх талаар тодорхой тусгасан зүйл нэг ч байхгүй байна. Асуудлыг хэлэлцэх явцад хариуцах сайд нар нь ч алга. Эдийн засгийн хүндрэл бол мөнгөний хямрал. Үүнийг тогтворжуулж, хөтөлбөрөө биелүүлж чадахгүй бол Засгийн газар, Сангийн сайдад хариуцлага тооцох хэрэгтэй. Ам.долларын ханш сүүлийн 4 сарын дотор 400 төгрөгөөр өссөн. Одоо болтол дорвитой арга хэмжээ авахгүй байна. Хэрэв 3000 төгрөгт хүрвэл Засгийн газар автоматаар огцрох ёстой хэмээв.
УИХ-ын гишүүн Д.Сумъяабазар: Энэ хөтөлбөрийг ерөнхий сайдын дэргэдэх Үндэсний хөгжлийн газар боловсруулах ёстой
“Сангийн яам ирэх оны төсвийн төсөл, төсөөллийн тухай хуулиудтайгаа зэрэгцүүлээд энэ хөтөлбөрүүдийг боловсруулж оруулж ирлээ. Яг ярилцаад явахаар бодлогууд нь хоорондоо зөрөөд байх юм. Уг нь энэ хөтөлбөрийг ерөнхий сайдын дэргэдэх Үндэсний хөгжлийн газар боловсруулах ёстой. Ийм чиг үүрэгтэй тохируулагч агентлагийн хэрэг гарахгүй байна” гэж онцолсон юм.
УИХ-ын гишүүн Л.Болд: Энэ хөтөлбөрөө илүү тодорхой болгох хэрэгтэй
“Энэ хөтөлбөрөө илүү тодорхой болгох хэрэгтэй. Баахан жагсаалтууд л байна. Энд шинэ хоёр зүйл л багтсан юм байна. Тэр нь казино байгуулах, байцаат морин уралдааны төв байгуулах. Бусад нь бүгд ингээд ороод ирж байсан. Хэрэгжсэн тодорхой зүйл алга” гэж онцолсон юм.
Эдийн засгийг тогтворжуулах хөтөлбөрийн хүрээнд нийт 18 сарын хугацаанд төсөв, санхүү, мөнгөний бодлогыг сайжруулах бол хөтөлбөрт туссан зорилтуудыг нийт 3 жилийн хугацаанд багтаан гүйцэтгэхээр төлөвлөж байгааг хэлээд томоохон төсөл арга хэмжээнүүдийг шалгаж, судлах үүрэгтэй ажлын хэсгийг Шадар сайдаар ахлуулан байгуулсныг ажлын хэсгийнхэн тайлбарлав. Мөн төсвийн алдагдлыг огцом буулгах нь эргээд эдийн засагт сөрөг нөлөөтэй, төлбөрийн тэнцлийн хамт хос алдагдал хүлээдэг учир үе шаттай бууруулахаар тусгасан байна.
Монголбанкны БНХАУ-тай байгуулсан 15 сая юанийн своп хэлэлцээр 2017 оны 8 дугаар сард дуусах аж. Цаашид үргэлжүүлж, 25 саяд хүргэхээр төлөвлөж байгаа гэнэ. Үнэ тогтворжуулах хөтөлбөрийг үргэлжлүүлэн хэрэгжүүлэхгүй гэсэн байр суурийг төв банк баримталж буй. Эдийн засгийн хүндрэлийн улмаас арилжааны банкууд дахь уул уурхай, барилгын салбарын чанаргүй зээл эрс өсчээ. Тиймээс чанаргүйд ангилагдаж байгаа зээлдэгчдэд зориулан эдийн засгийн нөхцөл байдалтай уялдуулан боломжтой арга хэмжээ авах талаар Монголбанк судалж байгаа гэдгийг хэлэв.
