Монголын төмөр замчид дотооддоо вагон угсарч эхэлжээ. “Ачааны вагон угсрах” төслийг 2012 оноос эхлүүлжээ. Засгийн газар, тэр дундаа Зам тээврийн хөгжлийн сайд төмөр замын хөгжлийн асуудлыг ихээхэн анхаарч, өнгөрсөн хоёрдугаар сард “Ачааны шинэ вагон угсрах” төслийг хэрэгжүүлэх тухай 21 тоот тушаал гарч, ЗТХЯ, “Монголын төмөр зам” ТӨХК, “Улаанбаатар төмөр зам” ХНН, “Эколог бус” ХХК-ийн мэргэжилтнүүдээс бүрдсэн ажлын хэсэг байгуулж, төслийг хоёр үе шаттай хэрэгжүүлэхээр шийдвэрлэжээ.  Улмаар Зүүнхараа дахь ачааны вагоны засварын баазыг түшиглэн өнгөрөгч тавдугаар сарын 10-26-ны хооронд вагон угсрах цехээ байгуулж, угсралтын ажил тавдугаар сарын 29-нд эхэлсэн байна.

Манай төмөр замчдын угсарч буй вагон 72 тонны даацтай, 88 шоо метр тэвшний эзлэхүүнтэй, цагт 120 км хурд авах боломжтой бөгөөд төмрийн хүдэр, зэсийн баяжмал зэрэг төрөл бүрийн нурмаг ачаа ачих зориулалттай аж. ОХУ, Хятад улсын үйлдвэрүүд ачааны вагоныг 22-25 жил ашиглана гэж баталгаа гаргадаг.  Харин монголд угсарсан уг вагоныг 30-32 жил ашиглах гэнэ. Мөн БНХАУ-д үйлдвэрлэсэн ижил төрлийн вагон 79.5 мянган ам.долларын үнэтэй байгаа бол манайд угсарч байгаа вагон 120 орчим сая төгрөгөөр "боссон" байна.

“Улаанбаатар төмөр зам” нийт 2700 орчим вагонтой бол “Болд төмөр”,“Ерөө гол” компани гурван мянга орчим, Монголын төмөр зам компани 245 вагонтой аж. Төмөр замын салбарт ашиглаж байгаа нийт вагоны гурван мянган гаруй хувь нь 25-аас дээш жил ашиглагдаад хуучирчихсан гэдгийг албаны хүн хэлж байна.