-Эд хөрөнгө идэхээ урьтал болголгүй, иргэдээ эрүүлжүүл-

Монголчууд эрүүл аюулгүй орчинд аж төрөн, амьдран суух заалт эцэг хуульд бий. Байгаа ч гэж дээ тунхаг хэлбэрээр оршдог. Ийм нэгэн заалтыг аль ч засаглалын үед ор тас мартсан. Ерөнхийдөө Үндсэн хуульд тодорхой заасан байдаг гэдгийг бүгд мэднэ. Гэвч иргэдийн эрхийг хангах асуудлыг хийж хэрэгжүүлэхийг огт хүсдэггүй гэхэд хилсдэхгүй. Та бүхний эрхийг хангана гэсэн нэрийн доор хийж байгаа ажил нь хэтэвчээ түнтийлгэж, халаасаа зузаатган, хөрөнгөө арвижуулах гэж ойлгоход нэг их буруудахгүй. Аливаа зүйлийг хийж байна хэмээвэл хэр тустай нь хожим нь мэдэгдэж, хэдэн төгрөг зувчуулсан болох нь илэрдэг болсоор удаж байгаа.

За нэг иймэрхүү маягаар төр засаг, нийслэлийн дарга нар ажил хэрэг явуулсаар өдийг хүрлээ. Иргэд ч залхаж, итгэл алдарчээ. Азийн цагаан дагина гэж алдарших шахсан төв азийн цээжнээ орших Монгол Улсын нийслэл Улаанбаатар утаан дундаас үзэгдэхээ байж, хотын иргэд нь хордож, хойч үе болох багачуул нь хорвоогийн тоос хөдөлгөх хэдхэн наснаасаа хумслуулсаар. Ийм л байдлаар иргэддээ хандсаар, эцэстээ түмэн олны бие тэнхээ ч чилээрхэн, эмнэлгүүдийн ор ч хүрэлцэхгүй, хонгилд нь хүртэл хэвтэж эхэллээ. Дүр зураг нэг иймэрхүү маягтай. Тэгвэл үүнийг бий болгохгүй байх нөхцөл бололцоо, иргэдээ эрүүлжүүлэх боломж байгаа. Гэхдээ хийж хэрэгжүүлэх гэхээр хэтэвчинд орох мөнгө нь багасчих гээд байгаа болохоор хэрэгжүүлэхээс зайлсхийгээд байгаа бололтой. Ингэж хардахаас өөр арга ч байхгүй. Тиймгүйсэн бол өдийд угаарт хордсон иргэдээ эрүүлжүүлэх, чийрэгжүүлэх бодлого барихсан. Их хотоор дүүрэн болсон болоогүй фитнес заалууд байна. Эзэнгүй хоосон нь олон. Үүнд түмэн олноо хамруулчихвал эрүүл чийрэг монголчууд бий болох юм. Ядаж л энэ их утаа тортогны үед бие нь чийрэгжих болов уу. Энэ улсын ирээдүй болсон багачуул эрүүл чийрэг байвал хөгжлийн түлхүүрийг нь атгуулаад, хаалгыг нь онгойлгуулах болно.

Ер нь, утаа угаар хадны мангаа гэж орилж, тунхаглан зарлаад, зуухтай дотночлон танилцаж, гэр хорооллын утааг үнэрлэж, хорны хэмжээг хамраараа мэдэрч байна хэмээн ард олныг бухимдуулж явахаар эрүүлжүүлэх аяныг зохион байгуулаач төр дээдсүүдээ. Үүнийг хэрэгжүүлэхэд нэг их асуудал үүсэхгүй. Яахав хэсэг нөхдийн утаа нэрээр халаасалдаг байсан мөнгөний тоо жаахан буух л байх. Тэр эсэргүүцлийг даван туулчихвал иргэд чинь эрүүл болох магадлал тун өндөр байна. Тодруулбал, эрүүл мэндийн даатгалын санд татвар төлөгчдийн чамгүй мөнгө хуримтлагддаг. Үүнийг тэр бүр хэрэглээд байдаггүй. Нийгмийн 80 хувь орчим нь даатгалаа ашиглаж эмнэлэгт үзүүлдэггүй, хэрэглэдэггүй гэсэн мэдээлэл бий. Асуудал ийм байхад иргэдээ эмчлэх, эрүүлжүүлэхэд санаа тавихгүй байгаа нь хачирхалтай. Өвдсөн хойно нь халаглаж суух бус, өвчлөлөөс сэргийлж даатгалыг нь ашиглуулбал оновчтой болов уу.

Нийслэлийнхээ иргэдийг хордож угаартахаас өмнө Эрүүл мэндийн даатгал төлж буй мөнгөөр нь фитнест хамруул. Энэ бол нийслэлчүүдийг эрүүлжүүлэх хамгийн дөт арга. Утаа угаар гэж хий дөвчигнөхөөр үүнийг л хэрэгжүүлчих хотын даргаа, төрийн дээдсүүд ээ. Өвчлөлд өртсөн иргэд энэ улсыг хөгжүүлэхгүй гэдгийг ойлго.