Монгол Улсын төрд хариуцлагатай өндөр албан тушаал хашиж,  улс орны хөгжил, хүн ардын амьдралыг дээшлүүлэхийн төлөө олон ажил санаачлан хэрэгжүүлж ирсэн гурав дахь Ерөнхийлөгч, МАХН-ын дарга Н.Энхбаярыг дэмжсэн иргэдийн санаачилга, хөдөлгөөн идэвхжиж байна.
    Монгол Улсын төрд хариуцлагатай өндөр албан тушаал хашиж,  улс орны хөгжил, хүн ардын амьдралыг дээшлүүлэхийн төлөө олон ажил санаачлан хэрэгжүүлж ирсэн гурав дахь Ерөнхийлөгч, МАХН-ын дарга Н.Энхбаярыг дэмжсэн иргэдийн санаачилга, хөдөлгөөн идэвхжиж байна. Тэд экс Ерөнхийлөгчийн байгуулсан гавьяа зүтгэлийг дурдалгүйгээр хилсээр ял сонсгож, улмаар амь нас, эрүүл мэндийг нь хохироож болзошгүйг анхааруулсаар байгаа юм.
    Сүхбаатар дүүргийн иргэн Р.Ганжуур, Ч.Дамдиндорж, Л.Ганбаатар, Х.Батболд, Д.Энхболд, Б.Батболд, Монгол цэргийн бэлтгэл хүчний холбооны ерөнхий зохицуулагч Г.Баярсайхан тэргүүтэй иргэдийн төлөөлөл өнөөдөр “Үндэсний мэдээллийн төв”-д хэвлэлийн хурал хийж, Монгол Улсын Ерөнхийлөгч Ц.Элбэгдоржид хандан ил захидал хүргүүлж байгаагаа сэтгүүлчдэд дуулгав.
    Ил захидалд, Ерөнхийлөгчийн  амрыг эрэхийн зэрэгцээ “Хүний эрх, эрх чөлөө, амьд явах эрхийг хангах зорилгоор  “Цаазгүй Монгол Улс”  энэрэнгүй санаачилгыг гаргасан төрийн  тэргүүнйи хувьд Н.Энхбаярын биеийн байдал эрс муудаж, амь насанд нь аюул занал учирч болзошгүй нөхцөл байдал үүссэн тул чаралтай өндөр түвшний эмнэлгийн тусламж үзүүлэх талар анхаарч тодорхой арга хэмжээ авна уу”  хэмээн хүссэн байна.
    Иргэдийн зүгээс   “Н.Энхбаяр  Монгол Улсыг хөгжүүлэх үйлсэд үнэлшгүй гавьяа байгуулсан хүн” хэмээн  ил захидалд онцлон тэмдэглэжээ. Тухайлбал,  Монгол Улсын 70 жилийн түүхэн бүтээн байгуулалтад зарцуулагдсан “Их өр”-ийг тэглэхэд онцгой үүрэг гүйцэтгэсэн. Газар хувьчлалыг эхлүүлж, сүүлийн 20 жилийн хамгийн том бүтээн байгуулалт “Мянганы зам”-ыг санаачилсан, Мянганы хөгжлийн цогц бодлогын урт хугацааны хөтөл бүхий баримт бичгийг санаачилсан. АНУ-ын мянганы сорилтын сангийн 280 сая ам.долларыг өөрийн биеэр хөөцөлдөж өнөөгийн бүтээн байгуулалтын салбарууд болох байгаль орчин, эрүүл мэнд,зам тээвэр, хөдөө аж ахуйн салбарт оруулсан. Монгол Улсын эрчим хүчний нэгдсэн систем хөтөлбөрийг санаачилж, дунд сургуулийн бага ангийн сурагчдыг “Үдийн цай”-тай болгосон. НҮБ-ын мандаттай энхийг сахиулах олон улсын цэргийн ажиллагаанд Монгол Улсын зэвсэгт хүчин, цэргийн багийг илгээж улс орныхоо гадаад нэр хүндийг өндөрт өргөсөн гээд түүний санаачилж, хийж хэрэгжүүлсэн олон ажил бий. Тиймээс Н.Энхбаяр  элдэв дарамтгүй чөлөөт орчинд эрүүл байвал цаашид ч Монгол Улсдаа ихийг хийж бүтээж чадах эрдэм мэдлэг, дадлага туршлага, эх оронч сэтгэлтэй хүн гэдэгт  эргэлзэхгүй  байгаагаа иргэд төрийн тэргүүн Ц.Элбэгдоржид илэрхийлжээ. Өөрөөр хэлбэл, экс Ерөнхийлөгчийн амь нас, эрүүл мэнд нь гагцхүү гэр бүл, журмын нөхдийнх нь санаа зовох асуудал бус нийт Монголын ард түмний цаашдын ирээдүйн сайн сайхны төлөөх асуудал гэдгийг ил захидалд ийнхүү  цохон тэмдэглэжээ.Нөгөөтэйгүүр,  Н.Энхбаярыг ялласан анхан шатны шүүхийн шүүн таслах ажиллагааг цэнхэр дэлгэцээр үзэж, ажигласан олон түмэнд шүүх үнэн шударга шийдвэр гаргасан гэх итгэл үнэмшл огтхон ч төрөөгүйг дурдсан байна. Тиймээс шударга байхаа ард түмэндээ амласан Ерөнхийлөгчийн хувьд, шүүхийн шинэтгэл, хууль цаазын аль болох эерэг хүмүүнлэг болгох санаачилгаараа олон улсын тавцанд үнэлүүлээд буй төрийн тэргүүний хувьд, мөн түүнтэй адил өрх гэр бүлийн эзэн эр хүнийхээ хувьд, хоёр өөр намд харъяалагддаг ч  төр, засаг, улс орныхоо ажилд мөр зэрэгцэн   хамт зүтгэж  явсны хувьд “Унаж яваад морио, ханилж яваад нөхрөө” хэмээн монголчууын ярьдагийг бодож, болгоож энэ асуудалд анхаарал хандуулахыг иргэдийн төлөөлөл Ерөнхийлөгч Ц.Элбэгдоржоос хүсчээ.
    Иргэдийн төлөөлөл Ерөнхийлөгч Ц.Элбэгдоржид  ил захидал бичээд зогсохгүй  Н.Энхбаярыг дэмжиж байгаа иргэдийг энэ амралтын өдрүүдээр  МАХН-ын байранд очиж гарын үсэг зурахыг уриаллаа.