Боловсрол, шинжлэх ухааны сайд Л.Гантөмөр өчигдөр их, дээд сургуулийн захирлуудыг хүлээн авч уулзлаа. Энэхүү уулзалтад төрийн өмчийн томоохон их, дээд сургуулийн удирдлагууд сургалтын чанарыг ахиулахад ямар дэмжлэг хэрэгтэй байгааг, сургалтын төлбөрийг хэдэн хувиар нэмэх саналаа хэлсэн юм. МУИС-ийн ректор С.Төмөр-Очир "2012 оноос аспирантур, докторантурын сургалтын хөтөлбөр шинэчлэгдэж байгаа. Үүнээс гадна МУИС-ийн 70 жилийн ойг аравдугаар сарны 5-нд тэмдэглэнэ. Сургуулийн засварт улсын төсвөөс өгсөн 400 сая төгрөгөөс гадна хоёр тэрбум төгрөг зарцуулсан. Энэ сарыйн 25-нд засварын ажил дуусна. Зарим сургуульд өргөтгөл хийж байгаа. Манай сургууль сургалтын төлбөрөө 38-60 хувь нэмэх санаатай байна" гэв.Мөн  СУИС 20-40, ХААИС-49, УБИС 25-50 хувиар сургалтын төлбөрөө нэмэх саналтай гэж мэдэгсэн юм. Харин "Их засаг" их сургууль хамгийн бага буюу 14-15 хувиар нэмэхийг хүсчээ. Түүнчлэн ЭМШИУС, ШУТИС, Дотоод хэргийн их сургууль нь бусдынхаа сургалтын төлбөрийг харж байгаад тогтоох гэнэ.  Яг энэ үеэр их сургуулийн захирлууд эрдэм шинжилгээний төв лаборатори байгуулахад анхаарч ажиллах хүсэлт сайдад тавьсан юм.