Нийслэлийн Засаг дарга бөгөөд Улаанбаатар хотын Захирагч Э.Бат-Үүл өнгөрсөн амралтын өдрүүдэд нийслэлийн зам засвартай танилцсан бол энэ долоо хоногийн амралтын өдрөөр гэр хорооллын иргэдтэй уулзаж, яриа өрнүүллээ.Тэрээр хэлэхдээ: сонгуулийн өмнө та бүхэнтэй уулзахдаа гэр хорооллыг инженерийн шугам сүлжээнд холбож, дэд бүтэцжүүлэхээр амалсан. Гэр хорооллыг өндөр хөгжилтэй орнууд шиг хаус хороолол болгох бүрэн боломж бий. Ингэхийн тулд дахин төлөвлөлт хийх шаардлагатай. Орон сууц биш газар үнэд орох цаг болсон. Газрын хэмжээ том жижгээс биш харин дэд бүтцэд хэрхэн холбогдсон сургууль, цэцэрлэг, эмнэлэгтэй хир ойр байгаагаас үнэ нь өсдөг дэлхийн жишиг байна. Ийм боломжийг иргэддээ олгохын төлөө ажиллах болно гэдгээ хотын дарга Э.Бат-Үүл хэлж байв.
Нийслэлийн гэр хорооллын иргэдтэй уулзах энэ уулзалт Хан-Уул дүүргээс эхэлж Сонгинохайрхан, Чингэлтэй дүүргийн иргэдтэй яриа өрнүүлсэн юм. Манай улс өнгөрсөн хугацаанд хот төлөвлөлт, хот байгуулалтын ноцтой алдаатай бодлого явуулж ирсэн. Өөрөөр хэлбэл нийтийн орон сууцаар хот байгуулалтыг төсөөлж байв. Айл өрх бүр хувийн хашаанаасаа татгалзах үзэл суртлын гол зэвсэг бол Аман хуур кино юм. Одоо тэгвэл энэ үзэл бодлоосоо салах цаг ирсэн. Өндөр хөгжилтэй орнуудын 90 хувь нь амины орон сууцанд амьдардаг. Энэ нь манайхаар бол гэр хороолол юм. Тэгэхээр иргэддээ амины орон сууцтай болгох ажлыг хотын захиргаа хийнэ. Инженерийн шугам сүлжээг татаж өгнө. Энэ бол үүрэг юм гэв.
Түүнчлэн хотын дарга Хан-Уул дүүрэгт баригдаж буй Монгол Германы хамтарсан “Эко Берлин” орон сууцны хотхонтой танилцлаа. Нарны эрчим хүч ашиглахын зэрэгцээ бохир усыг цэвэршүүлэн эргүүлэн ашиглах системтэй юм байна. Германы олон улсын хамтын ажиллагааны байгуулага GTZ –ийн хотын хөгжил хөтөлбөрийн хүрээнд хэрэгжүүлж буй уг төсөл энэ оны 12 сард дуусах юм. Өнгөрсөн хугацаанд төслийн ерөнхий төлөвлөгөөг гаргаж загвар байшинг барьжээ. Хэрвээ хот болон яамны зүгээс харилцан ойлголцож уг ажлыг үргэлжлүүлвэл нарны эрчим хүчээр гэрэл, цахилгаан, дулаанаа гаргах орон сууцтай болох боломжтой гэв.
Гэр хорооллын иргэдтэй уулзах энэ арга хэмжээний хүрээнд Хотын дарга Э.Бат-Үүл Сонгинохайрхан дүүргийн нутаг дэвсгэр дэхь Баянхошууны гэр хорооллын усан хангамжийн сүлжээтэй танилцлаа. Энэ сүлжээ байгуулагдснаас хойш хашаа руугаа шугам татах санхүүгийн боломжтой 32 айл гэртээ цэвэр устай болжээ. Хэрвээ айлууд руу шугам татах хөрөнгийг нь шийдээд өгчихвөл гэр хорооллын айлууд хананаасаа усаа авчихдаг болох тухай яриа өрнөв.
НҮБ-ын “Хабитат” төсөл нийслэлийн Чингэлтэй, Сонгинохайрхан дүүрэгт төсөл хэрэгжүүлж буй юм. Гэр хорооллын иргэдийн өөрсдийнх нь оролцоотойгоор орчин ахуйг нь сайжруулах төсөл юм. Өнгөрсөн хугацаанд иргэд гудамжиндаа гэрэлтүүлэг тавьж, мөн үерийн уснаас хамгаалах далан тавьжээ. Хабитат төслийнхөн Баянхошуунд урлагийн заал, Чингэлтэйд ахуй үйлчилгээний төвийг байгуулж өгсөн байна. Төсөлд хамрагдаж буй иргэд гэр хорооллыг хаус хороолол болгохын тулд дахин төлөвлөлт хийнэ гэсэн Хотын даргын төлөвлөгөөг аль хэдийнээ хэрэгжүүлээд эхэлжээ. Тэд аль болох хурдан хананаасаа халуун хүйтэн усаа авчихдаг тохилог орон байртай болох хүсэлтэй байв.
Гэр хорооллыг тохилог амины орон сууцтай болгож Улаанбаатар хотоо өөрчлөх саналыг хамтдаа ярилцаж энэ том ажилд туг нь болж явахыг Баянхошууны иргэдэд хотын дарга хүслээ. Энэ уулзалтын дараа санал сэтгэгдлээ солилцсон Чингэлтэй дүүргийн иргэд ч дээрхитэй ижил яриа өрнүүлэв. Хотын дарга Та бүхний хүч туршлагыг бид ашиглана. Саяхан миний бие өөрсдийнхөө гараар явган хүний зам, үерийн далан барьж буй иргэдтэй уулзсан. Эндээс иргэд өөрсдийнхөө гараар өөрийнхөө төлөө хичнээн хичээнгүй ажиллаж буйг олж харсан. Ийм замаар хотын гэр хорооллын шинэ төлөвлөлтийг хамтдаа хийж хэрэгжүүлье гэж хэллээ.
Эх сурвалж: ulaanbaatar.mn
