Улс төрд нөлөө бүхий эрхмүүд албан тушаалаасаа буугаад хуулийн байгууллагын үүд сахидаг үзэгдэл хэвийн мэт болжээ. Өнгөрсөн парламентаас гэхэд долоон хүн хуулийн байгууллагаас ял сонслоо. Тэдний хувьд хуульд зааснаар улс төрийн карьер нь энэ хүрээд дуусч буй юм.

Энэ парламентад мөн шүүхийн хаалга татаж буй нэг гишүүн байгаа талаар прокурорын байгууллагаас мэдээлсэн. Тодруулбал, Баянхонгорчуудын төлөөлөл болж сонгогдсон УИХ-ын гишүүн А.Адьяасүрэнг нүүрс тээврийн С зөвшөөрөл авахын тулд Авто тээврийн газрын нэр бүхий албан тушаалтанд 100 мянган ам.долларын авлига өгсөн хэргээр шалгаж буй гэсэн мэдээлэл бий.

Прокурорын байгууллагаас өгсөн мэдээллээр А.Адьяасүрэнд холбогдох хэргийн мөрдөн шалгах ажиллагаа үргэлжилж байгааг тэмдэглэсэн байдаг.

Хуулийн байгууллагаас ийн мэдээлсний дараа тэрбээр сэтгүүлчдэд тайлбар өгөв. Уг тайлбартаа “Төрийн эрх мэдлийн төлөөх тэмцэл үргэлжилж байна гэж харж байна. Сонгууль дууссан учраас энэ асуудал шийдэгдэх байх. Надад хуулийн байгууллагаас яллагдагчаар татсан ямар нэгэн бичиг ирүүлээгүй. Би яллагдагчаар татагдаагүй” гэсэн юм.

Ийм тайлбар өгч байгаа ч түүнийг яллагдагчаар татах тогтоолтойгоо танилцалгүй өдийг хүрсэн гэх мэдээлэл гараад буй. Ер нь хэн ч бодсон хуулийн байгууллага хаа хамаагүй хүнийг хянаж, цагдаад байх нь ч юу юм.

УИХ-ын гишүүн халдашгүй байх дархан эрхтэй. Гэхдээ хийсэн хэрэг нь хүртэл хамгаалагдана гэсэн үг биш.

Үүнийг нь Үндсэн хуулиар хуульчлаад өгчихсөн юм. Гишүүн ч бай, Ерөнхийлөгч, энгийн иргэн ч бай хүн бүр хуулийн өмнө эрх тэгш байна гэж.

Гишүүн бол нийт иргэдийн ашиг сонирхлыг хамгаалж ажиллах ёстой хүн. Гэхдээ иргэд танд эргэлзэж байна. Тиймээс гишүүний бүрэн эрхээрээ халхавчлагдах биш өөрөө шалгуулах хүсэлтээ өгчихвөл таны нэрэнд ч цэвэр юм даа.

Б.Лхам