ХӨСҮТ-ийн сувилагчаас халдвар илэрсэн. Энэ талаар ЭМЯ-ны төрийн нарийн бичгийн дарга Я.Амаржаргал "Сувилагч ХӨСҮТ-д ажиллаж байхдаа халдвар авсан гэхээс илүүтэй наймдугаар сард Солонгос улсад ажиллаж байгаад ирсэн, тусгаарлалтад байж байгаад гарсан. Ажилдаа ороод нэг сар болсон гэсэн мэдээлэл байна. Үнэхээр ажлаа хийж байгаад халдвар авсан уу эсвэл урьд нь тусгаарлалтаас гараад үргэлжилсэн халдвар авсан уу гэдгийг шалгаж байна. Шинжилгээ судалгааны ажил үргэлжилж байна. ХӨСҮТ-д ирсэн өдрүүдийн бүх камерын бичлэгийг шалгаж байна. Энэ талаар ирэх долоо хоногоос мэдээлэл өгнө" гэв.

Харин хүн амын дунд өнгөрсөн жил манай улсад ковидийн халдвар тархсан гэх мэдээлэл гарсан. Энэ талаар тэрбээр "Түүвэр судалгаа хийгдэж байгаа. Хүн амын дунд өнгөрсөн онд Монголд ханиад томуу их байсан. Ковидийн халдвар байсан юм биш биз дээ гэсэн таамаг дэвшүүлээд байгаа. Бид эмнэлгийн эмч ажилчдад цусны доноруудын хадгалагдсан сорьц байдаг. 6000 хүний сорьцод халдвар илрээгүй. Тэгэхээр Монгол Улсад ковидийн халдвар байсан гэх таамгийг үгүйсгэж байна. Хоёрдугаарт, ажлын хэсэг томилогдоод Баян-Өлгий аймагт ажилласан. Тэнд 119 хүнд тандалт судалгаа хийсэн.

Өмнө нь Казахстанаас орж ирээд халдвар аваад ХӨСҮТ-д эмчлэгдсэн хоёр хүнд дархлаа тогтсон эсрэг бие илэрсэн. Тандалт судалгааг хүн амын  дунд хийж байна. Уушгины хатгаатай хүмүүст ковидийн шинжилгээ хийж байгаа. Илрэхгүй байгаа.

Нийслэлийн хэмжээнд  1200 гаруй хүүхдийн ор байдаг ба энд 700 орчим хүүхэд эмчлүүлж байна. Томуугийн хүндрэл үүсээгүй байна. Сая гаруй хүнээ томуугийн дархлаажуулалтад хамруулахаар төлөвлөж байсан ба нийт зорилтот бүлгийнхээ 97 хувийг хамруулаад байна. Бид ямар хүнийг вакцинд хамруулах төлөвлөгөөгөө 7-р сард гаргасан. Энэ төлөвлөгөөний дагуу явж байна. Дээр нь иргэд ухамсартай байх ёстой. Зөрчлийн тухай хуулиар худал мэдээлэл тараавал хариуцлага хүлээнэ гэж заасан байдаг. Нийгмийн сэтгэлзүй тайван байх ёстой. Худлаа, иргэдийг цочирдуулсан мэдээлэл тарааж болохгүй" гэдгийг онцоллоо. 

Б.Баатар