Коронавирусний халдварыг дотооддоо алдаж болзошгүй эрсдэлтэй цэг нь Сэлэнгэ аймгийн Алтанбулагийн чөлөөт бүс болоод байна. Тиймдээ ч  өнгөрсөн өдрүүдэд ЭМ-ийн сайд болон албаны бусад хүн халдварын голомт болоод байгаа Алтанбулаг суманд ажилласан. Тус боомтоор өдөрт 1000 хүн орж, гардаг гэсэн судалгаа бий. Тухайлбал, Алтанбулаг чөлөөт бүсээр арваннэгдүгээр  сарын 7-ний өдөр гэхэд л 881 иргэн, 212 тээврийн хэрэгсэл нэвтэрсэн байна.

Эрсдэлт бүс болох Алтанбулагт хөл хорио тогтоох тухай ярьж буй. Учир нь, тус бүсээр нэвтэрч буй олон жолоочоос коронавирус илэрсэн. Дээр нь халдвар тээж буй жолоочийн идээд хаясан хоолны үлдэгдлийг золбин ноход олноороо иддэг байна. Хамгийн аюултай нь, транзит тээврийн автомашины жолооч нар зам дээр өтгөн, шингэнээ уут саванд хийгээд, цонхоороо хаядаг. Халдвар тээгч жолооч нараас гадна эрүүл ахуйн талаасаа наад захын шаардлага хангахгүй ийм орчинд коронавирусний халдвар илэрвэл хурдацтай тархах аюултай. Харин энэ бүхнээс урьдчилан сэргийлэхийн тулд Алтанбулаг боомтыг тодорхойгүй хугацаагаар хааж, эрүүл ахуйн ариутгал, халдваргүйтлийг сайтар хийхгүй бол коронавирусийг дотооддоо алдах нөхцөл байдал энд л үүсээд байна. Сэлэнгэ аймгийн удирдлагууд, онцгой байдлын албаныхан эрсдэлт байдлыг УОК-т удаа дараа танилцуулж, арга хэмжээ авахыг хүссэн ба УОК энэ долоо хоногийн эхээр тодорхой шийдвэр гаргахаа хэлсэн байна.

Алтанбулаг боомтоор Монгол Улсад нэвтэрч байгаа тээврийн жолооч нарт хийж буй шинжилгээгээр сүүлийн 15 хоногт 14, 6 хоногт 6 жолоочоос коронавирүс илрээд байна. Зөвхөн сүүлийн сард нийт 34 жолооч коронавирустэй гарсны 32 нь Сэлэнгэ аймгийн Нэгдсэн эмнэлгийн шинжилгээгээр илэрсэн ба Монгол Улсын зургаа, ОХУ-ын 18, Беларусь улсын тав, Казахстаны нэг, Туркийн гурван иргэн байна.

У.Тэргэл