Жилийн өмнө өмнөд хөршид анх дэгдсэн цар тахлыг манай улс олон сар дотооддоо алдалгүй тогтоож байсан ч энэ арваннэгдүгээр сард харанга дэлдсэн нь тусгаарлалтаас “эрүүл” оноштойгоор гарсан тээврийн жолооч ковидоор халдварласан нь байлаа. Гэсэн ч энэ тохиолдол ганцхан голомт биш халвдарын хэд хэдэн голомт байгаа нь эдгээр өдрүүдэд ил болоод байна. Халдварын голомтыг тогтоож, хавьтлуудыг илрүүлж, тархалтыг хумихын тулд манай улс анх удаа бүх нийтийн бэлэн байдалд шилжээд хэд хонолоо.

“Бид үхэх сэхэхийн зааг дээр амьдарч байна. Бид амьдрах ёстой “ гэж Ерөнхий сайд У.Хүрэлсүх ийн өгүүлэв. Хатуу ч гэсэн үнэн үг.

Дэлхий нийтийг донсолгож байгаа цар тахлыг дотооддоо алдсан эдгээр өдрүүдэд сайн, муу олон л үйл явдал өрнөлөө. Хайртай бүхнээ хамгаалахын тулд хүн бүр хөл хорионы дэглэмийг сахиж гэртээ байх нь хамгийн аюулгүй төдийгүй, улс эх орноо аварч буй хүчин зүтгэл гэдгийг албаныхан удаа дараа хэлж, гуйж, басхүү хүч хэрэглэн шаардаж байгаа. Гэсэн ч монголчуудын хэнэггүй зан хэрээс хэтэрлээ.

Бүх нийтийн бэлэн байдал зарласан байхад энгийн өдрүүд шиг сэлгүүцэж, хотын замыг түгжрэлд орох хүртэл нь ачаалал үүсгэж дөнгөсөн.

Мөн хүнсний зах, махны худалдаанд дараалал үүсгэн, “байлдав”. Хөл хориог чангатгаж, нийтийн тээврийн хуваарьт өөрчлөлт оруулан явган хүний төдийгүй автомашины хөдөлгөөнийг хязгаарлалаа. Гэсэн ч байдал дээрдсэнгүй.

Бүх нийтийн бэлэн байдлын зэрэгт шилжиж хатуу хөл хорио тогтоосон эдгээр өдрүүдэд цагдаа, хууль хүчний 5000 гаруй алба хаагчид нийтийн хэв журмыг сахиулахаар үүрэг гүйцэтгэж буй. Тэдний ажил үүргийг төдийгүй, ард түмнээ, хайртай бүхнээ хамгаалахаараа гэртээ дэглэм сахиж байгаа иргэд олон.

“Сайны хажуугаар саар” гэгчээр үүрэг гүйцэтгэж буй алба хаагчдын тавьсан шаардлагыг биелүүлэхгүй эсэргүүцэх, хэл амаар доромжлох, тэр ч бүү хэл, цагдаагийн араас нулимж байгаа дүр зураг зураг цахим сүлжээнд тархав.

Үнэхээр харамсаж, халагламаар дүр зураг. Төр засаг, хууль хүчнийхэн гээд эл өвчинтэй тэмцэж буй бүхэн хэний төлөө, юуны учир хүчин зүтгэж байгаа билээ. Бодох л асуудал.  Монголчууд бид цөөхүүлээ. Цар тахал болсон эл аймшигт өвчнийг хамтын хүчээр, эв нэгдэлтэй байж л даван туулах учиртай. Үүнд хүн бүрийн хүчин зүтгэл хэрэгтэй. Түүнээс бус цагдаатай “байлдаж” цар тахалтай тэмцэхгүй.

Дэлхийн улс орнуудад ч хатуу хөл хорионы ачаар халдварын тархалтыг хумиж чадсан туршлага байгаа.

Тухайлбал БНХАУ-ын 24 сая хүн амтай Шанхай, 21 сая хүнтэй Бээжин, 13 сая хүн амтай Нанжин, 11 сая хүн амтай Гуанжоу зэрэг хотуудад хатуу хөл хорионы ачаар л халдварын тархалтыг зогсоож чадсан юм.

Тиймээс хайртай бүхнээ хамгаалахын тулд иргэн бүр амны хаалтаа зүүж, гэртээ байж, төр засгаас хийж хэрэгжүүлж буй ажлыг дэмжин хүчин зүтгэх нь бидний үүрэг болоод буй.

Б.Батчимэг