Галлагааны улирал эхэлсэн ч сүүлийн хэдэн өдөр утаа хоолой хорсгох боллоо. Сайжруулсан түлш хэрэглэснээр утааг өмнө 50 хувиар, энэ жилийн хувьд 80 хувиар бууруулах зорилт тавьсан билээ.

 Утаа хэдийгээр буурсан нь олзуурхууштай ч утаан дахь хорт бодисын хэмжээ нэмэгдсэн талаарх мэдээлэл аюул дагуулж байна. Агаарын чанарыг өдөр өдрөөр тодорхойлдог агаар.mn сайтад ороод үзэхэд өнгөрсөн оны хүхэрлэг хийн хэмжээг одоогийн мөн үетэй харьцуулахад гурав дахин их байгааг зааж байна. Нэг үгээр бол, агаар дахь хорт бодис ялангуяа азотын давхар исэл, хүхэрлэг хийн хэмжээ хүлцэх ёстой хэмжээнээсээ их байна гэсэн үг юм.

Яагаад утаа ихсээд байна вэ. Энэ асуултад Цаг уур, орчны шинжилгээний газрын Орчны шинжилгээний хэлтсийн дарга Ж.Батбаяр “Агаарын бохирдлын агууламжийг хэмждэг хүхэрлэг хий өнгөрсөн жилийн мөн үеийнхээс ахиу гарсан. Энэ нь галлагааны эрчим нэмэгдсэн, агаарын урсгал тогтуун байгаатай холбоотой” гэсэн тайлбар өгч байна. Агаарын чанарын индексийг таван зэрэглэлд хуваадаг байна. Тухайлбал,

-0-50  цэвэр

-51-100 хэвийн. Гэхдээ хэт мэдрэмтгий хүмүүст мэдрэгддэг.

-101-200 бага бохирдолтой

-201-300  бохирдолтой

-301-400 их бохирдолтой

-401-500 маш их бохирдолтой. Энэ тохиолдолд архаг хууч өвчтэй хүмүүс эмчийн хяналтад байх шаардлага үүсдэг байна.

Харин манайд агаарын чанарын индекс 500 давж, маш их бохирдолтой гэсэн зэрэглэлд орчихсон яваа. Энэ нь хожмоо ямар их уршиг дагуулахыг, хэдхэн жилийн дараа та бид энэ эрсдэлийн хохирогч болчихоод явж байхыг харин үгүйсгэхгүй.

У.Тэргэл