Монголын театрын урлагийн хөгжилд үнэтэй хувь нэмэр оруулж буй, хамгийн их хүлээлт дагуулдаг наадам бол "Гэгээн Муза". Өдгөө 17 жилийн зузаан түүхээ уран бүтээлчдийн гал эрмэлзэл, бүтээн туурвихуйн халуун хүслээр бичиж байна. Энэ бол зөвхөн монголын театрын урлагт хүчин зүтгэж буй бус олон улсын уран бүтээлчдийг нэгэн дээвэр дор "уулзуулдаг" баяр билээ.

Драмын урлагийн шилдгийн шилдгийг шалгаруулдаг "Гэгээн муза" наадам нь 2003 оноос эхлэн өнөөдрийн хүртэл тасралтгүй үргэлжилсэн юм. Түүнчлэн 14 дэх жилдээ зохион байгуулагдахдаа "Олон улсын наадам" болон өргөжсөн байдаг. 

Энэ удаагийн “Гэгээн муза-17” олон улсын театрын наадам есдүгээр сарын 7-17-нд болно. Хоёр жилд нэг удаа болдог хэдий ч энэ жилийн тухайд Монголын анхны дуулалт жүжиг болох "Саран хөхөө"-г бичсэн, тэр нь театрын урлагт нэгэн үзэгдэл болсон Ноён хутагт Данзанравжаагийн мэндэлсний 220 жилийн ойг тохиолдуулан зохион байгуулахаар шийдвэрлэжээ.

Наадмаар драмын жүжиг, хүүхдийн жүжиг, хоёр хүний жүжиг, нэг хүний жүжиг гэсэн нийт дөрвөн төрөлд шилдгүүдээ шалгаруулна. 

Нэр дэвшүүлэх комиссын нэгдүгээр шатны үзлэгт гадаад, дотоодын нийт 60 гаруй бүтээл бүртгүүлсэн байна. Эдгээрээс найман орны 23 бүтээл дараагийн шатанд шалгарч, дөрвөн төрлийн 22 номинацид нэр дэвшин өрсөлдөхөөр болжээ.

Онцлог-1: "Гэгээн муза 17"-д монголоос монголын театрын урлагт бичигдэн үлдэхүйц, найруулагчийн шинэ арга барил, эрэл хайгуул, жүжигчдийн ур чадвар нэвт гэрэлтсэн бүтээлүүд өрсөлдөж байна. Нэг жилд олон сайн бүтээл өрсөлдөж байсан тохиолдол бага юм. Өмнө жилийн тухайд "Гэм зэм"-ийнхэн тус наадмын тайзыг эзэгнэсэн билээ.

Онцлог-2: "Хүндэт муза"-гийн шагнал. Ахмад уран бүтээлчдийн гавьяаг хүндэтгэн алдаршуулна.

Шүүгчдийн бүрэлдэхүүнд олон улсын нэр хүндтэй дөрвөн шүүгч зочин шүүгчээр оролцож байна. Тодруулбал, Хонконгийн Театрын урлагийн сургуулийн багш, жүжгийн зохиолч Жанис Пун, Япон Улсын Токио дахь “D’UOMA ex machina” театрын үүсгэн байгуулагч, найруулагч, судлаач Какумуту Ацуши, Словени Улсын Любляна Младинско театрын уран сайхны удирдагч, жүжгийн зохиолч Татьяана Ажман, Гүрж Улсын тайзны урлаг судлалын ухааны доктор, профессор Леван Хетагури нар ажиллана. 

Драмын жүжгийн төрөлд:

“Сычуаны сайн хүн”          /УДЭТ/

“Тамгагүй төр”                  /”Херо энтертаймент групп” ХХК/

“Опал”                              /Орфей театр/

“Шөнө буусан аадар”        /Мөрөөдлийн театр/

“Инээмтгий хүн”                /Pro театр/

“Ууган хүү”                        /ОХУ-ын Буриадын драмын театр/

Хүүхдийн жүжгийн төрөлд:

“Миний аав супер баатар”          /УДЭТ/

“Асаж буй толгод”                       /Орхон аймгийн Хүүхэд залуучуудын театр/

“Шидэт модны үр”                      /Дархан-Уул аймгийн “Залуучууд” театр/

“Хамгийн том олз”                      /Өвөрхангай аймгийн Хүүхдийн жүжгийн театр/

“Модон зам”                                /Төв аймгийн “Монгол туургатан” театр/

Хоёр хүний жүжгийн төрөлд:

“Хунгийн дуу”                    /Монгол/

“100 иений тус”                 /Монгол/

“1001 шөнийн үлгэр”        /Румын/

“Задлан”                           /Буркина Фасо/

“Рио”                                 /Урагвай/

“Зэрлэг онгоноороо ...”     /Солонгос/

Нэг хүний жүжгийн төрөлд:

“Хэмхэрхий дүрснүүд”      /Монгол/

“Галт шувуу”                     /Монгол/

“Би ирлээ”                         /Монгол/

“Ричард III”                       /Монгол/

“Илвад үйлдвэрлэв”         /Итали /

“Элсэн цаг”                       /Польш/

“Салхины сүйт бүсгүй”     /Испани/ зэрэг жүжгүүд нэр дэшжээ.

Мөн “Гэгээн муза-17” наадмын хүрээнд “Нүүдэлчдийн соёл, сэтгэлгээ, мэргэжлийн театрын үндэс” сэдэвт олон улсын эрдэм шинжилгээний бага хурал, физикл сургалтыг зохион байгуулна. 

М.Жаргал