БНАСАУ ОХУ-ын Украинд хийж буй дайнд шууд үүрэг гүйцэтгэхэд бэлэн байгаа гэсэн тагнуулын мэдээлэл задраад байна. Уг мэдээллийг Украин, Өмнөд Солонгосын тал баталж, Хойд Солонгос цэргүүдээ Украинд нутаг дэвсгэрт илгээх зорилгоор Орос руу урьдчлсан сургуулилтад илгээсэн гэж мэдэгджээ. Орос, Хойд Солонгосын талаас энэ мэдээллийг няцаагаад байгаач баримтуудад үндэслэн Өмнөд Солонгосын тал "хэр хэмжээний цэргийн дэмжлэг үзүүлж байгааг дахин нягтлах хэрэгтэй" гэж мэдэгдэв. Сүүлийн саруудад Москва, Пхеньян АНУ-ын эсрэг цэргийн түншлэлээ гүнзгийрүүлж байгаа нь Киев, Вашингтоны албаныхныг түгшээж байна.
Хойд Солонгосчууд Украинд байгаа юу?
Украины Ерөнхийлөгч Владимир Зеленский өнгөрсөн долоо хоногт НАТО-гийн дээд хэмжээний уулзалтын үеэр “10 мянган” цэрэг, техникийн ажилтнуудыг бэлтгэж байгаа гэж хэлэхдээ, Хойд Солонгосын цэргүүд Оросын дайнд нэгдэж байгааг удаа дараа анхааруулсан.
Мягмар гарагт В.Зеленский уламжлалт оройн мэдэгдэлдээ, Украин руу илгээхээр ОХУ-аас Хойд Солонгосын хоёр цэргийн анги бэлтгэж байна. Тэд тус бүр нь 6000 хүнтэй хоёр бригад юм. Үүнийг манай тагнуулын мэдээлэл батална гэж мэдэгджээ. Зеленский мөн сэтгүүлчдэд хэлэхдээ, Украины түр зуур түр зуур эзлэгдсэн нутаг дэвсгэрт Хойд Солонгосын офицерууд болон техникийн ажилтнууд байхыг харсан. Орос Украинд нэвтрэх тусгай "бүлэглэл" бэлтгэж байна гэж үзэж байна гэжээ.
Украины тагнуулын албаны эх сурвалж өмнө нь CNN агентлагт мэдээлснээр Хойд Солонгосын цөөн тооны цэргүүд Оросын армид голдуу инженерийн чиглэлээр тусалж, Хойд Солонгосын зэвсгийн хэрэглээний талаар мэдээлэл солилцох зорилгоор хамтран ажиллаж байв.
Үүний зэрэгцээ Өмнөд Солонгосын тагнуулын алба баасан гарагт мэдээлснээр, Хойд Солонгос 1500 цэргийг, тэр дундаа тусгай хүчний дайчдыг Орост сургах зорилгоор илгээсэн байна.
Хойд Солонгосын цэргүүд Оросын Алс Дорнод дахь сургуулилтын баазад дүрэмт хувцас, техник хэрэгсэлтэй байгаа бичлэг задарснаар тагнуулын мэдээлэл улам батжив. Олон нийтийн сүлжээгээр тарсан өөр нэг бичлэгт цэргүүд ОХУ-ын Хятадтай хиллэдэг Сергеевка сургалтын талбайд ирж байгааг харуулсан байна.
Хойд Солонгос Оростой ямар харилцаатай вэ?
Орос, Хойд Солонгос хоёр дайн эхэлснээс хойш улам бүр найрсаг харилцаатай болсон гэхэд хилсдэхгүй. Зургадугаар сард хоёр улс батлан хамгаалахын чухал гэрээнд гарын үсэг зурж, аль нэг нь халдлагад өртсөн тохиолдолд яаралтай цэргийн тусламж үзүүлэхээр боломжтой бүх арга хэрэгслийг ашиглахаа амласан.
Барууны улсууд Пхеньяныг Украинд хийж буй дайнд зориулж Москвад зэвсэг нийлүүлсэн гэж буруутгаж байгаа ч томоохон нотолгоог үл харгалзан хоёр улс үгүйсгэсээр иржээ.
Мянга мянган тонн сум бүхий зэвсгийн тээвэрлэлт ОХУ-ын хилийг давсан гэх яриа бий. Үүний зэрэгцээ бэлэн мөнгөний хомсдолд орсон Хойд Солонгосыг оронд нь хоол хүнс болон бусад хэрэгцээт зүйлс авсан гэж үзэж байна.
Оросын тайлбар ямар байв?
Кремлийн хэвлэлийн төлөөлөгч Дмитрий Песков БНАСАУ-ын ажилтнуудыг Орост туслахаар илгээсэн гэх мэдэгдлийг үгүйсгэв. Даваа гарагт сэтгүүлчид Москва Украинд байлдуулахаар Умард Солонгосын цэргийг илгээж байгаа эсэхийг шууд асуухад Песков "хоёр улс харилцаагаа бүх талаар хөгжүүлж байна. Энэ хамтын ажиллагаа гуравдагч орны эсрэг чиглээгүй” гэжээ.
Даваа гарагт НҮБ-ын Ерөнхий Ассамблейн хуралдааны үеэр Хойд Солонгос уг мэдэгдлийг “үндэслэлгүй, хэвшмэл цуу яриа” гэжээ.
Гэхдээ Сөүл үүнийг хөнгөн хүлээж авахгүй байна. Даваа гарагт тус улсын Гадаад хэргийн яам ОХУ-ын элчин сайдыг дуудаж, “Хойд Солонгосын цэргийг нэн даруй гаргахыг” шаарджээ.
Орост цэргээр туслах нь ямар ашигтай вэ?
БНАСАУ-ын хөндлөнгийн оролцоо дайныг шинэ шатанд аваачиж магадгүй юм. Тусгаарлагдсан, хатуу дэглэмтэй улсын хувьд тив дамнан дайнд нөлөөлж байгаа нь сүүлийн хэдэн арван жилд тохиогоогүй үйл явдал юм.
Тус улс 1.2 сая цэрэгтэй дэлхийн хамгийн том армийг бүрдүүлсэн ч олон цэрэг байлдааны туршлагагүй.
Шинжээчдийн үзэж байгаагаар Умард Солонгос тал цэргээ тулааны талбарт оруулснаар дайны талбарт туршлага хуримтлуулах, техникийн бэлтгэл сургуулилт өгөх зэрэг олон талын ашигтай.
Л.Баяр
