Австралийн ахмад нэвтрүүлэгч, Уоллаби клубийн дасгалжуулагч асан Алан Жонс долоон эрэгтэй, насанд хүрээгүй настай хүүг хүчирхийлсэн хэргээр буруутгагдаж байна.
Даваа гаргийн өглөө Шинэ Өмнөд Уэльсийн Цагдаагийн Хүүхдийн хүчирхийллийн эсрэг багийн мөрдөгчид боомтын урд байрлах түүний эд хөрөнгөд нэгжлэг хийж, электрон төхөөрөмжүүдийг хураан авчээ. Улмаар 83 настай түүнийг Сидней дэх гэрээс нь баривчилсан байна.
Жонс бол Австралийн хэвлэл мэдээллийн хамгийн нөлөө бүхий зүтгэлтнүүдийн нэг бөгөөд 2023 онд "The Sydney Morning Herald" сонинд анх нийтлэгдсэн хүчирхийллийн гэх мэдээллийг өмнө нь үгүйсгэж байсан. Одоо түүнийг 2001-2019 оны хооронд үйлдэгдсэн гэх үндэслэлээр 24 хэрэгт буруутгаж байгаагийн 11-ийг нь хүндрүүлсэн заалтад шилжүүлээд байна. Уг хүндэвтэр хэргүүдийн хоёроос бусад бүх хэрэг нь бэлгийн гэмт хэрэг юм. Цагдаа нарын хэлснээр хохирогчдын зарим нь түүнийг таньдаг байсан.
Бусад хүмүүс түүнтэй анх уулзахдаа хүчирхийлэлд өртсөн гэж NSW-ийн цагдаагийн ажилтан Майкл Фицжералд сэтгүүлчдэд мэдэгдэв. Тэрбээр "Хохирогчид болон тэдний зориг зүрхийг магтмаар байна. Тэд одоо дуу хоолойгоо хүргэх боломжтой болсон. Энэ бол тэдний хүсч байсан зүйл" гэжээ.
Жонсыг батлан даалтад гаргахаар болсон бөгөөд түүнийг арванхоёрдугаар сарын 18-нд шүүхээр хэлэлцэх юм. Өмнө нь багш байсан Жонс 1984-1988 оны хооронд Австралийн регбигийн үндэсний шигшээ багийг дасгалжуулж, улмаар радиогийн карьераа эхлүүлсэн.
Тэрбээр мөн Ерөнхий сайд асан Малколм Фрейзер зэрэг Либерал намын зүтгэлтнүүдэд зөвлөхөөр ажиллаж байсан бөгөөд муж улс болон холбооны улс төрд намаа төлөөлөх хэд хэдэн амжилтгүй оролдлого хийж байв.
Л.Баяр
