“Цагаан алт” үндэсний хөдөлгөөний хүрээнд батлагдсан Улсын Их Хурлын 2024 оны 63 дугаар тогтоолд Үндэсний ажил, мэргэжлийн тодорхойлолтыг шинэчлэх, хүний нөөцийн чадавхыг бэхжүүлэх чиглэлийг тусгасан байдаг.

      Энэ хүрээнд Гэр бүл, хөдөлмөр, нийгмийн хамгааллын яам, Монголын Ажил Олгогч Эздийн Нэгдсэн Холбоо, Хүн ам, хөдөлмөр, нийгмийн хамгааллын сургалт, судалгааны хүрээлэн хамтран Үндэсний ажил, мэргэжлийн ангилал, тодорхойлолт болон сургалтын хөтөлбөрийг боловсронгуй болгох асуудлаар хэлэлцүүлэг зохион байгуулж, хамтын ажиллагааны санамж бичиг байгууллаа.

Монгол Улсад мөрдөж буй ажил, мэргэжлийн ангилал 2010 оноос хойш шинэчлэгдээгүй байна. Гэтэл хөдөлмөрийн зах зээлд дижитал технологи, цахим шилжилт, сошиал медиа болон хиймэл оюун ухаанд суурилсан шинэ мэргэжлүүд олноор бий болж, зарим уламжлалт мэргэжил технологийн хөгжлөөс шалтгаалан хоцрогдох хандлагатай болсон юм.

Мөн мэргэжлийн болон техникийн боловсрол, сургалтын салбарт шинэ чиглэл, мэргэжлүүд бий болж байгаатай уялдан ажлын байрны тодорхойлолт, түүнд шаардагдах ур чадвар, сургалтын хөтөлбөрийг шинэчлэх хэрэгцээ нэмэгдэж байна.

     Иймээс үндэсний болон салбар хоорондын нэгдсэн ойлголтыг бүрдүүлэх, Үндэсний ажил, мэргэжлийн ангилал, тодорхойлолтыг шинэчлэн сайжруулах, хөдөлмөрийн зах зээлд шинээр бий болж буй хиймэл оюун ухаан, дижитал технологи, цахимжилтын чиглэлийн мэргэжлүүдийг бүртгэлжүүлэх шаардлага үүсээд байна.

Түүнчлэн эдгээр чиглэлээр үйл ажиллагаа явуулж буй аж ахуйн нэгж, байгууллагуудын хэрэгцээнд нийцсэн, ур чадварын зөрүүгүй боловсон хүчин бэлтгэх, боловсролын байгууллагуудын хөгжлийн чиг хандлагыг тодорхойлоход энэхүү ажлын ач холбогдол оршиж байгааг хэлэлцүүлгийн үеэр онцоллоо.

С.Чимэдцэеэ