Цагдаагийн байгууллагын мэдээллээр 2024-2026 оны хугацаанд Эрүүгийн хуулийн 17.3 дугаар зүйлд заасан залилах гэмт хэргийн 39,665 тохиолдол бүртгэгдэн шалгагджээ. Үүнээс орон сууцны захиалга авч бусдыг залилсан 1,167 хэрэг бүртгэгдсэн нь нийт залилах гэмт хэргийн 2.9 хувийг эзэлж байна.

Орон сууцтай холбоотой эдгээр хэргийн улмаас нийт 3,613 иргэн 204.9 тэрбум төгрөгийн хохирол амсаад байгаа аж. Одоогийн байдлаар цагдаагийн байгууллагад шалгагдаж буй орон сууцтай холбоотой хэрэг бүртгэлт, мөрдөн байцаалтын хүрээнд 995 иргэн 64.5 тэрбум төгрөгийн хохирол учирсан бөгөөд 79 иргэн, 22 хуулийн этгээдэд холбогдох 259 хэрэгт мөрдөн шалгах ажиллагаа үргэлжилж байна.

Энэ асуудлыг Засгийн газрын 2026 оны долдугаар сарын 21-ний өдрийн хуралдаанаар хэлэлцсэн байна. Ерөнхий сайд Н.Учрал орон сууцныхаа төлбөрийг бүрэн төлсөн ч түлхүүрээ авч чадаагүй, улмаар түрээсийн байранд амьдарч хохирсон иргэдийн асуудлыг шийдвэрлэх шаардлагатай байгааг онцолж, холбогдох ажлын хэсгийг яаралтай байгуулан ажиллах үүрэг, чиглэл өгчээ.