Баримт 1
Монголчууд эртнээс нааш морио эрхэмлэн дээдэлж, уналга, ачилга, дайн тулаанд ашиглаж ирсэн таван хошуу малын нэг учраас хөгжмийн зэмсгээ мориороо нэрлэн, төрийн сүлдэндээ хүртэл тахин шүтэж иржээ.
Баримт 2
Монголчууд дэлхийн түүхийг бичилцэж, дэлхийг байлдан дагуулж байсан бүх л үеийг чухам монгол морьгүйгээр төсөөлөхийн аргагүй юм.
Баримт 3
Монгол нутагт адууг уналга эдэлгээнд ашиглаж эхэлсэн цаг хугацаа тодорхойгүй боловч НТӨ 2000 жилийн өмнөөс адууг гаршуулан эдэлж хэрэглэж байсан нь археологийн судалгаагаар батлагджээ.
Баримт 4
Монгол нутагт хүрэл төмрийн түрүү үед хамаарах хадны зурагт цувж яваа морьд, морь хөтөлсөн хүн, тэрэг хөллөсөн морьд зэргийг дүрсэлсэн нь адууг уналга эдэлгээнд хэрэглэж байсныг илтгэх хамгийн эртний дурсгал юм.
Баримт 5
Монголчууд эртнээс адууныхаа үүлдэр, угсааг гойд анхааран сайжруулж, тал, говь, хангай, уулын бүс нутгуудад тохирсон шилмэл үүлдэр Галшар, Тэсийн гол, Дархад, Мянгад, Шанхайн хэц, Сан бэйс, Барга, Үзэмчин, Баянцагаан, Заамар, Орлой зэрэг олон омгийг үүсгэжээ.
Баримт 6
Адууны тархи биеийн хэмжээтэй харьцуулахад харьцангуй бага бөгөөд нийт жингийнх нь 0.1 хувийг эзэлдэг.
Баримт 7
Жижиг хэмжээтэй ч тархины кортекс нь өндөр хөгжижээ. Кортекс гэдэг нь ухамсарт бодол, шийдвэр гаргах, ой тогтоолтыг хариуцдаг тархины хэсэг юм.
Баримт 8
Морь нь үсрэлт хийх, хэвтэх, босох, налах, хурдлах зэрэг нарийн даалгавруудыг маш сайн гүйцэтгэж, эзнийхээ хэмийг мэдэрч, хөдөлгөөнийг тааруулан, хайрлаж дасаж ээнэгшихдээ гарамгай.
Баримт 9
Хүний нэгэн адил моринд зүүн болон баруун тархи байдаг бөгөөд Зүүн тархи логик болон аналитик мэдээллийг боловсруулах үүрэгтэй бол баруун нь сэтгэл хөдлөл, сурснаа гаргах, хийж гүйцэтгэх дадалд илүү оролцдог.
Баримт 10
Морь нь ой тогтоолт сайтай. Тодорхой хүмүүс, газар орон, туршлагыг олон жилийн турш санаж чаддаг.
Баримт 11
Адуу нь маш мэдрэмтгий, Хүрэлцэж буй хамгийн бага даралт, зодуур, зовуурь, өвдөлт, холголт зэргийг сайн мэдэрдэг. Энэ нь эзэн болон, унаач эсвэл хөтчөөс өгсөн нарийн командад хариу өгөхөд тусалдаг.
Баримт 12
Адуу нь харааны өндөр мэдрэмжтэй тул олж харснаа маш хурдан, зөв боловсруулж, болзошгүй аюулаас сэргийлж чадна.
Баримт 13
Адуу бол сүргийн амьтан бөгөөд бусад адуутайгаа хэмээр харьцдаг. Нүүрний хувирал, нүдний хөдөлгөөн, тургилт, янцгаах дууны өндөр, нам давтамжаар бие биеэ ойлгож чадна.
Баримт 14
Бүх амьтны нэгэн адил адуу нь өөр өөрсдийн зөнтэй. Сайн муу хүнийг төвөггүй ялгаж чадна.
Баримт 15
Адууны үнэрлэх мэдрэмж маш хүчтэй хөгжсөн байдаг нь тархин дахь үнэр мэдрэх чадамж нь бусад хэсгүүдээсээ том.
Баримт 16
Түүний хөдөлгөөн, тэнцвэрийг зохицуулах үүрэгтэй тархи сайн хөгжсөн тул морин дээрээс юм шүүрэх, хөөж яваа амьтнаа цохиход налж өгөх бөгөөд араатнаас зугтахдаа ч бартааг хялбар туулж, амиа аварч чаддаг болгожээ.
Баримт 17
Адуу өвдөлт, өвчнийг сайн тэсвэрлэх тул эмчлэхэд жаахан төвөгтэй.
Баримт 18
Шинэ зүйл сурахдаа хурдан, ой тогтоолт сайтай байдаг нь тархины нэг хэсэг болох hippocampus нь моринд онцгой сайн хөгжсөнтэй холбоотой.
Баримт 19
Эцэст нь, адуу бусад амьтдын адил айдас, аз жаргал, уур хилэн, хайр талархал зэрэг сэтгэл хөдлөлийг мэдэрч чаддаг болохыг судалгаагаар тогтоожээ.
Баримт 20
Монголчууд эрэгтэй хүүхэддээ арван гурван нас хүрэхэд шинээр эмээл, хазаар төхөөрч өгдөг уламжлалтай. Энэ нь хүүхдээ гар нь ганзаганд, хөл нь дөрөөнд хүрч эр хүн болсныг бэлэгдсэн хэрэг билээ.
Сэтгэгдэл (14)