Тайландын нийслэл Бангкок хотын ойролцоох Нонтхабури мужийн нэгэн сургуульд наймдугаар сарын 7-нд буудалцаан гарч, багш болон халдлага үйлдсэн сурагч амиа алдлаа.

Мөн дөрвөн хүн шархадсан байна. Цагдаагийн мэдээлснээр, хэрэг Нонтхабури мужийн Банг Круай дүүрэгт байрлах Дебсирин Нонтхабури сургуульд болсон байна. Сэжигтэн нь тус сургуулийн сурагч байсан бөгөөд халдлага үйлдсэнийхээ дараа өөрийгөө буудан хороожээ. 

Халдлагын үеэр нэг багш амиа алдаж, өөр нэг багш болон гурван сурагч шархадсан байна.  Нонтхабури мужийн цагдаагийн удирдлага хэргийн талаар мэдээлэхдээ, буудсан этгээдийг сурагч байсан гэдгийг баталсан ч халдлагын шалтгаан, зэвсгийг хэрхэн олж авсан зэрэг нарийн мэдээллийг одоогоор ил болгоогүй байна.

Дебсирин Нонтхабури сургууль нь Бангкокийн баруун хойд хэсэгт байрладаг бөгөөд 2025 оны хичээлийн жилд ойролцоогоор 3100 сурагч, 147 багштай байсан гэж орон нутгийн захиргаа мэдээлжээ. Энэ нь Тайландад сүүлийн саруудад гарсан сургуулийн орчин дахь буудалцааны хоёр дахь томоохон тохиолдол болж байна. Өмнө нь 2026 оны хоёрдугаар сард тус улсын өмнөд хэсгийн Хат Яй дүүргийн сургуульд буудалцаан болж, сургуулийн захирал амиа алдаж, сурагч шархадсан хэрэг гарч байжээ.

Тайланд улс галт зэвсгийн хэрэглээ өндөртэй орнуудын нэг бөгөөд өмнө нь ч олон нийтийг цочроосон буудалцааны хэргүүд гарч байсан. 2022 онд Нонг Буа Лампху мужийн хүүхдийн цэцэрлэгт халдсан хэрэгт 36 гаруй хүн амиа алдсан нь тус улсын түүхэн дэх хамгийн аймшигт халдлагуудын нэг болсон юм.

Одоогоор Тайландын эрх баригчид сургуулийн аюулгүй байдлыг нэмэгдүүлэх арга хэмжээ авч, халдлагын цаад шалтгааныг тогтоох мөрдөн шалгах ажиллагааг үргэлжлүүлж байна.

Л.Баяр