Америкийн дуучин, жүжигчин Ариана Гранде Лондон хотын "O2 Arena"-д хийсэн тоглолтоороо “Eternal Sunshine” аялан тоглолтоо өндөрлүүлж, хэсэг хугацаанд олны нүднээс холдохоор болжээ. Тэрбээр есдүгээр сарын 1-нд болсон тоглолтын үеэрээ сэтгэл хөдлөлөө барьж дийлэлгүй уйлсан байна. Гранде энэ аялан тоглолтыг амьдралынхаа “хамгийн үзэсгэлэнтэй, гайхалтай туршлагуудын нэг” хэмээн тодорхойлж, дэмжиж ирсэн шүтэн бишрэгчдэдээ чин сэтгэлээсээ талархал илэрхийлжээ.

Тус тоглолт нь “Eternal Sunshine” аялан тоглолтын 41 дэх нь байсан бөгөөд сүүлийн тоглолт болсон юм. Аялан тоглолт зургадугаар сарын 6-нд АНУ-ын Окленд хотоос эхэлж, АНУ, Канад болон Их Британи хүртэл үргэлжилжээ. Лондонд тэрбээр нийт 10 удаа тайзнаа гарсан байна.

Гранде тайзан дээрээс үзэгчдэд хандан “уйлалгүйгээр талархлаа илэрхийлэхийг хүсэж байна” хэмээн хэлээд, энэ бүх хугацаанд хамт байсан шүтэн бишрэгчдэдээ талархжээ. Тэр мөн уг туршлагыг үргэлж нандигнан санах болно гэдгээ илэрхийлсэн байна.

Ариана Гранде өмнө нь аялан тоглолтоо дуусгасныхаа дараа хэсэг хугацаанд олон нийтийн амьдралаас хөндийрөхөө мэдэгдсэн юм. Түүний төлөөлөгчийн мэдээлснээр, энэ нь байнгын анхаарал, шүүмжлэлээс завсарлага авч, өөртөө цаг гаргахтай холбоотой шийдвэр ажээ.

Тэр мөн “Sunday in the Park with George” мюзиклийн Уэст-Эндийн шинэ хувилбарт тоглох төлөвлөгөөнөөсөө татгалзсан байна.

Ийнхүү 41 тоглолтыг багтаасан “Eternal Sunshine” аялан тоглолтын төгсгөл Ариана Грандегийн хувьд зөвхөн тайзнаас буусан мөч бус, олны анхаарлаас түр хугацаанд холдох шинэ амьдралынх нь эхлэл болж байна.

Л.Баяр