Реппер Rokit bay  бие даасан  хоёр дахь “Эвдэрхий хүн”  цомгийнхоо баярыг өчигдөр орой 19.00 цагаас “iLoft function house”-д  хийлээ. Үзэл бодол, өвөрмөц дуу хоолойгоороо олонд танигдсан тэрээр энэ удаад ч цомгийн танилцуулгаа элдэв хэв маяг хөөлгүйгээр зохион байгууллаа.

Монголын рок, поп урлагийнхан хэвлэлийн бага хурал зарлан шинэ уран бүтээл, цомгоо танилцуулдаг уламжлал хэдийнэ хэвшил болсон. Тэгвэл  реппер Rokit bay хурал хийлгүйгээр шууд л цомгийн нээлтээ хийсэн юм. Нээлтийн эхэнд тэрээр хүрэлцэн ирсэн  эхний 10 сонсогч фенүүддээ өөрийн имиж гэж хэлж болох логотой подволк бэлэглэсэн билээ. Подволк авсан залуучуудын хувьд  бүгд л түүний гарын үсгийг зуруулж байлаа. Мөн цомгийг нь худалдаж авсан фенүүдтэйгээ халуун дотно яриа өрнүүлж, гарын үсгээ зурж өгсөн юм. Цомгийн нээлтийг ажиглаж байхад  тэрээр залуучуудын дунд өөрийн гэсэн нэр хүнд, байр суурийг хэдийнэ авсан харагдана.
Түүний фен бүсгүйгээс тусгайлан боолгосон гарын бэлэг өгөв. Мөн сандарч, догдолсон нэгэн охин  тэсэхгүй тэврээд авч харагдав. Гарын үсгийг нь авах гэсэн залуучууд олон байсан ба өөрсдийн өмсөж буй цамцан дээрээ ч гарын үсэг зуруулж байлаа. Хамгийн хөгжилтэй нь мөнгөн тэмдэгтэн дээр Rokit bay-ийн гарын үсгийг зуруулаад үхэн үхтлээ хадгална гэсэн залуу ч байлаа.  Гарын үсэг зурах ажиллагаа цаг гаруй үргэлжилсэн бөгөөд дараа нь реппер залуу маань залуучуудтай зургаа авахуулсан юм.
Тэрээр  цомогт орсон шинэ дуунуудаа  таницуулан хэрхэн бүтсэн түүхээс хуваалцсан юм. Тэрээр цомгийнхоо хамгийн эхэнд орсон  “Чөтгөрийн пи ар” дуунаасаа эхлээд бүх дуугаа ямар утга учиртай дууг тайлбарласан юм. Тухайлбал, "Сахилга сул" дуу одоо үеийн нийгмийн замбараагүй байдлыг элэглэсэн утгатай. "Хамааралтай байсан бол" ерөнхийдөө залуу уран бүтээлч хүмүүсийн удирдлаганд уран бүтээлээ туурвидаг. Өөрийнхөөрөө байж чаддаггүй. Үүнийг тайлбарласан гэнэ. Мөн "Эвдэрхий хүн" цомгийнхоо нэртэй адил "Эвдэрхий хүн" дуу оруулсан аж. Энэ дуунд хайр сэтгэлээсээ болж эвдэрсэн хүний тухай өгүүлдэг байна.
Түүний дууг хэн сайн дуулах вэ? хөгжөөнт тэмцээн зохион байгууллаа. Хамгийн сонирхолтой нь Rokit bay-ийн дууг охидууд маань ч сайн дуулж байсан шүү. Эхлээд ямар ч аягүйгээр түүний дуунуудаас хамгийн сайн мэддэгээ дуулж үзүүлсэн бол эл тэмцээнд шалгарсан залуучууд  “Нэг өдрийн хаан” гэх түүний хит дууг аятайгаар дуулсан юм. Ямарч цомгийн баяр дээр дуучин өөрөө дуугаа дуулж сонирхуулдаг бол Rokit bay фенүүдээ дуулуулж, маш идэвхтэй байлгаж тэр үдшийг хөгжөөж чадсан юм. Дууны тэмцээн өрсөлдөөнтэй, хөгжөөнтэй болж өндөрлөсөн билээ.
Фэйсбүүк болон онлайн хэлэлцүүлгээр шалгарсан асуултыг хөтлөгч Rokit bay-ээс асуусан нь хэн хүний сонирхлыг татсан юм. Мөн тэнд цугласан хүмүүсч хүссэн асуултаа чөлөөтэй асууж, Rokit bay-ч чөлөөтэй хариулж байлаа. Хэвлэл мэдээллийн хэрэгслээр ярилцлага өгч , телевиз радиогоор гараад байхыг хүсдэггүй ч тэрээр өөрийн фен залуучуудтайгаа их л чөлөөтэй, нээлттэй харилцаж байв. Ингээд залуучуудын мэдэхийг хүссэн олон асуултад  нэгийг ч алгасалгүй хариулж өгөв. Энэхүү асуулт, хариултыг бүрэн эхээр нь маргааш хүргэх болно.