Эдийн засгийн байнгын хорооны хуралдаанаар “Сэлбэ дэд төв”-ийн тендерийн босго үндэсний компаниудад өндөр байгаа талаарх асуудлыг хэлэлцэж байна. Энэ үеэр Хотын дарга Х.Нямбаатар асуултад хариулж, дараах мэдээллийг өгөв.
Тэрбээр "Бид нар хамгийн бага буюу 20 хувийн босго тавьсан. Худалдан авалтынхаа сүүлийн хоёр багцыг 5 багц болгож жижиглэе гэдэг саналаа 17 хөрөнгө оруулагч руу явуулж зөвшилцөнө. Бид өөрсдөө анх 11 багц бүтээн байгуулалтын ажил хийе гээд нөгөөдүүлтэйгээ зөвшилцчихөөд одоо дур мэдэж шийдэж болохгүй. Бид нар цахимаар хурал хийгээд явчихъя.
Би хууль зөрчөөгүй. Энэ бүх зовлонг гэтэлгэх гээд Худалдан авах ажиллагааны тухай хуульд өөрчлөлт оруулахаар өргөн барьсан боловч харамсалтай нь дэмжигдээгүй. Манай Тендерийн хууль ганцхан НҮБ-ын тогтвортой хөгжлийн зарчмыг шингээгээд үлдсэнийг нь хаячихсан.
Ханшийн алдагдал тооцох, олон улсын арбитрт маргах гээд бүгдийг нь энэ хууль дээр хориглочихсон байгаа юм. Тиймээс бид том бүтээн байгуулалтын ажлыг хийхэд оролцогч аж ахуйн нэгжээ хамгаалахын тулд ханш, инфляцын уналтыг хүртэл хамгаалах зохицуулалтгүй хуулиар явж байгаа. Өөрөөр хэлбэл, хөгжиж байгаа орнуудад зориулсан загвар хуулиар өнөөдөр манай Худалдан авахын хууль явж байгаа. Тэгээд хуулиндаа маш өндөр босго тавьчихсан" гэлээ.
