Өчигдөр АТГ-аас Д.Батхуягийн 106 лицензийг  сонгон шалгаруулалтгүй олгосон учир хүчингүй болгосон тухай мэдээлсэн. Тэгвэл уул уурхайн 106 лицензээ хүчингүй болгуулсан kомпаниуд  зүгээр суухгүй бололтой. Тэдний шүүхэд хандахаар болсон тухай ойрын эх сурвалж мэдээллээ.  Анхан шатны шүүхээс 6.6 жилийн хорих ял сонсоод байгаа Д.Батхуяг эл шийдвэрийг эсэргүүцэн давж заалдах шатны шүүхэд гомдол гаргасан. Нийслэлийн шүүх гомдлыг хүлээн авсан учраас ирэх даваа гараг буюу энэ сарын 15-нд түүний гомдлыг хэлэлцэнэ. Д.Батхуягтай хамт  Геологи, уул уурхайн кадастрын газрын дарга Т.Даваацогт,  “Зэлэм” компанийн захирал Жаргалсайхан, Бат-Ирээдүй нарыг буруутган шүүж байгаа. Дээрх хүмүүсийн хэргийг өнгөрсөн нэгдүгээр сард Баянзүрх дүүргийн шүүгчид гурав хоногийн турш хэлэлцэж, Д.Батхуягт 6.6 жил, Т.Даваацогтод зургаан жил, н.Жаргалсайхан, н.Бат-Ирээдүй нарт тус тус 5.1 жилийн ял оноосон билээ.


   
   Д.Батхуяг АМГ-ын даргаар ажиллаж байхдаа авлига авч, хууль бус лицензийн наймаа хийсэн хэмээн түүнийг шүүж байгаа юм. Ц.Батхуяг өмнө нь  ч ийм асуудлаар шалгагдаж байсан. Хамгийн их лобби ордог, хамгийн их “хаялгатай” гэгддэг АМГ-т орсон цагаасаа нь эхлээд түүнийг хар, хор дагаж эхэлсэн тухай хүмүүс ярьдаг.  Урт нэртэй хуулийн хүрээнд шийдвэрлэх байсан  194 тусгай зөвшөөрлийн асуудалтай холбоотойгоор анх шалгагдаж эхэллээ гэгдэж байсан тэрээр эрх мэдэл, албан тушаалаа урвуулан ашиглаж 40 гаруй компанид лицензийн асуудлыг нь шийдвэрлэж өгсөн хэрэгт буруутгагдаж байгаа.

  Д.Батхуягийг Ерөнхий сайд асан С.Баярын хүн гэдэг.  Учир нь С.Баяр түүнийг улс төрд оруулсан юм. Түүний АМГ-ын дарга болохоос өмнөх намтар, түүхийн мэдээлэл ховор аж. Тэрбээр энэ албан тушаалд очихоосоо өмнө “Тэс Трэйд” компанийн захирлаар ажиллаж байсан.  Д.Батхуягийн өнгөрсөн оны хөрөнгө орлогын мэдүүлгээс харахад тэрбээр агентлагийн дарга нараас хамгийн их бэлтэй, жилийн 115 сая төгрөгийн орлоготой болж таарсан. Мөн нэр дээр нь “Хөвсгөл алтан дуулга”, “МКМ”, “Ашихай” зэрэг компаниуд байна. Шаггүй уяач, морины хорхойтон гэдгээр нь хүрээнийхэн нь андахгүй.
     Тэрбээр 2012 онд УИХ-ын сонгуульд нэр дэвшихээр шийдсэн тул сонгуулийн хуулийн шинэ заалтын дагуу энэ оны эхээр АМГ-ын даргын албан тушаалаа өгсөн.  Тэрээр АМГ-ын даргын ажлаа өгөөд ерөнхий сайд С.Батболдын ивээлд багтаж, орон тооны бус зөвлөх болсон юм. Ингээд Хөвсгөлд эзэн суухын даваан дээр түүний өмнөх хэргүүд нь АТГ-т шалгуулж эхэлсэн. Энэ бүх хэрэг хойш чангаагаагүй байсан бол тэрбээр УИХ-д гарах багагүй магадлалтай байсан.

  Өмнө нь АМГ-ын даргаар ажиллаж байх үед нь түүнийг хууль бусаар 192 лиценз олгосон гэж шалгаж байсан ч хэрэгсэхгүй болгосон. Гэхдээ "Нэгэнт шүүхээр шийдүүлж, гэм буруугүй гэж тогтоогоогүй тул шинэ баримт гарч ирвэл дээрх 192 лицензийн хэргийг дахин сэргээх магадлалтай" байгаа.

Авлигатай тэмцэх газрын мөрдөн байцаалтын явцад Д.Батхуягийг Үндэсний аюулгүй байдлын зөвлөлөөс гаргасан ашигт малтмалын хайгуулын лиценз олголтод хязгаарлалт хийх шийдвэрийг зөрчиж, АМГ-ын даргаар ажиллаж байхдаа эрх мэдлээ хэтрүүлэн ашиглаж, 120 орчим лицензийн зөвшөөрлийг хууль бусаар бусдад олгосон болохыг тогтоогоод байгаа.

Мөн Д.Батхуяг, Л.Даваацогт нар нь бүлэглэн 2009, 2010 онд эрх мэдэл буюу албан тушаалаа урвуулан ашиглаж, Ашигт малтмалын тухай хуулийн холбогдох заалтуудыг зөрчин, сонгон шалгаруулалтаар олгох ёстой нийт 106 ширхэг тусгай зөвшөөрлийг бусдад сонгон шалгаруулалтгүйгээр олгож, төрийн байгууллагын хуулиар хамгаалагдсан эрх ашигт хүнд хор уршиг учруулсан хэрэгт буруутгагдаж байгаа. Гэхдээ энэхүү 106 лицензийг хүчингүй болгосон юм.

Түүнчлэн С.Жаргалсайхан, Ш.Бат-Ирээдүй нартай бүлэглэн "Саусгоби сэндс" ХХК-ийн эзэмшлийн ашигт малтмалын дөрвөн тусгай зөвшөөрлийг Ашигт малтмалын тухай хуульд зааснаар цуцлах тухай дүгнэлт гарсан байхад цуцлах үүргээ хэрэгжүүлэлгүй, тус компанийн ашиг сонирхлын үүднээс үүссэн нөхцөл байдлыг ашиглан хясан боогдуулах замаар тусгай зөвшөөрлийг сэргээж, С.Жаргалсайханд, "Зэлэм" ХХК-ийн эзэмшилд шилжүүлэн хээл хахууль авсан гэмт хэрэгт тус тус буруутгагдаад байгаа юм.

    Ашигт малтмалын газрын дарга асан Д.Батхуяг нарын дөрвөн хүнд холбогдох хэргийн давж заалдах шүүх хурал ирэх даваа гарагт болох тухай дээр мэдээлсэн. Хэрвээ шүүх хэргийг хэвээр үлдээвэл түүнд Улсын дээд шүүхийн хяналтын шатны шүүхэд хандаж гомдол гаргах эрх байгаа. Тэрээр гомдол гаргахын бол Дээд шүүх хэргийг хэлэлцэнэ. Нийслэлийн шүүхээс хэргийг дутуу явагдсан гэж үзвэл Мөрдөн байцаалтад буцаах, ялыг өөрчлөх боломжтой. Хэргийг хэрэгсэхгүй болгох ч боломжтой юм. Түүнийг цаашид хэрхэх нь ирэх даваа гарагт болох Нийслэлийн шүүх хурлын шийдвэрээс хамаарна.