Эрүүл мэндийн дэд сайд Ж.Амарсанаа БНКУ-аас Монгол Улсад суугаа Элчин сайдын яамны хэргийг түр хамаарагч ноён Омар Лауро Мерреро Бетанкуртыг өнөөдөр хүлээн авч уулзлаа. Уулзалтын үеэр дэд сайд, ноён Омар Бетанкуртад таны хүсэлтийн дагуу уулзаж, танилцаж байгаадаа баяртай байна. Манай хоёр улсын Эрүүл мэндийн салбар дахь харилцаа, хамтын ажиллагаа олон жилийн түүхтэй болохыг онцлон хэлмээр байна. Манай улсын Эрүүл мэндийн салбарт Куба улсын оруулсан хувь нэмэр их бөгөөд эрүүл мэнд, анагаах ухаан, ялангуяа шүдний чиглэлээр олон эмч, мэргэжилтэн суралцаж төгсгөсөн бөгөөд эдгээр мэргэжилтнүүд маань балбартаа манлайлан ажиллаж байна. Куба улсын Засгийн газрын тэтгэлгээр бакалаврын сургалтанд нийт 140 гаруй Монгол оюутан суралцаж төгсгөсний нэлээдгүй хувийг ерөнхий анагаах ухаан, нүүр ам судлалын чиглэлээр төгсөгчид эзлэдэг ба одоогоор шинэ байгуулагдсан Латин-Америкийн дээд сургуульд нийт долоон монгол оюутан суралцаж байгаа.

Мөн цаашид Куба улстай оюутан солилцоог нэмэгдүүлэх болоод тус улсын эрдэмтдийг урьж сургалт явуулж мэргэжилтэн бэлтгэх тал дээр хамтарч ажиллах хүсэлтэй байгаа тухайгаа хэллээ. Харин ноён Омар Бетанкурт хамтын ажиллагааны хүрээнд хоёр улсын хамтарсан эмнэлэг байгуулах хүсэлтэй байгаа бөгөөд энэ нь нүдний чиглэлээр байвал оновчтой юм хэмээлээ. Мөн Куба улс нь олон төрлийн эм, вакцин үйлдвэрлэдэг бөгөөд нийлүүлэх боломжтой гэдгийг хэллээ. Үүнээс гадна Эрүүл мэндийн дэд сайд Ж.Амарсанаа “Хоёр улсын цаашдын хамтын ажиллагаа улам батжин, туршлага солилцож, Монгол Улс, БНКуба улсын Эрүүл мэндийн салбарын тогтолцоо, бодлого, чанар,хүртээмжтэй байдлаас суралцсаар байх болно” гэв.