Шинэчлэлийн Засгийн газрын сайн ажиллаж буй яамдын нэг нь Эрчим хүчний яам хэмээн “Шударга ёс” бүлгэм иргэний байгууллага үнэлж байна. 2012 оноос эрчим хүчний бүтээн байгуулалтын чиглэлээр олон ажил хийсэн байна. Яамдын ажлын сайныг нь хэлж, саарыг нь засч байх нь “Шударга ёс” бүлгэмийн нэг зорилго юм.
    Эрчим хүчний сайд М.Сономпил: “Олон жил яригдсан “ТЭЦ 5”-ын тендерийг наймдугаар сарын 26-ны өдөр эцэслэсэн.Төрийн ордонд сэтгүүлчдийн нүдэн дээр тэднээс сүүлчийн саналыг нь авсан. Интернэшнл повер консерцуим нэг кВт цахилгааныг 63.40 төгрөгөөр өгөх санал ирүүлснээр тендерийг хэрэгжүүлэхээр болсон. Засгийн газрын хуралдаанаар гэрээг эцэслэн батална” гэж “Өдрийн сонин”-д ярилцлага өгчээ.
    Улаанбаатар хотын өсөн нэмэгдэж буй дулааны хэрэглээг хангах 300Гкал.ц-ын суурилагдсан хүчин чадалтай “Амгалан” дулааны станцын барилгын ажлыг  2013 оны 8 дугаар сарын 21-нд эхлүүлснээс хойш газар шорооны ажил 80 хувьтай байна. Ирэх оны 8 дугаар сард бүрэн хүчин чадлаар ашиглалтад хүлээн авна.Тус станц ашиглалтад орсноор нийслэлийн зүүн захын 50 гаруй мянган хэрэглэгчдийн дулааны хангамж сайжирч шинээр дулаанд холбогдох боломж бүрдэнэ.
    Улаанбаатар хотын ДЦС-3 ХК-ийн хүчин чадлыг 50МВт-аар өргөтгөх төслийг эхлүүллээ. Мөн 9 дүгээр зуухыг сэргээн засварлах ажлыг 2014 онд дуусгах төлөвлөгөөтэй  ажил энэ оны долдугаар сард эхэлсэн бөгөөд өнөөдрийн байдлаар тоног төхөөрөмж үйлдвэрлэлийн ажил 90%-тай явагдаж байна. Ийнхүү өргөтгөснөөр Төвийн бүсийн эрчим хүчний системийн хүчин чадал 50 МВт-аар, Улаанбаатар хотын дулаан хангамжийн системийн хүчин чадал 75 Гкал/ц-аар нэмэгдэж, Хан-Уул, Баянзүрх дүүрэгт шинээр баригдаж байгаа барилгуудыг дулааны эрчим хүчээр хангах боломжтой болно. Энэхүү бүтээн байгуулалт хийгдсэнээр богино хугацаанд, бага зардлаар эрчим хүчний системийн чадлын дутагдлаас гарах боломжтой болж байгаа юм.
    БНСУ-ын буцалтгүй тусламж, Солонгосын олон улсын хамтын ажиллагааны байгууллага /Койка/-ийн санхүүгийн дэмжлэгтэйгээр, нийтдээ 5 сая ам.долларын хөрөнгө оруулалтаар баригдсан Сүхбаатар аймгийн Баруун-Урт хотын Дулааны цахилгаан станцыг ашиглалтад энэ сарын эхээр хүлээж авсан байна. Ирэх жил шинээр 8 аймгийн төвд Дулааны станц барих ажлыг эхлүүлэхээр шийдвэрлээд байгаа нь чихэнд чимэгтэй сайн мэдээ.
    Тавантолгойн цахилгаан станц төслийг хэрэгжүүлэх ажлыг хүрээнд шаардагдаж байгаа тусгай зөвшөөрлүүдийг олгосноор Тавантолгой цахилгаан станц барих төсөл нэг алхамаар урагшиллаа. "Тавантолгой" цахилгаан станц" төслийн Техник эдийн засгийн үндэслэлийг Эрчим хүчний яамны Шинжлэх ухаан технологийн зөвлөлийн хурлаар хэлэлцэж баталсан байна.
    Шинээр ашиглалтад оруулсан Салхитын цахилгаан станц болон дулааны хоёр станцын өргөтгөлийн хүчин чадлын нэгдсэн дүнг тооцоход ТЭЦ-3 станцын одоогийн гаргаж буй 148 MBT чадлаас давсан эх үүсвэр болж байгаа юм. Дараа оны намар ашиглалтад орох Амгалангийн дулааны станц гэхэд л Дарханыхаас хоёр дахин илүү эрчим хүч үйлдвэрлэж нийлүүлнэ, ажил нь гараанаас хөдөлсөн ТЭЦ-5 станц шинээр барих үйлдвэр, орон сууцуудыг цахилгаан, дулаанаар хангах найдвартай эх үүсвэр болно.
    “М-Си-Эс” ХХК-ийн гүйцэтгэлээр Мандалговь–Тавантолгой  220кв-ын хоёр хэлхээт 250км цахилгаан дамжуулах агаарын шугам, 220 кв-ын “Чойр” дэд станцын, 110 кв-ын “Мандалговь” дэд станцын өргөтгөл, 110 кв-ын Тавантолгой дэд станцыг шинээр барьж байгуулсан бол 2012 оны 08 дугаар сараас Тавантолгой–Оюутолгой 220кв-ын хоёр хэлхээт 138км цахилгаан дамжуулах агаарын шугам, Оюутолгой дэд станцыг шинээр барьж дуусгажээ.
    Энэ мэтчилэн эрчим хүчний бүтээн байгуулалтын чиглэлээр ихээхэн ажил хийсэнийг “Шударга ёс” бүлгэм өндөр үнэлж байна. Дээр төлөвлөсөн ажлууд хугацаандаа хийгдэж дуусвал, бид эрчим хүчний найдвартай эх үүсвэртэй болно, үйлдвэрлэл болон барилга хот байгуулалтын олон ажил хийх боломжтой болох юм.