Найз бүсгүйгээ хөнөөсөн хэрэгт сэжиглэгдэн саатуулагдаад байгаа Г.Алтанхүүгийн нэр хүндэд халдсан хэрэгт Хүний эрхийн хуульч М.Ичинноровыг сэжигтнээр татаж, эрүүгийн хэрэг үүсгэсэн талаар бид мэдээлж байсан. Тэгвэл хуульч М.Ичинноров дөнгөж сая мэдээлэл хийлээ. Энэ үеэр түүнтэй цөөн хором ярилцлаа.

-Таныг хүний нэр төрд халдсан хэмээн сэжигтнээр татсан гэсэн. Аль дүүргийн цагдаа дээр, хэний гомдлоор шалгагдаж байгаа вэ?

-Г.Алтанхүүг хүн гэмт хэрэгт санаатайгаар гүтгэсэн гэдэг зүйл ангиар Чингэлтэй дүүргийн цагдаа дээр шалгаж байгаа. Г.Алтанхүү өөрөө гомдол гаргасан. Миний хувьд өөртөө өмгөөлөл үзүүлнэ. Тиймээс ч хэд хэдэн удаа байцаалт өгсөн байгаа. Цаашдаа энэ хэрэг яаж үргэлжлэхийг би ажиглаж байна.

-Яг ямар үндэслэлээр шалгаж байгаа вэ?

-Энэ хэрэгт туслалцаа үзүүлж, стратегийн өмгөөлөл үзүүлсэний төлөө намайг цагдаад өгч, эрүүгийн хэрэг үүсгүүлэхээр шалгуулсан. Одоогоор цагдаа дээр байцаагдаж байна.Энэ хэрэг дээр би хэн нэгнийг гүтгэх, хэн нэгэнд ямар нэг хувийн ашиг сонирхолоороо хандаагүй. 21 настай бүсгүй найз залуудаа 48 цагийн турш зодуулаад амиа алджээ гэсэн мэдээллийг хэвлэл мэдээллээр олж хараад  туслахыг хүссэн. Мөн над руу олон залуучууд энэ хэрэг дээр туслахыг хүссэн. Тиймээс би хохирогчийн ар гэрийнхэнтэй холбогдсон. Тэр үед үнэхээр хэцүү байсан. Хүүхдээ алдсан эх, эцэгт ямар байх нь ойлгомжтой. Тиймээс би энэ хэрэгт хамгийн түрүүнд эхийн сэтгэлээр, хоёрдугаарт энэ хэрэгт стратегийн зарчим дээрээ тулгуурлаад бусад хуульчдын туслалцаатайгаар туслалцаа дэмжлэг үзүүлье гэж шийдсэн. Улмаар хуульчдын баг бүрдүүлсэн.

-Талийгаачийн ар гэрийнхнээс мөн мэдүүлэг авч, шалгаж байгаа гэх мэдээлэл байна. Энэ үнэн үү?

-Одоогийн байдлаар талийгаачийн ар гэрээс шалгаж байгаа зүйл байхгүй. Харин над дээр эрүү үүсгүүлэхээр гомдол гаргасан.

-Г.Алтанхүүд холбогдох хэрэг УМБГ руу шилжсэн үү?

-Сүхбаатар дүүргийн хоёрдугаар хэлтэс дээр шалгагдаж байгаа. Эрүүгийн хуулийн 91.1-ээр зүйлчлэгдсэн.

-Хавтаст хэрэгтэй та танилцсан уу. Г.Алтанхүү ер нь өөрөө хэрхэн мэдүүлж байгаа вэ?

-Хавтаст хэрэгтэй танилцуулдаггүй. Манай эрүүгийн байцаан шийтгэх үйл ажиллагаан дээр нэг сонин зүйл байдаг. Энэ нь өмгөөлөгч нарыг анхнаас нь нээлттэй оролцуулдаггүй. Харин хэрэг боогдоод прокурорт очихын өмнө танилцуулдаг. Ингэснээр зарим өмгөөлөгч нэг хоногийн дотор хавтаст хэрэгтэй танилцах зүйл ч байдаг.

-Хэдэн хүнтэй хуульчдын баг энэ хэрэг дээр ажиллаж байгаа вэ?

-Энэ хэрэг дээр өмгөөлөгч Д.Сайнзаяа, Хүчирхийллийн эсрэг үндэсний төвийн хуульч, өмгөөлөгч Арвинтариа гээд хоёр эмэгтэй эрүүгийн хэрэгт нь өмгөөлөгчөөр ажиллаж байгаа. Би өөрөө хохирогчдын хууль ёсны эрх ашгийг итгэмжлэн төлөөлөгчөөр оролцож байна. Түүнээс гадна нийгмийг хамарсан гэр бүлийн хүчирхийллийг таслан зогсооход энэ хэрэг жишиг болно гэдэг үндсэн дээр оролцсон.

-Талийгаач Цэдэн-Ишийн шинжилгээний хариу албан ёсоор өчигдөр гарсан ч олон нийтэд ил болсонгүй. Харин Цэдэн-Ишийг архины хордлогод орсон байсан гэсэн сөрөг мэдээлэл тарах боллоо. Энэ талаар?

-Хохирогчийн шинжилгээний хариутай би албан ёсоор танилцаагүй байгаа. Танилцах эрх нь хохирогч нар болон өмгөөлөгчид байгаа. Ар гэрийнхнээс нь нэг хүн, хоёр өмгөөлөгчийн нэг нь шинжилгээний хариуг сонссон. Тэдэнтэй холбогдож тодруулахад талийгаачийн шинжилгээний хариу тийм ч таатай гараагүй буюу хохирогчдын сэтгэлд нийцэхээргүй гарсан гэж байсан. Хэрэг мөрдөн байцаалтын шатанд яваа учир тодорхой мэдээллийг өгөх боломжгүй. Ямартаа ч талийгаачийг архины хордлогод орсон гэх мэдээллийг үгүйсгэж байна. Ямар учраас ийм мэдээлэл яваад байгааг ойлгохгүй байна. Энэ мэдээллийг сонсоод ар гэрийнхэн нь, тэр дундаа ээж нь гүн шоконд орсон. Ар гэрийнхэн нь маш гомдолтой байна. Ер нь шүүх эмнэлгийн дүгнэлт гэр бүлийн хүчирхийлэлтэй холбоотой хэрэгт их сонин гардаг.  Тухайлбал, эхнэр, найз охин, хамтран амьдрагчаа алсан тохиолдолд тэр нь Монголд хэрэг биш болоод байна. Гэтэл хоёр залуу хоорондоо маргалдаж байгаад нэгнээ хохироовол ялаа аваад яваад байна. Тэгэхээр энэ байдалд хүн бүр анхаарлаа хандуулах ёстой. Хоёрдугаарт шүүх эмнэлгийн дүгнэлтэнд хэт дулдуйдаж болохгүй. Гэмт хэргийг нотлох олон онол, эрүүгийн байцаан шийтгэх ажиллагаа, эрүүгийн хуулийн олон зарчмууд байдаг. Жишээлбэл, нөхцөл байдлыг тодорхойлох ёстой. Хамгийн гол зүйл тухайн хүний гэмт хэрэг үйлдэх гэсэн нөхцөл шалтгаан, санаа сэдлийг шалгах чухал. Мөн тэнд хүчирхийлэл болж байсныг нотлох маш олон баримт бий. Тэгэхээр зөвхөн шүүх эмнэлгийн дүгнэлт туйлын үнэн, эцсийн нотлох баримт болохгүй. Нөхцөл байдал, нотлох баримт, гэрчүүд гэж энэ хэрэг дээр байгаа шүү.

-Ер нь архины хордлогод орж нас барах үндэслэл байхгүй биз дээ?

-Хэрвээ архины хордлогоор нас барсан бол цус алдалт гэж байхгүй. Мөн хамт архи уусан Г.Алтанхүү өөрөө яагаад үхээгүй байгаа юм гэдэг сонин.

-Таны хувьд хэрэг дээр ажиллаж байгаа хүнийхээ хувьд хохирогчийг болон ар гэрийнхнийг нь судалсан байгаа. Талийгаач ер нь архи хэрэглэж байсан талаар мэдээлэл бий юу?

-Мэдээж охины талаарх мэдээллийг гэр бүлийнхнээс нь авна. Эцэг, эхэд нь үр хүүхэд хамгийн сайхнаар нь төсөөлөгдөнө шүү дээ. Тэгэхээр энэ архи хэрэглэж байсан гэсэн зүйлийг мэдээж гэрийнхнээс нь үгүйсгэж байгаа. Хохирогч хүмүүжилтэй айлын, төлөв даруу хүүхэд байсан.

-ШШҮХ-д ар гэрийнхнийх нь зүгээс ямар нэг гомдол ирээгүй гэсэн. Хэрэв гомдолтой гэвэл задлангийн бичлэгийг үзүүлэх боломжтой гэж байсан. Яагаад гомдолтой гээгүй юм бол?

-Ер нь анхны шүүхийн шинжилгээний дүгнэлтийг эсэргүүцэж прокурорт гомдол гаргасан учраас хоёр дахь задлан шинжилгээ болсон. Яг хуулийнхаа хүрээнд прокурорт гомдол гарсан бөгөөд эхний шүүхийн шинжилгээний дүгнэлтэнд оролцсон эмч нарыг авлигад автсан эсэхийг нь шалгаж өгөөч гэсэн хүсэлтийг АТГ-аас хохирогчдын зүгээс гаргасан.

-Ээжийнх нь биеийн байдал хэр байгаа вэ. Нийслэлд авчирна гэсэн юу болсон бэ?

-Ээжийнх нь биеийн байдал маш хүнд байгаа. Ганц охиноо алдсан хүн учир байнга ухаан алдаж унадаг. Телевизээр охиных нь тухай гарч байгаа мэдээллийг сонсоод хүртэл биеийн байдал нь маш хүндэрдэг. Зарим хэвлэл мэдээллүүд хохирогч болон ар гэрийнхэнтэй нь холбоотой гүтгэлгийн мэдээ их гардаг. Ер нь Монгол Улсад хохирсон хүмүүс хохирсон дээрээ хохирдог жишиг тогтчихож гэдгийг л хэлмээр байна.