Мөнгө угаасан, авлига өгсөн, авсан хэрэгт шүүгдэгчээр татагдсан “Тэнгри холдинг” компанийн захирал Х.Анхбаяр, ерөнхий менежер Н.Отгонболд, А.Чандмань, Д.Амарсайхан агсан нарын хэргийг шүүх хурал Сонгинохайрхан дүүргийн хоёрдугаар шүүхэд үргэлжилж байна. Өмгөөлөгчдийн зүгээс шүүгчдийн бүрэлдэхүүнийг өөрчилж өгнө үү гэсэн саналыг гаргасан учир шүүх хурал хойшилж магадгүй байсан. Тэгвэл шүүх бүрэлдэхүүн тэдний саналыг хүлээж аваагүй учир ийнхүү шүүх хурал үргэлжлэхээр болсон. Мөн тэднийг дахин шүүгчдийн бүрэлдэхүүнийг өөрчилье гэсэн санал гаргахгүй байхыг санууллаа. Шүүгч нар зөвлөлдөж доорх шийдвэрийг гаргалаа.

Шүүгчийн шийдвэрийг бүрэн эхээр нь.

"Шүүгч нараас татгалзах хүсэлтийг хүлээж авах боломжгүй байна. Мөн шүүх хуралдааны нарийн бичгийн даргаас татгалзсан. Энэ бол мөн л адил хуульд заасан үндэслэлээр татгалзах үндэслэл болохгүй байна. Харин энэ асуудлаар алдаа эндэгдэл гаргасан бол зохих байгууллагад нь журмын дагуу тавих эрх нь нээлттэй. Бусад хүсэлтүүдийг хэрэгсэхгүй болгож шийдвэрлэж байна. Таслан сэргийлэх арга хэмжээг хэрэгсэхгүй болгох захирамж болоод гүйцэтгэх ажиллагааны материалтай танилцах, гүйцэтгэх ажиллагааны материалыг танилцуулах талаар шүүхээс тоотуудыг явуулсан. Хариу мэдэгдэх тоотууд ч ирсэн. Үүнтэй танилцсан байгаа. Энэ тогтоол Эрүүгийн байцаан шийтгэх хуулийн 53 дугаар зүйлийн 53.4, 250, 251.1 хэсэгт  зааснаар давж заалдах гомдол гаргах эрхгүйг дурдаж байна" гэв.

 Энэхүү хэргийн шүүх хурал өмнө нь гурвантаа болсон ч өмгөөлөгчид шүүхийг орхин гарсан, хуралд ирээгүй гэх шалтгаануудаар хойшилж байсан юм. Иймээс ч шүүх бүрэлдэхүүн энэ удаагийн шүүх хурлыг хойшлуулахгүй, ямар ч тохиолдолд хэргийг хянан хэлэлцэнэ гэж сануулжээ.