Арилжааны банкууд дундаа харьцангуй нэр хүндтэй, туршлагатай, олон жил тогтвортой үйл ажиллагаагаа явуулж буй “Хас” банк хэрэглэгчдээ залилдаг байсан нь тогтоогдлоо. Тодруулбал, Шударга өрсөлдөөн хэрэглэгчдийн төлөөх газраас тус банкинд шалгалт хийхэд бусад банкнаас хоёр дахин их мөнгийг иргэдээс шимтгэл, хураамж нэрээр авч байсан нь илэрсэн байна.

 Өөрөөр хэлбэл иргэдийн зээлсэн мөнгөнөөс давхардуулан шимтгэл авдаг байсан ноцтой үйлдэл нь ил болсон гэсэн үг юм.

Уг хэрэг дээр Шударга өрсөлдөөн хэрэглэгчдийн төлөөх газрын нэр бүхий олон байцаагч ажиллаж байгаа аж. Тухайлбал улсын ахлах байцаагч Б.Ариунаа, Ж.Очирхуяг, улсын байцаагч М.Мөнхбаяр, К.Жархынбек нар банк болон бусад холбогдох байгууллагаас хяналт шалгалтын ажилд шаардлагатай тайлбар, мэдээ, мэдээлэл, баримт материалыг гаргуулан авч судалжээ. Ингээд шалгаад үзэхэд “Хас банк” нь шимтгэл хураамж гэх нэрээр иргэдийн зээлсэн мөнгөнөөс 0.5-1 хувьтай тэнцэх хэмжээний төлбөр хураамжид 500-15 мянган төгрөгийг авдаг байсан байна. Бүр давхардуулан шимтгэл, хураамж авдаг байсан нь баримтаар илэрсэн тул ШӨХТГ-аас зөрчлөө арилгах хугацаа өгсөн аж.

Гэхдээ тус банкнаас ямар нэгэн хариуг ирүүлээгүй байгаа бөгөөд тус алдаа нь зөвхөн өөрсдөөс нь шалтгаалсан буруутай үйлдэл юм байна. Тодорхой хэлбэл 50 сая төгрөгийн 20 жилийн хугацаатай орон сууцны зээлийг тус банкнаас авбал шимтгэлд нь 500 мянган төгрөгийг өгөх болж байна. Ийм явцуургүй үйлдэл гаргаж, хэрэглэгчдээ залилсан тус банкинд ямар арга хэмжээ авах нь удахгүй тодорхой болох биз ээ.